«Umovy amal kazačnyja». Prahramist nie znajšoŭ pracu i pajechaŭ u Maskvu (pakul rasijanie marać pra Minsk)
«Vakansii ŭ zachodnich kampanijach ja nie vyvučaŭ — padumałasia, što ŭ Rasii biełarusu praściej lehalizavacca».
Kab pačać karjeru praduktovaha analityka ŭ IT, Maćviej u pačatku hoda pierajechaŭ ź Minska ŭ Maskvu — na radzimie vakansij dla jaho paprostu nie było, piša Devby.io.
«Padumałasia, što ŭ Rasii biełarusu praściej lehalizavacca»
— U Biełarusi ja pracavaŭ u dziaržbanku — uładkavaŭsia tudy paśla ŭniviera, ale niedzie praz hod zrazumieŭ, što tam niama mahčymaściaŭ dla rostu.
U mianie byli dobryja zadatki dla pracy ŭ praduktovym analizie, — i mnie było cikava raźvivacca ŭ hetym kirunku. Tamu ja pačaŭ šukać inšuju pracu — spačatku ŭ Minsku.
Na žal, adkrytych pazicyj było vielmi mała, i, jak vyśvietliłasia, mnie, čałavieku biez relevantnaha dośviedu, nie śviaciła trapić ni na adnu ź ich — usiudy patrabavali ludziej z praktyčnaj ekśpiertyzaj.
Tady ja pačaŭ hladzieć vakansii ŭ Rasii — u bihtekach. Prajšoŭ niekalki surazmoŭjaŭ na pačatkovyja pazicyi, — i znajšoŭ toje, što chacieŭ: u nas adrazu zdaryŭsia metč z kamandaj, i pradukt byŭ mnie vielmi cikavy. Da taho ž heta topavaja kampanija i ŭmovy amal kazačnyja:
- poŭny rełakacyjny pakiet — prajezd, hatel na pieršy čas, ryełtar dla dapamohi z pošukam žylla, «padjomnyja»;
- vydatnaja miedstrachoŭka;
- zarobak mianie całkam zadavalniaje;
- nu i ježa ŭ ofisie (sam ofis taksama dobry).
Vakansii ŭ zachodnich kampanijach ja nie vyvučaŭ — padumałasia, što ŭ Rasii biełarusu praściej lehalizavacca, čym u krainach EC, dzie paśla 2022 hoda da nas staviacca z naściarožanaściu.
«Pradukt vydatny, kalehi ŭsie prafiesijanały»
Uvohule rašeńnie pra pierajezd dałosia lohka — nie na Mars ža źjazdžaŭ, da domu jakich-niebudź 700+ km, samaloty lotajuć, ciahniki chodziać.
Praca padabajecca — pradukt vydatny, kalehi ŭsie prafiesijanały.
Na pieršyja dva tydni mnie źniali numar u hateli (dali śpis — vybar vielmi dobry, skardzicca niama na što!). Jašče pradastavili ryełtara dla pošukaŭ kvatery — vielmi zručna! U vyniku my znajšli kvateru-studyju na 26 «kvadrataŭ».
Kampanija apłaciła pieršy miesiac arendy i kamisii. Z usimi płaciažami pa ličylnikach vychodzić 50 tysiač rasijskich rubloŭ (prykładna 635 dalaraŭ pa kursie) — ciarpima, ale ŭ mianie i rajon nie premijalny.
A ź inšaha boku, heta amal čverć zarobku. Na hetyja ž hrošy ŭ Minsku ja b moh źniać adnušku mary dzie-niebudź na Hrušaŭcy.
Maskva ŭ cełym bahaty pa zrazumiełych pryčynach horad. Kali paraŭnoŭvać ź Minskam, to nie taki ŭtulny, i ludzi na vulicach niejkija mienš pryjemnyja, ale jość pryhožyja miescy ŭ centry horada, u jakich cudoŭna hulać.
U płanie pobytu adroźnieńniaŭ nie vielmi šmat. Tak, treba było pryvyknuć da novaj valuty. Ź minusaŭ — internet-resursy tolki praz VPN, darahoje žyllo, jakoje jašče i znachodzicca daloka ad pracy. U adzin bok dabiracca — hadzina. Ale jość i plusy: dobryja siervisy dastaŭki i akazańnia pasłuh pa adnosna prymalnych cenach.
