Łukašenka nazvaŭ kančatkovaje zakančeńnie budaŭnictva BiełAES padarunkam biełarusam da 7 listapada
Łukašenka padčas naviedvańnia BiełAES u Astravieckim rajonie čarhovy raz zajaviŭ pra značnaść daty 7 listapada — uhodkaŭ Kastryčnickaj revalucyi.
Jon zhadaŭ, što da takich śviataŭ u savieckija časy narodu rabili padarunki — uvodzili ŭ stroj znakavyja abjekty. Tak hetaja tradycyja zachavałasia i ŭ Biełarusi.
Łukašenka zaznačyŭ, što jon byŭ inicyjataram budaŭnictva BiełAES, tamu jon siońnia pryjechaŭ u Astraviecki rajon, kab padnieści ludziam hety padarunak.
Jon padkreśliŭ, što budaŭnictva BiełAES u tym liku dapamahło «ŭdychnuć žyćcio ŭ hety paŭnočna-zachodni kraj».
«Ja razumieŭ, što niama pierśpiektyvy biez čystaj enierhii, biez elektryčnaści my nie zmožam raźvivacca», — skazaŭ Łukašenka.
Taksama ŭ jaho spytali nakont budaŭnictva druhoj AES. «Što takoje druhaja stancyja? Heta padvajeńnie mahutnaści. I siońnia ja na ŭzroŭni dyskusij zakidvaju ŭ hramadstva hetuju tezu. Rašeńnie nie pryniata. Kali budziem budavać, ja vam paviedamlu. I parajusia, pierš čym pryniać rašeńnie», — skazaŭ jon.
Nahadajem, u aŭtorak Łukašenka zajaviŭ, što Biełaruś pastaviła pytańnie ab kampiensacyjach u suviazi sa źmiaščeńniem terminaŭ uvodu ŭ ekspłuatacyju BiełAES.
«U nas trochi zrušylisia terminy ŭvodu ŭ ekspłuatacyju atamnaj stancyi praz rasijski bok. Naturalna, pa damovie my pastavili pierad imi pytańnie ab kampiensacyjach. Hetaha chavać nie treba. Ničoha tam nadzvyčajnaha nie było. Ale takija pytańni byli pastaŭlenyja ŭ suviazi z tym, što parušanyja terminy ŭvodu stancyi, i adkaznaść za heta niasie rasijski bok. Jany nam prapanavali varyjanty i pa canie na śviežaje jadziernaje paliva — jak dla rasijanaŭ, jak dla svaich stancyj. I termin harantyjny na piać hadoŭ (na asnoŭnyja vuzły)», — adznačyŭ 31 kastryčnika Łukašenka.
Pracy pa ŭźviadzieńni BiełAES u Astravieckim rajonie pačalisia ŭ 2011 hodzie. Rasija ŭ 2011 hodzie vydała Biełarusi kredyt $10 młrd, jaki pakryvaŭ 90% vydatkaŭ na budaŭnictva. Pieršapačatkova było zajaŭlena, što pieršy enierhabłok uviaduć u stroj u kancy 2019-ha. Ale ŭ vyniku zapuścili ŭ listapadzie 2020 hoda. Druhi błok płanavali zapuścić u 2021 hodzie, ale ŭ vyniku jon byŭ zapuščany ŭ pramysłovuju ekspłuacyju tolki ŭčora.
BiełAES abyšłasia ŭ 5,36 miljarda dalaraŭ — Minfin RF
Łukašenka: Biełaruś pastaviła pierad Rasijaj pytańnie ab kampiensacyjach u suviazi sa ssoŭvańniem terminaŭ uvodu ŭ ekspłuatacyju BiełAES
«Asnoŭnyja etapy budaŭnictva Biełaruskaj AES pryjšlisia na niaprosty pieryjad». «Rasatam» vykazaŭsia adnosna pretenzij Łukašenki
Druhi enierhabłok BiełAES uviedzieny ŭ pramysłovuju ekspłuatacyju
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady26
Kamientary