Łukašenka nie pavieryŭ Ryžankovu. Piatkievič vyhladaje procivahaj Krutomu. A Kruty — vialikaja zahadka

Za pafasnym biełym łakiravanym stałom siadzieli Raman Hałoŭčanka i ŭsio kiraŭnictva Administracyi prezidenta. Maksima Ryžankova pasadzili nasuprać premjera i pieršym ad Łukašenki, ale heta ŭžo była prosta ironija. 

Ryžankovu nie davieryli pasadu kiraŭnika Administracyi.

Mnohija mierkavali, što hetaje pytańnie ŭžo vyrašanaje, raz mienavita Ryžankoŭ staŭ vykanaŭcam abaviazkaŭ kiraŭnika paśla pierachodu Ihara Sierhiejenki na niezasłužany adpačynak u Pałatu pradstaŭnikoŭ. Ale čym bolš zaciahvałasia hetaja paŭza, tym bolš stanaviłasia jasna, što Ryžankovu šukajuć alternatyvu.

Ryžankoŭ vychadziec ź Ministerstva zamiežnych spraŭ i maje reputacyju probusiness čałavieka. Jon taksama viadomy svajoj naravistaściu i rezkaściu. Kažuć, jon byŭ adzinym naviersie, chto procistajaŭ Natalli Kačanavaj (darečy, Kačanavaj i Valfoviča na cyrymonii abviaščeńnia novych pryznačencaŭ nie było).

Padajecca, Ryžankoŭ mieŭ svaju pazicyju pa mnohich pytańniach — dośvied pakazvaje, što Łukašenka takoha nie lubić. Skazali admyvać karoŭ — admyvaj karoŭ.

Ci aznačaje pierachod Ryžankova ŭ kresła ministra zamiežnych spraŭ uzmacnieńnie hetaha kresła i hetaha ministerstva?

Siarhiej Alejnik byŭ jak ministr słaby — nie ŭ sensie niekampietentnaści, jon akurat-taki daśviedčany, prafiesijny i pracavity dypłamat, ale ŭ sensie aściarožnaści i biezambicyjnaści.

Ryžankoŭ ža budzie mocnaj fihuraj na pasadzie ministra. Pra jaho kažuć, što jon zdolny i Cierciela pasłać na try litary.

«Adzinaje, chaču papiaredzić: Ryžankova asabliva tudy-siudy haniać biessensoŭna. I nie tolki tamu, što čałaviek faktyčna padparadkavany prezidentu, ale jašče i tamu, što ŭ jaho ŭ charaktary hetaha niama, kab im panukali»,— skazaŭ sam Alaksandr Łukašenka na kadravaj aŭdyjencyi.

Ale ad Ryžankova adnačasova patrabujecca, kab tyja biaskoncyja čystki, jakija iduć u dypłamatyčnym viedamstvie, ruchali ŭžo nie śpiecsłužby, a jon sam: «Šans dajcie ŭsim. Viedaju, što tam niaprostaja abstanoŭka. Usim dajcie [šans], ale toj … chto mianie siońnia nie pačuje, jany pracavać nie pavinny».

Dźmitryja Krutoha charaktaryzujuć jak poŭnuju supraćlehłaść Ryžankova ŭ sensie adsutnaści pazicyi. 

«Kruty — hasudaraŭ čałaviek, biez ułasnaha «ja»,— tak charaktaryzuje jaho ekanamist, jaki daŭno jaho naziraje. —

U jaho vypadku čynoŭnickaja rola i łohika pieravažaje ŭsie astatnija. Jon płoć ad płoci łukašenkaŭskaj sistemy i ruchajecca pa vyznačanym sistemaj viektary. Ruchajecca ŭ roli vykanaŭcy, i ź joj jon u łohicy sistemy, peŭna, spraŭlajecca, choć i vykanaŭcy-mieniedžara. Zdolnaści ž ci ambicyj samomu farmulavać sensy i vyznačać viektary dynamiki za im nie naziraŭ», — kaža ekanamist. 

Na jaho dumku, ułasnyja ekanamičnyja ci ideałahičnyja pazicyi dla Krutoha zaŭsiody byli druhasnymi: jaho pavodziny pradvyznačalisia nie imi, a łohikaj «partyja skazała treba, kamsamoł adkazaŭ «jość».

