Minimum piać šachiedaŭ zalacieli nočču ŭ Biełaruś: adzin dabraŭsia ažno da Stolina
U noč na 31 lipienia adbyŭsia samy masavy zalot «šachiedaŭ» u pavietranuju prastoru Biełarusi za ŭvieś pieryjad manitorynhu. Pavodle infarmacyi hrupy «Biełaruski Hajun», usiaho za minułuju noč u Biełaruś zalacieli nie mienš za piać dronaŭ-kamikadze typu «šachied».
Pieršy z šachiedaŭ zajšoŭ u Biełaruś niedzie ŭ 23:20 kala v. Asarevičy Brahinskaha rajona. I ŭžo ŭ 23:50 z aeradroma «Baranavičy» byŭ uźniaty źniščalnik VPS RB, jaki bolš za hadzinu lotaŭ pa ŭsim paŭdniovym uschodzie Biełarusi pablizu pamiežža.
Źniščalnik zaŭvažali ŭ rajonie Rečycy, Homiela i pablizu inšych nasielenych punktaŭ u pryhraniččy z Ukrainaj, što śviedčyć ab tym, što źniščalnik pravodziŭ intensiŭny pošuk celaŭ i byŭ uźniaty nie prosta na raźviedku, a na metanakiravanaje vyjaŭleńnie šachiedaŭ nad Biełaruśsiu. Jon prabyŭ na poŭdni krainy da 01:30 nočy, ale i paśla jaho viartańnia ŭ «Baranavičy» šachiedy praciahnuli zachodzić u Biełaruś.
Drony-kamikadze ŭvarvalisia ŭ pavietranuju prastoru Biełarusi ŭ rajonie Łojeva, Asarevičaŭ i v. Kirava (Brahinski rajon). Pa časie heta adbyvałasia ŭ 23:20 (№1), 00:05 (№2), 01:20 (№3), i apošniaja hrupa zajšła ŭ Biełaruś u rajonie 02:30 nočy, pryčym u apošnim vypadku ich było adrazu dźvie adzinki.
Kamientary