Prastytucyja, piedafilija, pratesty. Prapahanda vypuściła siužet pra likvidavany fond dapamohi ankachvorym dzieciam «KinderVita»
Prapahandysty ANT hałasłoŭna pieraličvajuć abvinavačańni ŭ adras členaŭ Fonda — nažyvalisia na ankachvorych dzieciach, udzielničali ŭ prastytucyi, zaklikali da pratestaŭ. Ale nijakich faktaŭ i paćviardžeńniaŭ nie pryviali.
Uvieś siužet pakazvajuć videa ź niejkaha karparatyvu — akaličnaści jaho nie nazyvajucca. Ale na fonie pjanaj viečaryny, jakuju da spravy nie padšyć, hučać zusim inšyja ciažkija abvinavačańni.
«Uvieś hety pjany čad arhanizavany za košt achviaravańniaŭ, sabranych na lačeńnie dziaciej, chvorych na ankałohiju», — złaviesna kamientuje prapahandyst Andrej Alaksandraŭ.
«Ludzi, jakija, hledziačy na ankachvorych małych, hatovyja nabić kišeni na čužoj biadzie», — kaža jon.
Pavodle prapahandystaŭ, baćki chvorych dziaciej «stali pieršymi bić tryvohu». «Pačali zaŭvažać, što abiacańni dabračyncaŭ iduć urazrez z realnymi dziejańniami», — kaža prapahandyst, ale nie ŭdakładniaje, što mienavita zaŭvažyli baćki.
«Nam dapamahajuć. Ja prosta nie vieru, navat voś u toje, što jość takija vypadki. Zdajecca, što ludzi dobryja nie mohuć tak rabić», — havoryć maci, jakaja staić da kamiery śpinaj. Nijakich abvinavačańniaŭ u adras fonda jana nie havoryć.
Prapahandysty dali słovy kiraŭnictvu balnicy. Ina Pralaskoŭskaja, namieśnica dyrektara pa klinicy RNPC dziciačaj ankałohii, hiematałohii i imunałohii, kaža, što daviedałasia pra ŭsio sa ŚMI, i što va ŭstanovie byli «šakavanyja» infarmacyjaj ź miedyja.
Prapahandysty taksama pryjechali ŭ ofis užo zakrytaj arhanizacyi, «kab zadać paru pytańniaŭ». «Ale nam nichto nie adčyniŭ», — dzivicca prapahandyst i dadaje: «Kab nie tamić, skažam adrazu: šaraškinu kantoru prykryli».
Alaksandraŭ kaža, što «havorka nie prosta pra niametavaje vykarystańnie hrošaj, što byli atrymanyja ad spahadlivych biełarusaŭ. Vyśvietliłasia, što dyrektar ustanovy prachodziła fihurantkaj pa kryminalnaj spravie, źviazanaj z vyrabam i raspaŭsiudžvańniem parnahrafii».
Jakim čynam dyrektarka arhanizacyi Nadzieja Mancevič była źviazana sa spravaju — rabiła, raspaŭsiudžvała, była śviedkaj pa spravie — nie nazyvajecca. Na zasnavalnicu fonda prapahandysty sprabujuć vylić maksimum brudu. Jany śćviardžajuć, što kali raniej jana «fihuravała ŭ spravie ab parnahrafii», to ciapier «źviezła hrošy ŭ Polšču».
Prapahandysty nie mohuć uciamna davieści, u čym vinavaciać fond. Jany źmiašali ŭ kuču ŭsio — i adnapołyja suviazi, i zakliki ŭ 2020‑m da mitynhaŭ i zabastovak, i navat spakušeńnie niepaŭnaletnich pacyjentaŭ.
Siarod prapahandysckich vystupaŭ dali słova i siłaviku. Toj taksama nie pryvioŭ nijakaj kankretyki. Kamientujučy pasył prapahandystaŭ, što «finansavyja patoki «KinderVita» byli sapraŭdnaj karmuškaj dla supracoŭnikaŭ», Juryj Kardymon, namieśnik načalnika adździeła Departamienta finansavych rasśledavańniaŭ KDK Biełarusi, skazaŭ:
«Pry vyjaŭleńni nami padobnych faktaŭ jany buduć nieadkładna spyniacca, a dziejańniam usich asob, zadziejničanych u hetych schiemach, budzie dadziena pryncypovaja pravavaja acenka ŭ ramkach kryminalnaha zakanadaŭstva».
Fond «KinderVita» zakryli rašeńniem Hałoŭnaha ŭpraŭleńnie justycyi Minharvykankama 19 sakavika za «nieadpaviednaść dziejnaści ŭkazanaj ustanovy statutnym metam arhanizacyi».
Sama arhanizacyja, jakuju likvidavali jašče 19 sakavika, adkidvaje ŭsie abvinavačvańni. Tam padkreślivajuć, što kožny zbor byŭ publičnym, a spravazdačy — štotydniovymi i hadavymi.
«My staralisia, kab vy bačyli: dapamoha dachodzić pa pryznačeńni. My publikavali ličby pa kožnym zbory», — kažuć u fondzie.
Paśla taho, jak fond zapisaŭ videazvarot da Alaksandra Łukašenki z prośbaj admianić rašeńnie ab likvidacyi, na ich abrynułasia prapahanda ź ciažkimi abvinavačańniami i brudam.
Fond zasnavała ŭ 2019 hodzie Nadzieja Mancevič, u dziciaci jakoj znajšli ankałohiju.
Ułady patłumačyli, čamu likvidavali arhanizacyju «KinderVita», jakaja dapamahała dzieciam, chvorym na rak
«Nie zabirajcie ŭ dziaciej sa śmiarotnym dyjahnazam apošniaje!» Blizkija chvorych na rak dziaciej źviarnulisia da Łukašenki z prośbaj nie źniščać fond «KinderVita»
Likvidavali fond «KinderVita», jaki dapamahaŭ dzieciam z ankałahičnymi zachvorvańniami
Kamientary