Łukašenka zahadaŭ viarnuć u abarot čarnobylskija ziemli, «čaho b ni kaštavała»
«Treba viarnucca da tych ziamiel, jakija ŭ nas byli ŭ savieckija časy». Alaksandr Łukašenka patrabuje viarnuć u sielhasabarot atručanyja Čarnobylem ziemli.
Padčas naviedvańnia Naraŭlanskaha rajona razmova zajšła pra pavieličeńnie płoščaŭ za košt viartańnia ŭ sielhasabarot ziamiel, jakija paciarpieli paśla avaryi na Čarnobylskaj AES. Pa ŭsioj Homielskaj vobłaści za hod takim čynam prybaviłasia 1,3 tys. ha.
«Treba adradžać hetyja ziemli. Čaho b nam ni kaštavała — treba viarnucca da tych ziamiel, jakija ŭ nas byli ŭ savieckija časy. I my možam heta zrabić», — skazaŭ Łukašenka.
U vyniku katastrofy na Čarnobylskaj AES 23% terytoryi Biełarusi było zabrudžana radyjenuklidami, u tym liku 1,8 młn ha sielskahaspadarčych ziemlaŭ. Adnoj ź pieršych efiektyŭnych achoŭnych mier u pieraadoleńni nastupstvaŭ katastrofy stała abmiežavańnie haspadarčaha vykarystańnia ziamiel. Bolš za 265 tys. ha ziamielnych učastkaŭ było vyklučana ź sielskahaspadarčaha abarotu i adniesiena da radyjacyjna niebiaśpiečnych ziamiel.
Navukoŭcy miarkujuć, što čarnobylskaja zona zmoža stać całkam biaśpiečnaj tolki praz 10 tysiač hadoŭ, chacia fon u zonie zabrudžvańnia značna palepšycca ŭžo praz 300 hadoŭ, kali adbudziecca paŭraspad stroncyja-90 i cezija-137.
Kamientary