Ci možna pracavać ź Minska? Možna, hałoŭnaje dobra pierformić. I tak, spakusa viarnucca na radzimu nie adpuskaje mianie (pracavać ź Minska možna). Što ŭtrymlivaje — dobryja bieniefity, plus cikava prosta pažyć u miehapolisie. Akramia taho, u «kadry» treba pradastaŭlać časovuju rehistracyju ŭ Maskvie, dla hetaha nieabchodna dzieś štoś zdymać i vydavać hrošy ŭ lubym vypadku.
Kali budzie važkaja pryčyna — vielmi chutka viarnusia nazad.
«Ja ŭśviedamlaju, na što iduć maje padatki. Starajusia hladzieć na heta ŭ doŭhaterminovaj pierśpiektyvie»
Pra maralny bok pracy na Rasiju: ja ŭśviedamlaju, na što iduć maje padatki.
Tak, heta nieetyčna — ale ja starajusia hladzieć na heta ŭ doŭhaterminovaj pierśpiektyvie: heta važnaja składajučaja majho prafiesijnaha stanaŭleńnia, i ŭ płanie dośviedu ja atrymlivaju vielmi šmat. U budučyni ja zmahu puścić jaho na karyść užo majoj krainy, unosiačy ŭkład u ekanomiku i prafiesijnuju kulturu.
Da vajny i dziaržavy, jakaja jaje raźviazała (chaj ja navat u joj žyvu i pracuju), ja staŭlusia niehatyŭna — i pracavać by na dziaržstruktury dakładna nie staŭ: heta navat horš čym na bukmiekierskija kantory. I tamu mianie raduje, što naš pradukt čysta cyvilny.
Sama vajna niapraviednaja, jak i bolšaść vojnaŭ, raźviazanych Rasijaj (užo kamu jak biełarusam nie viedać). Kali ščyra, mnie strašna ad dumki, što ŭ jaje mohuć paŭnavartasna ŭciahnuć i maju krainu.
Choć sama vajna i daloka, ale zaŭsiody navidavoku: samaje banalnaje — heta stały viarboŭščykaŭ na ŭvachodzie ŭ mietro. Niepryjemna bačyć ich kožny dzień. Što chvaluje jašče bolš — naviny ź Biełarusi: «iduć vučeńni», «pryzyvajuć z zapasu»… Ja nie chaču pralivać kroŭ nieviadoma za što — tak što maralna hatovy pierarełacyravacca ŭ luby momant, z pracaj dystancyjna na svaju ž kampaniju raźbiarusia. Adnak pakul Biełaruś paŭnavartasna nie ŭciahnutaja ŭ vajnu, splu bolš-mienš spakojna.
«Ofisnyja «pluški» — nie tolki stałovyja, ale taksama vendamaty i kramy pobač z ofisam»
U cełym u ofis u nas u kampanii možna chadzić pa žadańni — niekatorych kaleh ja tydniami nie baču ŭžyvuju. Ale ja prychilnik ofisnaha farmatu pracy. U ofis jezdžu štodzionna — nie tolki kab raźmiežavać svoj pracoŭny i asabisty čas, ale i praz «pluški». Starajusia pryjazdžać raniej, kab trymać režym dnia (heta reč tonkaja!), u ofisie pravodžu 8‑9 hadzin.
U ofisnyja «pluški» uvachodzić charčavańnie na peŭnuju sumu ŭ dzień — nie tolki ŭ stałovych (u nas ich niekalki), ale taksama pakupki ŭ vendamatach i kramach pobač z ofisam, a ŭ samim ofisie šmat biaspłatnych pačastunkaŭ typu piačeńnia i sadaviny kožny dzień.
Jość spartzała i inšyja zony dla zabaŭ — biljard, płojki, kibierzona z kampjutarami, masažyst. Jašče psichołah i terapieŭt — kali raptam spatrebiacca.
Na vychodnych jezdžu hulać u biljard (znoŭ ža ŭ ofis!) i hulaju pa novych miescach. Starajusia kožnyja vychodnyja chadzić u novy muziej, manastyr ci carkvu.
Plus z taho času, jak ja atrymaŭ strachoŭku, aktyŭna zajmajusia svaim zdaroŭjem i matajusia pa daktarach u vychodnyja — u budni heta rabić vielmi lanota.
«U Biełarusi ŭ mianie było adčuvańnie miežaŭ, a ŭ Rasii mnie strašna daloka zachodzić u razmovach»
Z suviaźziu i internetam usio, viadoma, drenna.
