Parłamient Małdovy prahałasavaŭ za likvidacyju partyi «Šor» paśla taho, jak Kanstytucyjny sud pryznaŭ jaje niekanstytucyjnaj, ale deputaty partyi zastajucca ŭ parłamiencie jak niezaležnyja, pra heta paviedamlaje Newsmaker.
Na pasiadžeńni 22 červienia parłamient uchvaliŭ miery ŭ metach vykanańnia rašeńnia Kanstytucyjnaha suda Małdovy ab pryznańni partyi «Šor» niekanstytucyjnaj i prahałasavaŭ za jaje likvidacyju.
Deputaty z frakcyi «Šor» zachoŭvajuć svaje mandaty, ale praciahnuć pracu ŭ parłamiencie jak «niezaležnyja». Pry hetym im zabaroniena ŭstupać u inšyja frakcyi, a śpisy zapasnych kandydataŭ partyi anulavali.
Akramia taho, deputataŭ «Šor» vyklučyli sa składu pastajannaha biuro, delehacyj u mižnarodnych arhanizacyjach i hrupach siabroŭstva z parłamientami inšych krain.
Nahadajem, 19 červienia Kanstytucyjny sud Małdovy abviaściŭ rašeńnie pa zapycie ŭrada adnosna kanstytucyjnaści dziejnaści partyi «Šor». Jaje pryznali niekanstytucyjnaj na padstavie dakazanych faktaŭ niezakonnaha finansavańnia partyi, podkupu vybarščykaŭ i ŭdzielnikaŭ pratestaŭ. Lidar palityčnaj siły Iłan Šor, jaki z 2019 hoda znachodzicca za miažoj, nazvaŭ pastanovu «samavolstvam» i zajaviŭ, što budzie źviartacca ŭ JESPČ.
***
Partyja była stvoranaja ŭ 1998 hodzie i pieršapačatkova nazyvałasia ruch «Raŭnapraŭje». U 2016 hodzie jaje ŭznačaliŭ biznesoviec Iłan Šor, i jana źmianiła nazvu na «Šor». U 2020 hodzie Iłan Šor byŭ abvieščany ŭ mižnarodny vyšuk pa spravie ab kradziažy 1 młrd dalaraŭ z bankaŭskaj sistemy krainy. U 2023 hodzie Šora prysudzili zavočna da 15 hadoŭ turmy, pazbavili deputackaha mandata i zapatrabavali ekstradavać ź Izraila, dzie jon znachodzicca z 2019 hoda.
U 2022 hodzie, paśla rasijskaha ŭvarvańnia va Ukrainu, partyja «Šor» pačała aktyŭna ŭzajemadziejničać z rasijskimi ŭładami, deputaty naviedali Maskvu i naładzili mižpartyjnyja kantakty. Paśla hetaha partyja arhanizoŭvała pratesnuju dziejnaść suprać ułady ŭ Małdovie. U lipieni 2022 hoda Marynu Taŭbier (faktyčnaja lidarka «Šora» ŭnutry respubliki) abvinavacili ŭ atrymańni srodkaŭ dla partyi ad arhanizavanych złačynnych hrup i falsifikacyi buchhałtarskaj spravazdačnaści; u 2023 hodzie jaje zatrymali ŭ aeraporcie Kišyniova i źmiaścili pad chatni aryšt, a parłamient pazbaviŭ jaje deputackaha imunitetu.
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?12
Kamientary
Zaraz kamientuju i ni razumieju ci rusafobski kamient ci antisimitizm machrovy?? Da nu. hetuju " haleru"