Pavialičyć

Amatary mohuć padličyć, kolki razoŭ jon kivaje ŭ čas pramoŭ Łukašenki. Tam kaśmičnaja ličba vychodzić.

I hetaje ampłua «čystaha vykanaŭcy, biez ułasnaj pazicyi», i salidny śpis pasadaŭ, praź jakija jon prajšoŭ, i karani va Uschodniaj Biełarusi, na Mahiloŭščynie, i, asabliva, najaŭnaść u śpisie pasady pasła ŭ Rasii robiać Krutoha vielmi krutym pa kryterach taho režymu, jaki skłaŭsia. U svoj čas Kruty byŭ samym maładym ministram, ciapier jon samy małady ŭ historyi kiraŭnik Administracyi prezidenta. Heta znaki davieru i patencyjału.

Asabliva chočacca spynicca na pasadzie pasła ŭ Rasii. U luboj inšaj krainie pasoł — heta pasoł, u jakoj by krainie jon ni byŭ pasłom. Ale dla Biełarusi pasoł u Rasii ŭ tabieli ab ranhach, jak bačym, roŭny pasadam vice-premjera i namieśnika kiraŭnika Administracyi. Tak, heta simptom poŭnaj zaležnaści i padkantrolnaści Biełarusi, ale jak jość. Kruty miž hetymi ahniami prajšoŭ, hety jarłyk atrymaŭ.

Alaksandr Łukašenka ŭ pasłanych u ŚMI kadrach padkreśliŭ, što Kruty zastajecca adkazny za rasijski kirunak: enierharesursy i handal z Rasijaj. A heta samaje važnaje ŭ sistemie. Biez rasijskich datacyj jana nie pražyvie.

Što da Natalli Piatkievič, to ŭ svoj čas jana była ŭvasableńniem reakcyjnaj linii, supraćstajała Uładzimiru Makieju. Ale mienavita joj u 2008 hodzie byli daručanyja pieramovy z amierykancami, jakija mieli vynikam pieršaje addaleńnie Biełarusi ad Rasii.

Spakuśliva pabačyć niejkuju simvoliku ŭ tym, što kiraŭnikom robiać čałavieka, jaki pracavaŭ apošnija hady ŭ Maskvie, a jaho pieršaj namieśnicaj — čałavieka, jaki adpačyvaŭ u Ńju-Jorku.

Ale heta supadzieńnie. Na maju dumku, Piatkievič staviać ź vielmi kankretnaj metaj: zabiaśpiečyć paśpiachovaje pieraabrańnie Alaksandra Łukašenki ŭ nastupnym hodzie. Bo heta jana prydumlała pijar-stratehii, jakija spracavali ŭ 2006-m i 2010-m.

Tolki ci heta ŭsio jašče taja samaja Piatkievič, ci hady i dośvied žyćcia nie va ŭładzie jaje źmianiŭ? Vializnaja biełaśniežnaja broška z tkaniny na šyi, jakuju jana nadzieła na cyrymoniju mirapamazańnia, daje padstavy dumać: jana taja samaja. 

U kožnym razie, chtości taki ambicyjny i naporysty moža być i procivahaj «pravilnamu» Krutomu, jak u svoj čas jana była procivahaj Makieju.

Historyja ź viartańniem Piatkievič nahadvaje i jašče pra adnu asablivaść palityčnaha stylu Alaksandra Łukašenki.

U 2014 hodzie «Naša Niva» pisała:

«Pamočnica prezidenta Natalla Piatkievič 1 kastryčnika była adpraŭlenaja ŭ adstaŭku «pa zhodzie bakoŭ». Dahetul nikoha z najvyšejšych ešałonaŭ ułady nie vypraŭlali «na adpačynak» z takoj intryhoŭnaj farmuloŭkaj. Heta nie pakidaje šancaŭ na viartańnie ŭ Administracyju. Ale i pasadka nie pahražaje. Natalla Piatkievič moža znajści siabie ŭ biznesie. Joj zastajecca dom u Drazdach i šmatlikija ŭspaminy».

I voś… Nie prajšło i 10 hadoŭ. Nikoli nie kažy nikoli, kali havoryš pra čałavieka, jaki choča kiravać viečna, a paśla hetaj viečnaści pakinuć uładu małodšamu synu.

• 7
• 1
• 8
• 2
• 4
• 6
• 16
• 0