U zakrytaj spravazdačy analitykaŭ Śbierbanka vierahodnaść pieramohi Rasii ŭ vajnie suprać Ukrainy acanili na 7%
Chakiery z Black Mirror apublikavali ŭnutrany dakumient banka.
Analityki Śbierbanka acanili vierahodnaść pieramohi Rasii vajnie suprać Ukrainy na 7%. Chakiery z Black Mirror apublikavali ŭnutrany dakumient banka, piša The Insider.
Chakierskaja hrupoŭka Black Mirror apublikavała analityčnuju zapisku Śbierbanka, u jakoj apisvajucca roznyja scenary zakančeńnia vajny va Ukrainie i aceńvajecca vierahodnaść ich realizacyi. Dakumient pad nazvaj «Scenary dasiahnieńnia miru ŭ kanflikcie Rasija — Ukraina» datavany krasavikom 2026 hoda.
Jak śćviardžaje Black Mirror, zapiska była atrymana ź pierapiski kiraŭnika Śbierbanka Hiermana Hrefa (jon vystupaŭ adpraŭnikom).
Va ŭstupnaj častcy zapiski pieraličvajucca ekanamičnyja ciažkaści, ź jakimi sutyknułasia Rasija na fonie vajny (usie pryviedzienyja danyja — pa stanie na krasavik): ad deficytu biudžetu (4,58 trłn rasijskich rubloŭ (53 młrd dalaraŭ)) za pieršy kvartał pry hadavym płanie na 3,8 trłn rasijskich rubloŭ (45 młrd dalaraŭ) i vysokaj klučavoj staŭki (15%), jakaja «dušyć hramadzianski siektar», da padzieńnia naftahazavych dachodaŭ (na 45,4% — da 1,44 trłn rubloŭ) i vyvadu sa stroju naftapierapracoŭčych pradpryjemstvaŭ u vyniku sistematyčnych udaraŭ USU (paškodžana 10—15% naftapierapracoŭčych mahutnaściaŭ).
«Urad razhladaje pavieličeńnie deficytu i vajennych vydatkaŭ. Vajenny multyplikatar aceńvajecca ŭ 1,5× — kožny rubiel vajennych vydatkaŭ hienieruje 1,5 rubla VUP, ale za košt vyciaśnieńnia hramadzianskaha siektara».
U dakumiencie taksama adznačajecca, što ŭ Rasii stračana «da 35% kampanientaŭ sistem SPA», pry hetym papaŭnieńnie ZRK S-300/400 adbyvajecca pavolniej za straty. «Biez adnaŭleńnia kupała SPA nad tyłavymi abjektami ŭdary buduć uzmacniacca».
«Deficyt rabočych ruk na abaronnych pradpryjemstvach: 80—400 tysiač čałaviek. Vytvorčaść bojeprypasaŭ upieršyniu pakazała spad u vieraśni 2025 hoda. Try krytyčnyja deficyty: mikraelektronika (biez zachodnich kampanientaŭ vysokadakładnaja zbroja daražeje ŭ razy), bojeprypasy (limitny faktar — ludzi, a nie hrošy), ruchaviki (avijacyjnyja, rakietnyja, karabielnyja — usie pierahružanyja)».
U dakumiencie pryvodzicca acenka vajennych strat Rasii: 20—25 tysiač čałaviek na miesiac. «90% novych kantraktnikaŭ iduć na papaŭnieńnie, a nie na farmavańnie novych častak», — havorycca ŭ natatcy. Adnak adznačajecca, što poŭnamaštabnaj mabilizacyi ŭ płanach niama, pakolki «palityčnaja ryzyka nieprymalnaja».
Kamientary