U MUS Polščy dumajuć, što ŭ niadaŭnich bujnych pažarach u krainie zamiešanaja «zamiežnaja ahientura»
Ministr unutranych spravaŭ i administravańnia, kaardynatar śpiecsłužbaŭ Polščy Tomaš Siemoniak apavioŭ u efiry TVN24, što ŭ kožnym bujnym pažary na terytoryi krainy ciapier šukajuć śled zamiežnych ahientaŭ, piša Biełsat.
«Dośvied apošnich miesiacaŭ pakazvaje, pačynajučy ź pieršaj sproby padpału budaŭničaha składu va Urocłavie, što ŭ kožnaj situacyi treba prymać pad uvahu dziejańni zamiežnaj ahientury, jakaja zamaŭlaje ŭ takich «adnarazovych» ahientaŭ za nievialikija hrošy z amatarskim instrumientam padpały roznych abjektaŭ», — skazaŭ Siemoniak.
Pavodle ministra, ciapier padčas rasśledavańnia kožnaha bujnoha pažaru polskija słužby karystajucca infarmacyjaj ad kalehaŭ ź inšych krainaŭ:
«Vyklik surjozny, bo havorka nie pra jaŭnych varožych ahientaŭ, a pra naniatych za paru tysiač jeŭraŭ asobaŭ, jakija nie zaŭsiody razumiejuć, u čym biaruć udzieł».
U spravach padpałaŭ ciapier aryštavanyja bolš za dziesiać čałaviek. Siarod ich jość biełarusy. Pavodle padazreńnia ŭ ździajśnieńni dyviersii zatrymali Andreja Biełaha, jaki, zhodna sa źviestkami «Bajpoł», z 2010 hoda słužyŭ milicyjantam patrulna-pastavoj słužby ŭ Baranavičach. U 2014-m jaho zvolnili za parušeńnie ŭmovaŭ kantraktu.
Ličby, ad jakich strašna. Bolš za 280 tysiač biełarusaŭ atrymali dazvoły na žyćcio ŭ ES u 2023. Bolš tolki va ŭkraincaŭ35
Kamientary