«Pastavili na ličylnik jašče ŭ turmie». Ihar Karniej raskazaŭ, čym skončyłasia historyja z sudovymi vykanaŭcami i štrafami

Sałdat śpić, słužba idzie. Chto z kolišnich słužyvych nie paŭtaraŭ papuhajem matyvacyjnuju aksijomu, jakaja niepaźbiežna nabližaje da dembiela). Ale padajecca, što niapisanym praviłam kirujucca nie tolki ŭ militarnych kołach, a i ŭ sudovaj vytvorčaści.

Adnojčy zavioŭ spravu i taja ŭžo sama piermanientna «pieraŭzbudžajecca».

Nie paśpieŭ rassłabicca paśla biespardonnaha vydvareńnia, jak na stračanaj baćkaŭščynie zavočna pačali atakavać z adździełu prymusovaha vykanańnia. Zrazumieła, što ŭ siłu fors-mažornych abstavin pisulki z pahrozami «podvierhnuť prinuditielnomu privodu» traplali na vočy nie tady, kali chaciełasia adpravicielu, a kali dobryja ludzi mieli mahčymaść vypatrašyć paštovuju skryniu. Što charakterna, u paviestkach anijakaha tłumačeńnia, za što im paśpieŭ zapazyčyć, apošnija hady nie zajmajučysia nijakaj dziejnaściu. Prosta X-Files, sakretnyja materyjały.

Sproby źviazacca z adkaznaj rabotnicaj viedamstva Kazłoŭskaj praz vajbier, jak prapanoŭvałasia ŭ papiercy, doŭhi čas zastavalisia marnymi.

Jak ni kruci, najmieniej chaciełasia być achviaraj dziaržaŭnaha rekietu. Hrošy nie fantastyčnyja, u apošniaj viersii krychu bolš za 250 rub, ale ž sam fakt! Bo tak u teoryi mohuć daić biaskonca.

Niadaŭna sudovaja vykanaŭca ŭsio ž adazvałasia, paraiŭšy šukać kancy ŭ adpaviednym rejestry niepłacielcaŭ na sajcie Miniusta. Jašče adna zasada, bo z-za miažy resurs niedastupny i treba ŭstaloŭvać VPN — nikoli b nie padumaŭ, što daviadziecca pahruzicca nižej vaterlinii, kab adrasna zrabić represiŭnaj ustanovie statystyku pa naviedvańniach.

Praŭda, ničoha ŭciamnaha ŭ rejestry daŭžnikoŭ tak i nie znajšoŭ — tolki kanstatacyja faktu ab pačatku čarhovaj vytvorčaści pad hruvastkaj abiaźličanaj numieracyjaj. Usio jak u kancłahiery, ličby na sercy.

Zatoje stała siurpryzam, što pastavili na ličylnik jašče ŭ aktyŭnaj fazie siadzieńnia! Što zaminała adrazu papiaredzić, kab svajaki apieratyŭna apłacili vystaŭlenyja rachunki? Abo pieršapačatkovaja meta mienavita takaja — vyvieści na pieniu? Daśviedčanyja i ŭžo ababranyja kažuć, što kožny hod da sumy pryrastaje 10%.

Dumaju, nie adnu sotniu vymušanych kalehaŭ, u jakich nie zastałosia inšaj alternatyvy, jak pamianiać kamieru ci atrad u Biełarusi na šełtary na čužynie, čakajuć anałahičnyja niespadziavanki.

№1. OPI Frunzienskoho rajona h. Minska. 20.06.2024 vozbuždieno proizvodstvo 70924032444.

18 červienia 2024‑ha mianie pierakinuli etapam z turmy №4 Mahilovu, dzie ja dva miesiacy čakaŭ apielacyi na prysud, dla adbyćcia pakarańnia ŭ PK №17 Škłovu. Atrymlivajecca, što litaralna na druhi dzień karantynu pačali niejkuju nastolki tajamničuju vytvorčaść, što daviałosia chavać jaje za naboram ličbaŭ. Prynamsi nijakich paviedamleńniaŭ pad podpis nie atrymlivaŭ.

№2. OPI Frunzienskoho rajona h. Minska. 02.10.2024 vozbuždieno proizvodstvo 70924051504.

Usio taja ž škłoŭskaja katavalnia, čaćviorty miesiac adzinočak u štrafnych izalatarach/pamiaškańniach kamiernaha typu. Na tym adrezku praktyčna poŭnaja infarmacyjna-dakumientalnaja błakada, bo suviazi sa źniešnim śvietam, uklučajučy navat štabnych chadakoŭ, abarvalisia padčystuju. Akurat u hetyja dni inśpiravałasia druhaja kryminalnaja sprava pavodle art. 411 za «niepadparadkavańnie».

№3. OPI Frunzienskoho rajona h. Minska. 25.06.2025 vozbuždieno proizvodstvo 70925031855.

Ličanyja dni paśla vystaŭleńnia z radzimy ź miecham na hałavie 21 červienia 2025-ha. A da taho, atrymaŭšy dadatkovyja 10 miesiacaŭ da terminu i takim čynam staŭšy recydyvistam, paśpieŭ pabyć «kałanistam» na strohim režymie ŭ Mazyry. Mienavita tam, trapiŭšy ŭ atrad paśla previentyŭnaha miesiaca ŭ šyza, absalutna vypadkova natknuŭsia na svajo proźvišča ŭ śpisie «daŭžnikoŭ» — 190 rub za robu, atrymanuju ŭ škłoŭskim «atelje». Nie ŭpeŭnieny, ale mahčyma hetaja suma z ulikam 10‑pracentnych štohadovych nakrutak, i pieratvaryłasia ŭrešcie ŭ vystaŭlenuju finalnuju. Vo jak, kožny musić samastojna zdahadacca, za što jaho raskułačvajuć).

№4. OPI Frunzienskoho rajona h. Minska. 13.03.2026, vozbuždieno proizvodstvo 70926012280.

Čarhovaja papierka, zasunutaja ŭ dźviery pakinutaj mienskaj kvatery, patrabavała piersanalnaj prysutnaści ŭ sudovaj vykanaŭcy Kazłoŭskaj 18 sakavika. Pierad tym nastojlivaja słužaka pačała čaćviortuju vytvorčaść pa Ch-fajłach.

Mahu pavinšavać apanientku, svajho damahłasia: adkupiŭsia. Dakładniej, zapłaciła sa svaich ścipłych prybytkaŭ maci-piensijanierka — voś tak zapuskajuć u finansavy abarot svajakoŭ, kali nie mohuć dabracca da samich fihurantaŭ. Mała taho, što traciłasia padčas synavaj adsidki, dyk jašče musić brać postfaktum niezrazumiełyja vydatki. Bo za kamisarami nie zaržavieje — spačatku nakłaści aryšt na majomaść, a śledam imiem revalucyi i kanfiskavać.

Kaniešnie, nieviadoma, ci nadoŭha pakinuć u spakoi rekieciry, bo ŭ adkaz na jaŭna pračytanaje vajbieraŭskaje paviedamleńnie ab apłacie — zvykłaja cišynia. Dumaj, što chočaš…

• 0
• 0
• 0
• 0
• 0
• 0
• 6
• 0