Praz 17 hadoŭ žyćcia ŭ Litvie biełarusa pazbavili dazvołu na žycharstva, razłučyli ź siamjoj i zahadali viarnucca ŭ Biełaruś

Žonka vysłanaha ŭ Biełaruś mužčyny Janina (sapraŭdnaje imia redakcyi viadoma) raskazała vydańniu, što jaje muž žyŭ u Litvie z 2006 hoda. Tady para ažaniłasia, u jaje naradzilisia dvoje dziaciej. Dzieci, jak i Janina, hramadzianie Litvy. U Alaksieja byŭ časovy vid na žycharstva, jaki ŭvieś čas padaŭžali. U lutym hetaha hoda skončyŭsia termin dakumienta, Alaksiej u zvyčajnym paradku źviarnuŭsia za praciaham dakumienta.

Adkazu pryjšłosia čakać 9 miesiacaŭ, a kali jon byŭ atrymany, siamja była ŭ šoku — na asnovie vysnovaŭ DDB Departamient mihracyi nie praciahnuŭ vid na žycharstva, Alaksieja pryznali pahrozaj nacbiaśpieki Litvy. «30 miesiacaŭ jon nie zmoža pryjechać u Litvu», — raskazała Janina. U departamiencie Alaksieja zaprasili ŭ kabiniet, razdrukavali rašeńnie i skazali, što jon nieadkładna pavinien vyjechać u Biełaruś.

«Pryjechali pamiežniki i na mašynie z hetym dakumientam advieźli na miažu», — raspaviała žančyna. Jana była ŭražanaj. Jaje mužu nie dali ni padrychtavacca, ni sabracca, nichto nie čakaŭ abskardžańnia rašeńnia.

Ciapier jon žyvie tam u baćkoŭ. «Jon u šoku, u poŭnym šoku. Paŭžyćcia pražyŭ tut, tut jaho siamja», — kaža Janina.

U adkazie Departamienta mihracyi, ź jakim aznajomiŭsia Delfi, skazana, što ŭ 2000—2002 hh. mužčyna słužyŭ u biełaruskim vojsku, a ŭ 2003—2004 hh. słužyŭ pa kantrakcie, značyć «pavinien być łajalnym hramadzianinam Biełarusi, jaki padtrymlivaje jaje ŭładu i ahresiŭnuju źniešniuju palityku».

Departamient mihracyi ŭkazaŭ: DDB ličyć, što Alaksiejem mohuć skarystacca dla vykanańnia roznych zadač śpiecsłužbaŭ.

«Jon pracavaŭ prostym pamiežnikam — padnimaŭ i apuskaŭ šłahbaŭm, možna tak skazać», — zapeŭnivaje Janina.

Pavodle jaje słoŭ, uvieś čas u Litvie Alaksiej vykonvaŭ prostuju pracu — byŭ kładaŭščykom. «Amal uvieś čas tut jon pracavaŭ, jaho staž 16 hadoŭ», — dadała žančyna.

Departamient mihracyi ŭkazaŭ, što niahledziačy na ​​toje, što Alaksiej žyvie ŭ Litvie z 2006 hoda, a z 2005 žanaty z hramadziankaj Litvy i vychoŭvaje dvaich niepaŭnaletnich dziaciej, pracuje, usio ž na padstavie vysnoŭ DDB było pryniata rašeńnie admović jamu ŭ vidzie na žycharstva ź mierkavańniaŭ biaśpieki.

U rašeńni taksama paznačana, što Alaksiej žyvie ŭ Litvie, ale časta jeździć u Biełaruś. «Zychodziačy z hetaha, možna zrabić vysnovu, što inšaziemiec nie razarvaŭ sacyjalnyja suviazi ź Biełaruśsiu, a heta pavyšaje ryzyku davańnia infarmacyi i supracoŭnictva ź biełaruskimi słužbami», — skazana ŭ rašeńni.

«Čamu čałaviek nie moža jeździć da baćkoŭ? Tak, my raniej amal kožnyja vychadnyja jeździli, da pandemii. Tam nie tolki jaho baćki žyvuć, tam pachavana maja maci, my nie jeździm tudy prosta tak», — skazała Janina.

Departamient zaznačyŭ, što Alaksiej nie pretendavaŭ na pastajanny vid na žycharstva i na hramadzianstva, što rascaniŭ, jak fakt «niedastatkovaj intehracyi ŭ litoŭskaje hramadstva i toje, što čałaviek nie źviazvaje ź Litvoj svaju budučyniu».

Pa słovach Janiny, Alaksieju zrabili zaŭvahu i z-za nievialikaha zarobku.

• 19
• 0
• 13
• 25
• 8
• 8
• 70
• 0