Ci moža piedahoh vyhnać školnika z uroka, kali na jaho niama ŭpravy? U Ministerstvie adukacyi adkazali
Nastaŭnikam nazvali šeść dazvolenych mietadaŭ dyscyplinavańnia vučniaŭ, piša «Nastaŭnickaja hazieta».
Situacyja: na ŭroku dzicia drenna siabie pavodzić, zaminaje inšym. Ci maje nastaŭnik prava vystavić jaho za dźviery? U Ministerstvie adukacyi adkazali: nie, nie maje.
U viedamstvie spasłalisia na Kodeks ab adukacyi: kožny vučań maje prava na atrymańnie adukacyi, a taksama na pavahu da ich honaru i hodnaści i abaronu ad lubych form hvałtu.
Akramia taho, padčas navučalnaha pracesu pavinna zabiaśpiečvacca ich biaśpieka. Piedahohi abaviazany pracavać na prafiesijnym uzroŭni, vykonvać etyčnyja normy i pavažać vučniaŭ.
A jak karać parušalnika? U viedamstvie nazvali i dazvolenyja sposaby, i poŭnyja zabarony.
Što nielha rabić nastaŭniku ni pry jakich abstavinach?
Vyhaniać dzicia z uroka (nastaŭnik adkazvaje za jaho biaśpieku, pakul toj u škole).
Kryčać, abražać, prynižać.
Zabirać asabistyja rečy (telefon, navušniki).
Nie puskać u kłas praz spaźnieńnie abo adsutnaść formy.
A što možna?
Kali zaŭvahi nie pracujuć, u nastaŭnika jość zakonnyja instrumienty.
Zafiksavać parušeńnie — zrabić zapis u elektronnym abo papiarovym dziońniku, napisać dakładnuju na imia dyrektara abo zavuča.
Padklučyć baćkoŭ — adpravić im piśmovy zvarot, zaprasić na hutarku z kłasnym kiraŭnikom.
Paklikać školnych psichołahaŭ abo sacpiedahohaŭ.
Užyć dyscyplinarnyja miery — kali heta prapisana va ŭstavie škoły, vučniu mohuć abjavić zaŭvahu abo vymovu. Ale heta ŭžo praz administracyju, a nie asabista nastaŭnikam.
Źmianić padychod na ŭroku — pravieści nie nudnuju lekcyju, a hulniu, spabornictva abo sieminar, kab pieraklučyć uvahu kłasa.
Zrazumieć pryčynu drennych pavodzin — časam dapamahaje indyvidualnaja hutarka i pachvała za pośpiechi, a nie tolki pakarańni.
A kali ničoha nie dapamahaje? U krajnich vypadkach administracyja škoły pryciahvaje inśpiekcyju pa spravach niepaŭnaletnich i inšych śpiecyjalistaŭ.
Kamientary
Zastałosia jašče prapisać, što nastaŭnik taksama maje na ŭsio heta prava!