Kali treba dostup da jakich resursaŭ, što cikaviać mianie — pakul ratuje VPN. Telehram, Instagram, Youtube — usio jość, usio hladžu. I kali nie budzie prama čeburnetu ź biełymi śpisami i inšaj łuchtoj, to tak, napeŭna, i zastaniecca. Šancy na čeburnet ja aceńvaju niedzie ŭ 10% u hetym hodzie. Va ŭładaroŭ taksama jość žonki i dzieci — dzie ž im pościć fotki z umoŭnaj Nicy?
U nas u kampanii dla ŭnutranych kamunikacyj vykarystoŭvajecca telehram — i ŭ cełym pracuje narmalna ŭ ofisie i praz karparatyŭny VPN. Adzinaje, što moža pieraškodzić, — heta kali ty nie za noŭtam, prychodzicca ŭklučać VPN na telefonie, kab štoś pračytać ci adkazać. MAX ustanaŭlivać nichto nie prymušaje — i razmoŭ takich pakul taksama niama. I tak, na ŭsialaki vypadak u kampanii jość jašče ŭnutrany miesiendžar.
U suviazi z usioj hetaj situacyjaj maje kalehi ŭžo paŭžartam-paŭsurjozna havorać pra pierajezd u Biełaruś (u cełym cikava nazirać, jak mała rasijanam treba dla svabody: Zara + Instagram i ŭsio, užo ličy, jak u Šviejcaryi). Ja namahajusia paźbiahać hetaj temy, kab nie lapnuć lišniaha, paśla čaho pryjdziecca havaryć z kadrami.
Nie, u cełym, u nas dobraja kamanda — možna vieści razmovy i žartavać na lubyja temy. Pytańnie ŭ tym, nakolki daloka možna zajści.
U Biełarusi ŭ mianie było adčuvańnie niejkich bolš-mienš akreślenych miežaŭ na lubuju temu, a ŭ Rasii, kali ščyra, mnie pakul strašna zanadta daloka zachodzić u razmovach na palityčnyja temy. U Biełarusi možna ŭsio zrazumieć pra pohlady čałavieka paśla chviliny razmovy. Tut vielmi adčuvajecca, što ludzi mientalna ad nas adroźnivajucca, ja ich nie zusim razumieju. Tamu i nie lezu ź lišnimi razmovami.
Pa adčuvańniach, kalehi ŭ asnoŭnaj svajoj masie prytrymlivajucca pryncypu: «car — dobry, bajary — drennyja». Ale jość i tyja, chto jaŭna suprać vajny, choć ich i niašmat. Adbitych zetnikaŭ niama ŭvohule — i heta raduje. Choć hetuju temu abmiarkoŭvać na pracy nie pryniata: praciŭniki bajacca, a prychilniki nie chočuć, bo pachvalicca im asabliva niama čym.
«Mnie zdajecca, toje, što ja pracavaŭ na rasijskuju kampaniju, budzie nie samym krytyčnym faktaram»
Ja raźličvaju jašče 3‑4 hady pravieści pa takim scenaryi, kali žyćcio budzie prymalnym. A ŭ budučyni chaciełasia b pierajechać u Minsk i pracavać na zamiežnuju kampaniju ci biełaruskuju, ale takuju, što nie sastupić zamiežnikam pa zarobku.
Tak, było b kłasna vykarystoŭvać atrymany dośvied mienavita ŭ niejkim krutym biełaruskim pradukcie. Ale pakul, na žal, nie baču pieradumoŭ dla jakich-niebudź značnych palapšeńniaŭ u IT-halinie ŭ Biełarusi.
Mnie zdajecca, toje, što ja pracavaŭ na rasijskuju kampaniju, budzie nie samym krytyčnym faktaram — da hetaha mnohija staviacca niejtralna. Prynamsi, mnie chočacca vieryć, što budučamu pracadaŭcu budzie bolš cikavy sam pradukt, nad jakim my pracavali, i maja rola ŭ im.
Inšyja biełarusy ŭ kampanii jość. Ich nie vielmi šmat, ale ź dziasiatak nabiarecca — z tych, pra kaho ja čuŭ. Asablivaha staŭleńnia z boku kaleh ja da siabie nie adčuvaju, i toje, što ja ź Biełarusi, nijak nie adbivajecca na našym uzajemadziejańni.
Kamientary