Šoŭranieram daviałosia apraŭdvacca pierad aŭtaram za svaje pamyłki ŭ historyi Viesterosa.
Niekalki dzion tamu ŭ svaim błohu Not a Blog amierykanski piśmieńnik Džordž Marcin, aŭtar sieryi ramanaŭ «Pieśnia lodu i ahniu», jakija lahli ŭ asnovu papularnych sieryjałaŭ «Hulnia tronaŭ» i «Dom Cmoka», apublikavaŭ dopis, u jakim zajaviŭ, što jon musić napisać, što pajšło nie tak z apošnim sieryjałam.
Narešcie 4 vieraśnia piśmieńnik apublikavaŭ u błohu vialiki tekst z krytykaj druhoha siezona «Doma Cmoka». Ale pravisieŭ jon niadoŭha. Praź nieviadomuju pryčynu dopis byŭ vydaleny ŭsiaho praź niekalki hadzin. Fanaty, viadoma, paśpieli zachavać tekst i apublikavać jaho na inšych płatformach.
Čytajcie taksama: Druhi siezon «Doma Cmoka» padmanuŭ čakańni
Što ž nie spadabałasia staryčynie Marcinu ŭ ekranizacyi svajoj historyi pra hramadzianskuju vajnu pamiž pradstaŭnikami dynastyi Tarharyjenaŭ za ŭładu nad Viesterosam?
Marcin adznačyŭ, što sami sieryi byli vydatnymi: dobra napisanyja, dobra źniatyja, mocna syhranyja. Ale adzin epizod vyklikaŭ u historyi «efiekt matyla», jak u viadomym apaviadańni Reja Bredbiery, i Marcin nie ŭjaŭlaje, jak šoŭraniery zmohuć vyjści z hetaj situacyi.
Pryčynaj krytyki staŭ epizod, dzie najmity Kroŭ i Syr uryvajucca ŭ pakoi karalevy Chelejny, kab spahnać ź jaje kryvavy doŭh za śmierć prynca Lucerysa, «voka za voka». Joj prapanujuć vybrać pramiž 6-hadovymi dvajniatami Džejchiejrysam i Džejchiejraj. Chelejna pakazvaje na dačku, ale zabojcy žorstka raspraŭlajucca ŭ jaje na vačach ź jaje synam i spadčyńnikam karala Ejhana II.
Voś tolki pa knizie ŭ pary było troje dziaciej i vybirać Chelejnu prymusili pamiž 2-hadovym Mejłaram i starejšym Džejchiejrysam. U sieryjale Mejłara nie isnuje ŭvohule. Jak adznačaje Marcin, maleńki prync akazvaje ŭpłyŭ na chod dalejšych padziej siužetu, niepraparcyjny svajmu ŭzrostu. Na jaho historyi zaviazany žyćci hałoŭnych piersanažaŭ i vyrašeńnie ŭsiaho mižusobnaha kanfliktu Tarharyjenaŭ.
Naciśnicie, kali chočacie pračytać spojler
Pryčynaj adychodu ad knihi stała ekanomija hrošaj. Stvaralniki sieryjała ŭžo daŭno majuć prablemy ź biudžetam, tamu ekanomić imknulisia ŭsiudy, dzie mahli. Ale paśla straty Mejłara značnaja častka dalejšaj historyi hublaje sens. U trecim i čaćviortym siezonie fanataŭ, vidać, čakaje jašče bolšaje razychodžańnie z knižnym aryhinałam.
Reakcyja HBO na krytyku ad piśmieńnika nie prymusiła siabie čakać:
«Ciažka znajści bolšych fanataŭ Džordža R. R. Marcina i jaho knihi «Połymia i kroŭ», čym pradziusarski i tvorčy kalektyŭ «Doma Cmoka» i my ŭ HBO.
Pry adaptacyi knihi dla teleekranaŭ ź ich asablivaściami i abmiežavańniami šoŭraniery vymušany prymać ciažkija rašeńni nakont piersanažaŭ i ich siužetnych linij.
My ličym, što Rajan Kendał i jaho kamanda prarabili cudoŭnuju pracu, i miljony fanataŭ sieryjała, sabranych im za pieršyja dva siezony, praciahnuć zachoplena hladzieć jaho», — adkazali ŭ kampanii na krytyku.
Amal adnačasova z publikacyjaj paviedamleńnia Marcina aficyjny padkast sieryjała vyliŭsia niezapłanavanym vypuskam z Rajanam Kendałam, dzie toj parazvažaŭ pra tonkaści pry adaptacyi tekstu pad ekranizacyju i pryznaŭsia ŭ vialikaj lubovi da Džordža Marcina.
Jon zajaviŭ, što hledačy sami zrazumiejuć, čamu mejstry ŭnutry śvietu zapisali chroniku mienavita tak, i što važnaść adroźnivać pavahu da aryhinału i pakłanieńnie pierad im.
«Naša Niva» — bastyjon biełaruščyny
PADTRYMAĆNa sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?8
Kamientary