U Polščy adkazali Pucinu, jaki nazvaŭ jaje zachodnija terytoryi «padarunkam Stalina»
Akramia taho, premjer-ministr Polščy Matevuš Maraviecki zakranuŭ temu vahnieraŭcaŭ i nielehalnych mihrantaŭ ź Biełarusi.
Biełaruś i Rasija chočuć destabilizavać nie tolki Polšču, ale i ŭvieś ES. Pra heta 13 žniŭnia ŭ intervju italjanskaj haziecie Corriere della Sera zajaviŭ premjer-ministr Polščy Matevuš Maraviecki.
Pa słovach premjer-ministra, tolki za hety niapoŭny hod było zafiksavana bolš za 16 tysiač sprob niezakonnaha pierasiačeńnia polskaj miažy z boku Biełarusi.
Situacyja moža stać jašče bolš surjoznaj pry niepasrednym umiašańni PVK «Vahnier».
«Bolš za dva hady Biełaruś i Rasija sprabujuć atakavać uschodniuju miažu Polščy i destabilizavać uvieś Jeŭrasajuz. Tolki za hety hod kolkaść sprob niezakonnaha pierasiačeńnia miažy pieravysiła 16 tysiač. Plus da ŭsiaho isnuje pahroza ad vahnieraŭcaŭ, jakija mohuć zamaskiravacca pad biełaruskich pamiežnikaŭ, navučać mihrantaŭ abychodzić i napadać na našych sałdat, a taksama pasprabavać samim trapić u Polšču dla destabilizacyi našaj krainy», — raspavioŭ italjanskaj haziecie Matevuš Maraviecki.
Plus da ŭsiaho polski premjer-ministr adkazaŭ Uładzimiru Pucinu, jaki pačaŭ pahražać Polščy i nazyvać jaje zachodnija terytoryi «padarunkam Stalina», namiakajučy na ich mahčymaje viartańnie Rasii.
«Mienavita Saviecki Sajuz razam z nacysckaj Hiermanijaj uvarvaŭsia ŭ našu krainu i zachapiŭ na toj momant uschodnija terytoryi Polščy. Potym u Jałcie toj ža SSSR i budučyja dziaržavy-pieramožcy damovilisia, što Polšča atrymaje svaju častku niamieckich terytoryj ad Hiermanii ŭ jakaści kampiensacyi za prysvajeńnie Stalinam uschodniaj častki Polščy.
Heta nie padarunak ad kaho-niebudź, my nie majem nijakich terytaryjalnych pretenzij da svaich susiedziaŭ ci ich ziemlaŭ. Heta histaryčnaja praŭda, jakaja macniejšaja za rasijskuju prapahandu», — adznačyŭ Maraviecki.
Nahadajem, što praz pastajannyja sproby niezakonnaha pierasiačeńnia polska-biełaruskaj miažy i najaŭnaść u Biełarusi niekalkich tysiač najmitaŭ PVK «Vahnier» Polšča pačała istotna pavialičvać kolkaść svaich uzbrojenych sił pobač ź Biełaruśsiu i navat prapracoŭvaje płan poŭnaha zakryćcia miažy.
U dadatak da hetaha polskija ŭłady vykazali žadańnie raźmiaścić u siabie amierykanskuju jadziernuju zbroju ŭ adkaz na raźmiaščeńnie takoj ža ŭ Biełarusi z boku Rasii.
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach11
Kamientary