Pamior rok-śpiavak Dya

Ciažki rok straciŭ adnaho sa svaich samych pałymianych trybunaŭ i charyzmatyčnych lideraŭ. Ronald Džejms Panavoda, viadomy jak chard-rok-śpiavak Dya, uładalnik mahutnaha vakału i aŭtar mietaličnych baładaŭ pra biaskoncaje zmahańnie Dabra i Licha, pamior učora na 68 hodzie žyćcia. Paŭhoda jon pakutavaŭ na rak straŭnika, jaki vyjavili lekary padčas turu apošniaj reinkarnacyi lehiendarnaha Black Sabbath — Heaven And Hell.

Dya (1942-2010), što naradziŭsia ŭ italjana-amierykanskaj siamji, źmianiŭ šmat hurtoŭ, pierš čym dastaŭ svaju pieršuju papularnaść u 1975 hodzie z hurtam Rainbow. Rainbow stvaryŭ adzin z najviadomych rok-hitarystaŭ płaniety Ryčy Błekmar. Potym Dya zamiaściŭ Ozi Ozbarna ŭ Black Sabbath, kab zapisać, moža być, adzin z najlepšych albomaŭ chevi-mietału «Heaven And Hell» (1980). Jahonyja sychody i viartańni ŭ Black Sabbath, a taksama tvorčaje spabornictva z Ozi Ozbarnam naradzili bieźlič sprečak siarod šanavalnikaŭ, chto — Ozi Ozbarn ci Dya — pieradaje sapraŭdny styl hurtu i duch novaha stylu. Pytańnie vyjaviłasia rytaryčnym, bo ź ciaham času stała zrazumieła, što abodva tvorcy zasłuhoŭvajuć nazyvacca stvaralnikami i zakanadaŭcami stylu «ciažki rok», ludźmi, jakija naŭprost spryčynilisia da roskvitu «mietału» ŭ 80-yja hady.

Bolšaść pieśniaŭ Dya kruciacca vakoł zmahańnia Dabrom sa Licham, chacia jon sam ličycca adnym z najvialikšych papularyzataraŭ žestu «kaza» abo «šatanskich rahoŭ» — simvała ciažkaha, a ciapier i zvyčajnaha, roku. Chacia sam Dya ćvierdziŭ, što taki znak rabiła jahonaja babula suprać surokaŭ. Dya taksama prasoŭvaŭ tematyku Siaredniaviečča, jakaja hučała ŭ jaho pieśniach «Neon Knights» i «Killing The Dragon».

Dya mieŭ ułasnuju paśpiachovuju karjeru z adnajmiennym hurtam. Apošnija kolki hadoŭ svajoj dziejnaści Dya pryśviaciŭ kamandzie Heaven and Hell, jaki złučyŭ kolišnich udzielnikaŭ lehiendarnaha Black Sabbath. U minułym hodzie zbolšaha 60-hadovyja rokiery, pryhadaŭšy maładość, vypuścili paśpiachovuju kružełku The Devil We Know. Uvosień padčas čarhovaha turne z Heaven and Hell lekary vyjavili ŭ Dya rak straŭnika, i paśla paŭhadovaha zmahańnia, poŭnaha supiarečlivych paviedamleńniaŭ pra stan zdaroŭja, učora niadzielnym rankam u rakavym centry Łos-Andžielesa, Dijo pa słovach žonki, «cichamirna pajšoŭ u inšy śviet».

Hladzieć jašče: Dya sa svajoj viadomaj pieśniaj Holy Driver

• 0
• 0
• 0
• 0
• 0
• 0