Iryna Łazoŭskaja hod čakaje sudu ŭ SIZA

Zasnavalnica pieršaj u Biełarusi kramy Hugo Boss praciahvaje siadzieć na Vaładarcy. Jaje abvinavačvajuć u ekanamičnym machlarstvie, joj pahražaje ad 5 da 10 hadoŭ źniavoleńnia. Śviedkam vystupaje jaje były muž Aleś Suša.

Uładalnicu mienskaj kramy «Kamiła», byłuju supracoŭnicu hazety «Naviny BNF» dy radyjo «Svaboda» Irynu Łazoŭskuju zatrymali 18 kastryčnika 2005 hodu pa padazreńni ŭ ekanamičnym machlarstvie. Była zaviedzienaja kryminalnaja sprava.

Z momantu zatrymańnia I.Łazoŭskaja ŭtrymlivajecca ŭ SIZA na vuł.Vaładarskaha. Svajoj viny jana nie pryznaje. Razam ź Irynaj pa spravie ŭ jakaści abvinavačanaha prachodzić jaje brat Alaksandar. Im zakidajuć prysabiečvańnie majomaści, padrobku, vyrab, vykarystańnie albo zbyt padroblenych dakumentaŭ, štampaŭ, piačatak, blankaŭ. Dziejańni padazravanych kvalifikujucca jak machlarstva, ździejśnienaje ŭ asabliva bujnych pamierach. Akramia taho, Łazoŭskich vinavaciać va ŭtojvańni padatkaŭ. Irynie Łazoŭskaj, kali sud pryznaje jaje vinavataj pavodle pradjaŭlenych abvinavačańniem artykułaŭ, pahražaje ad 5 da 10 hod źniavoleńnia.

Pavodle versii śledztva, mienskija kramy Hugo Boss i Escada byli pabudavanyja supolna kanadzkaj, amerykanskaj i finskaj kampanijami. Kanadzkuju kampaniju pravaachoŭnyja orhany paličyli afšornaj, stvoranaj na padstaŭnych asobaŭ. Faktyčnymi ž ułaśnikami ličać Łazoŭskich. Dyrektar finskaj kampanii źviarnuŭsia ŭ pravaachoŭnyja orhany z pretenzijaj da biełaruskich partneraŭ, źvinavaciŭšy tych u prysabiečvańni supolnaj majomaści.

Sa słovaŭ advakata I.Łazoŭskaj Ihara Susłava, na siońniašni momant sprava pierapynienaja – viadziecca sudovaja ekspertyza, raspačataja kala miesiaca tamu. «Mahčyma, sud adbudziecca ŭ bližejšy čas», – kaža sp.Susłaŭ.

Vyklikaje cikavaść toj fakt, što adnym z hałoŭnych śviedkaŭ vystupaje jaje były muž Aleś Suša, ź jakim Iryna razyšłasia čatyry hady tamu i padzialiła biznes.

Na dumku svajakoŭ Łazoŭskaj, biznesoŭku mahli paprostu padstavić: «Jaje vinavaciać, akramia ŭsiaho, u kradziažy majomaści svajoj ža kramy. Heta nahadvaje kamputary Maryniča». Chodziać čutki, što kamuści sa staličnych čynoŭnikaŭ hlanułasia prestyžnaja handlovaja płošča ŭ samym centry Miensku. Na pasiedžańniach sudu Iryna Łazoŭskaja vyhladaje błaha – zmučanaja, zapłakanaja.

Sprava Iryny Łazoŭskaj vyklikaje šmat pytańniaŭ i naradžaje niejmaviernyja čutki. Tak, ab pryčynie prypynieńnia sudu na čas ekspertyzy platkarać, što hetamu paspryjała adna ŭpłyvovaja ŭ niedalokim minułym čynoŭnica, jakuju samu ad turmy ŭratavaŭ jaje były načalnik.

• 0
• 0
• 0
• 0
• 0
• 0
• 0
• 0