Viktar Babaryka dumaŭ stvaryć bank dla emihrantaŭ — ale voś čamu admoviŭsia ad hetaj idei

U byłoha palitviaźnia i bankira na sustrečy spytali, ci nie choča jon raspracavać prahramu ekanamičnaha raźvićcia Biełarusi ci navat stvaryć niejkaje padabienstva kabinieta ministraŭ u vyhnańni.

Viktar Babaryka pryznaŭsia, što nie bačyć sensu ŭ hetym. Maŭlaŭ, imavierna, sprava vysakarodnaja. Ale sam jon nie zajmajecca prajektami na vielmi addalenuju pierśpiektyvu.

Toje, što jon płanuje rabić, hučyć u prostym łozunhu: «Kali nie možaš vyratavać krainu — ratuj ludziej. Kali nie možaš dapamahčy krainie — dapamahaj ludziam». Taki padychod jamu bližejšy.

Zaraz Babaryka znachodzicca ŭ pošuku pracy, bo ličyć: kab pracavać u palityčnym poli, nieabchodna mieć niejki zarobak — i tolki tady čałaviek budzie pracavać biez dumak ab ułasnaj vyhadzie.

«Ja, kali vyjšaŭ, skazaŭ, što bankaŭskaja śfiera dla mianie zakrytaja. Bo ja ŭpeŭnieny: nielha ŭbudavacca ŭ sistemu, jakaja dla ciabie čužaja. Ja byŭ mieniedžaram u biełaruskaj bankaŭskaj sistemie, napeŭna, byŭ by cikavy ŭ rasijskaj. Ale naŭrad ci ja byŭ by cikavy ŭ niamieckaj. Tamu što ja prosta jaje nie viedaju — tam zusim inšyja pryncypy. Tamu ja prosta vykraśliŭ bankaŭskuju śfieru sa śpisu maich prafiesijnych intaresaŭ».

Ale adnojčy razmova zajšła ab tym, što ŭ biełarusaŭ chapaje prablem z bankami: ad adkryćcia rachunkaŭ da finansavańnia małoha i siaredniaha biznesu. Prahučała ideja, što Babaryka, ź jaho viedami, moh by pasprabavać zrabić bank emihrantaŭ.

«Ja niejak paśmichnuŭsia, ale padumaŭ, što, imavierna, tema moža być cikavaj. Ale tut mnie skazali mahičnaje słova — JEBRR (Jeŭrapiejski bank rekanstrukcyi i raźvićcia). A my, jak Biełhazprambank, byli samym bujnym jaho partnioram. I raptam u mianie źjaviłasia dumka: u JEBRR źviarnulisia amal što ŭsie asnoŭnyja prahramy. Im bank emihrantaŭ dla raźvićcia małoha i siaredniaha biznesu moh by być cikavy».

Viktar Babaryka patelefanavaŭ tudy i spytaŭ, dzie ž JEBRR zaraz pracuje. Vyśvietliłasia, što bank nie pracuje va Uschodniaj Jeŭropie — syšoŭ u Afryku.

«Ja kažu: «A fandavańnie ŭ Polščy možna zrabić?». Jany adkazvajuć: «U Polščy — zrobim. U Hiermanii nie zrobim, a ŭ Polščy možam». I ja raptam padumaŭ: kali jeŭrapiejski bank budzie partnioram, ideja maje prava na isnavańnie. Ja ŭvaskres: značyć, treba zajmacca».

Ale potym jon sustreŭ ludziej, jakija zajmajucca fintecham, i kali pačaŭ im raspaviadać, jak bačyć novy bank, vyśvietliłasia, što sensu ŭsio ž niama.

«Naprykancy 2010‑ch hadoŭ Biełhazprambank ahučyŭ łozunh: «My zabjom usie banki i zastrelimsia apošnimi». Jon, akazvajecca, pravilny. Tamu rabić bank, jaki adnaznačna adrazu treba zastrelić, — sensu niama nijakaha. I zaraz jakraz abmiarkoŭvajecca sistema vybudoŭvańnia inšych pryncypaŭ farmavańnia finansavaha instytuta i vyrašeńnia prablem u miežach finansavych instytutaŭ pa-za miežami tradycyjnaha bankaŭskaha biznesu. I tamu sama ideja banka niapravilnaja — u mianie jość adčuvańnie, što ciaham 5 hadoŭ banki ŭsie zastrelać».

Tamu tym, chto kazaŭ Babaryku pra stvareńnia banka dla emihrantaŭ, toj paraiŭ stvaryć kasu ŭzajemadapamohi.

• 2
• 0
• 3
• 1
• 0
• 2
• 0
• 0