«Synu prysudzili try hady ni za što, niahledziačy na prablemy sa zdaroŭjem» — baćka
Brescki abłasny sud 28 červienia razhledzieŭ kryminalnuju spravu suprać bieraściejca, spartoŭca Dźmitryja Bielamuka. Jaho abvinavacili pa troch artykułach Kryminalnaha kodeksa: č. 1 art. 368 (abraza Łukašenki), art. 369 (abraza pradstaŭnika ŭłady) i č. 1 art. 130 (raspalvańnie rasavaj, nacyjanalnaj, inšaj varožaści).
Praces viała sudździa Rusłana Siańko, dziaržabvinavaŭca — Alaksandr Baciuška.
Pavodle źviestak «Bieraściejskaj viasny», mužčynu źmiaścili pad vartu ŭ siaredzinie lutaha 2023 hoda. Jaho abvinavacili za niehatyŭnyja telehram-kamientary ŭ adras Alaksandra Łukašenki, Natalli Kačanavaj, a taksama za «abrazu ruskich pa nacyjanalnaj prykmiecie».
Pra prysud vyjšaŭ rolik na dziaržaŭnym telebačańni (u im nie nazyvajuć imia abvinavačanaha, ale abstaviny padychodziać pad spravu Bielamuka). Tam prakuror raskazvaje sutnaść abvinavačvańnia, što pra ruskich było napisana «abraza pa nacyjanalnaj prykmiecie».
Taksama prakuror Baciuška paviedamiŭ, što pa ŭsich troch artykułach sud prysudziŭ Dźmitryju try hady kałonii va ŭmovach ahulnaha režymu, a taksama štraf 3700 rubloŭ.
Tyja ž žurnalisty dziaržaŭnaha vydańnia, jakija brali kamientar prakurora, źniali blizkich Dźmitryja Bielamuka na vychadzie z zały suda adrazu paśla abviaščeńnia prysudu.
Baćka Dźmitryja, Alaksandr Bielamuk, zajaviŭ što synu prysudzili try hady «ni za što», niahledziačy na prablemy sa zdaroŭjem («chvory, z čerapam raskołatym»).
«Hetaj spravaj nažyli jašče adnaho voraha, — kaža padčas zdymak Alaksandr Bielamuk i dadaje: — Čałaviek, jaki vystupaŭ suprać (majecca na ŭvazie Raman Pratasievič — zaŭv. red.), pamiłavali jaho, a jon što tolki nie tvaryŭ! Adzin raz vykazaŭ čałaviek, chvory, z čarapnym raskołatym — try hady ŭłupili. Za što, chłopcy? Chutka i pa mianie pryjduć, ja viedaju. Ja ŭpeŭnieny, što pryjduć. (…) Vy ŭsio vydatna razumiejecie, što jość niespraviadlivaść. Jość. Ale ŭsie maŭčać. Adzin skazaŭ. Niapravilna skazaŭ. Pakarać možna, ale nie tak. Jaho štrafam pakarali. A tut jašče try hady».
Ciapier čytajuć
Dźmitryj Siemčanka: Ja pryjšoŭ u puł Łukašenki bicca z Rasijaj19
Kamientary