U Homieli sudziać byłoha milicyjanta, jaki padtrymlivaŭ Ukrainu ŭ sacsietkach
Vilen Turhunaŭ raniej byŭ načalnikam adździeła ŭ AUS Čyhunačnaha rajona Homiela, a zatym pracavaŭ u pryvatnym siektary, piša «Radyjo Svaboda».
Homielski abłasny sud pačaŭ razhlad spravy byłoha milicyjanta Vilena Turhunava — eks-načalnika adździeła AUS Čyhunačnaha rajona Homiela.
Turhunava abvinavačvajuć pa troch artykułach Kryminalnaha kodeksa — č.3 art. 361 («zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy»), č. 1 art. 130 («raspalvańnie rasavaj, nacyjanalnaj, relihijnaj ci inšaj sacyjalnaj varožaści»), č. 2 art. 367 («paklop na Łukašenku»).
Sud prachodzić u zakrytym režymie, jak i bolšaść pracesaŭ nad byłymi siłavikami, jakich ułady padazravali ŭ niełajalnaści.
U «Biełpole» pra Vilena Turhunava paviedamili, što mužčynu 55 hadoŭ, jaho baćka rodam z Uźbiekistana, maci biełaruska. U Biełaruś Vilen Turhunaŭ pryjechaŭ z Branskaj vobłaści Rasii, dzie skončyŭ univiersitet pa śpiecyjalnaści «Pravaznaŭstva». Žyŭ u Homieli, byŭ žanaty, ciapier raźviedzieny.
Vilen Turhunaŭ pracavaŭ u milicyi Homiela, a paśla zvalnieńnia — u budaŭniča-mantažnym treście.
Viadoma, što pierad zatrymańniem Vilen Turhunaŭ vioŭ staronki ŭ sacyjalnych sietkach, dzie vykazvaŭsia pra palityčnyja i sacyjalnyja padziei. Za padtrymku Ukrainy inšyja karystalniki sietak nazyvali jaho «banderaŭcam».
Sudzić Vilena Turhunava Aleh Charoška, dla jakoha heta nie pieršy praces, źviazany z padziejami va Ukrainie.
Pavodle źviestak «Viasny», u kastryčniku 2022 hoda jon pryznačyŭ 2 hady źniavoleńnia žycharu Homielskaj vobłaści Uładzisłavu Vojnu, jakoha pryznaŭ vinavatym u» sadziejničańni ekstremisckaj dziejnaści» — heta častka 1 artykuła 361-4 Kryminalnaha kodeksa Biełarusi.
«Nie było strachu, było nierazumieńnie, našto jamu heta». Byłaja dyrektarka «Listapada» raskazała pra Viktara Babaryku i svajo žyćcio ciapier18
Kamientary