«Ekanamičnaj pastkaj» nazyvaje Mytny sajuz lider Narodnaha Frontu.
Tak zvany «mytny źviaz» Biełarusi, Rasiei i Kazachstana, — heta «mahilnaja jama», ekanamičnaja pastka, padrychtavanaja heboŭskaj Rasiejaj dla zadušeńnia Biełarusi, bo ekanamičnaj patreby ŭ hetakim źviazie niama.
Adnak lahičnym stvaralnikam pastki jość sama ŭłada ŭ Biełarusi, jakaja admoviłasia ad nacyjanalnych intaresaŭ i, łamajučy zakony dy prava, zahnała amal uvieś handal krainy ŭ Rasieju, a ekanomiku pryviazała da rasiejskaha spažyŭca. Heta złačynstva, jakoje zrabiła cełuju nacyju zakładnikam imperskaj Maskvy, i taja stała šantažavać Biełaruś, cynična patrabujučy zabrać našu terytoryju i ekanomiku — biez vajny, — manipulujučy zaležnaściu ad rasiejskich enerharesursaŭ (pucinskaje patrabavańnie dałučyć šeść vobłaściaŭ Biełarusi da Rasiei; 2002-2003 hh.).
Ale navat paśla hetaha (pry maŭčańni hramadztva) aficyjny Miensk praciahvaŭ hulacca z Rasiejaj u «intehracyju» i «dvuchbakovyja adnosiny», nia robiačy nijakich vysnovaŭ.
Vysnovy zrabiŭ Kreml. Zamiest «mytnaha sajuzu dvuch» (zaklučanaha pamiž Rasiejaj i Łukašenkam) padrychtavali plan «ekanamičnaj prastory» i «mytnaha sajuzu» traich. Z hetych traich dva subjekty jość resursnyja krainy, ekanomika jakich pabudavana na pradažy enerharesursaŭ (u asnoŭnym, nafty i hazu). Biełaruś ža — vytvorčaja kraina, ekanomika jaje sfarmavanaja na vytvorčaści tavaraŭ, ad pradažy jakich jana kuplaje enerharesursy.
Dla krainy z ekanomikaj takoha typu, jak u Biełarusi, vielmi važnym jość zamiežny rynak i «dyviersifikacyja» rynku, a taksama dyviersifikacyja nabyćcia enerharesursaŭ.
Ekanomika takoha kštałtu bolš pieradavaja i mabilnaja, jana chutčej raźvivajecca i adnaŭlajecca, zabiaśpiečvaje bolš vysoki technalahičny i spažyviecki ŭzrovień hramadztva. (Tut ja razhladaju strukturny pryncyp, ale nia toje, jak vykarystoŭvaje jaho antybiełaruski režym.)
Usio heta my, deputaty Apazycyi BNF u Viarchoŭnym Saviecie 12-ha sklikańnia, uličyli jašče ŭ 90-ch, planujučy raźvićcio našaj niezaležnaj dziaržavy.Praz 8-10 hadoŭ reformaŭ i adpaviednaha nacyjanalnaha raźvićcia na toj vytvorčaj bazie, jakaja była ŭ 90-m, Biełaruś stała b mahutnym ekanamičnym drakonam u centry Eŭropy.
Da takich ža vysnovaŭ u pačatku 90-ch hadoŭ pryjšli rasiejskija ekanamičnyja analityki, zhurtavanyja vakoł Jahora Hajdara (na toj čas — premjer-ministra Rasiei). Palityčnyja i ekanamičnyja vysnovy suprać Biełarusi (hetaj «niebiaśpieki dla Rasiei») byli zroblenyja vielmi žorstkija. Pavodle rasiejcaŭ, drakon nie pavinien byŭ źjavicca. Dziejańni Maskvy ŭ toj čas viadomyja. Nia budu ich pierakazvać. Zaznaču tolki, što mienavita ŭ rečyščy hetaj antybiełaruskaj palityki Kramla byŭ adšukany i padtrymany Łukašenka. Ale Kreml tak i nie zachapiŭ Biełaruś, bo, niečakana dla siabie, naparoŭsia na supraciŭ biełarusaŭ i na patalahičnuju prahu da aŭtarytarnaj ułady.
Amal 16 hadoŭ našaje hramadztva naziraje ambivalentnyja performensy z Maskvoj, dzie maskoŭskaja palityka ŭ dačynieńni da Biełarusi nazyvajecca niaščyraj, zachopnickaj, «imperskaj» i adnačasna praciahvajecca ŭnutranaja pramaskoŭskaja palityka vyniščeńnia ŭsiaho biełaruskaha.
Dla neŭtralizacyi ambivalentnaha kiraŭnika i realnaha zabrańnia biełaruskaj ekanomiki Maskva i zaklučyła (faktyčna) palityčny sajuz z Nazarbajevym. Ciapier udvuch stanuć dušyć adnaho, dzie biełarusy buduć znoŭ nazirać spektakl u jakaści zakładnikaŭ (pakul ich usich nie zdaduć u maskoŭskaje rabstva).
Pa pryrodzie svajoj ekanomiki Biełaruś u pryncypie nia moža ŭdzielničać u takim «mytnym sajuzie». Heta mahiła, padrychtavanaja specyjalna dla jaje Rasiejaj, kab farmalna abhruntavać i apraŭdać svaje ahresiŭnyja dziejańni. Dakładniej, heta jość ekanamičnaja ahresija ŭ prydumanaj formie, dziela razbureńnia ekanomiki susiedniaj dziaržavy.
Pierš za ŭsio, heta vyjaŭlajecca ŭ tym, što dźvie krainy, eksparciory nafty, ustanaŭlivajuć vysokija pošliny na naftu treciaj krainie «mytnaha źviazu» — Biełarusi, jakaja źjaŭlajecca spažyŭcom nafty. Hetyja pošliny dvuch naftavych manapalistaŭ niepadjomnyja ciapier dla ekanomiki Biełarusi. Kali ž Biełaruś nia ŭstupić u mytnuju mahiłu, jana zachavaje perspektyvy svajoj ekanomiki i suvierenitet, ale tady «mytny źviaz» uviadzie vysokija pošliny na ŭsie tavary, jakija Biełaruś pastaŭlaje ŭ Rasieju (paŭtaraju, da jakoj Łukašenka pryviazaŭ našu krainu). Heta budzie zroblena adrazu i stanie śmiartelnym udaram pa biełaruskaj ekanomicy.
Z boku Maskvy — heta razboj, hrubaje parušeńnie punktu 3-ha Memaranduma ab harantyjach biaśpieki dla Biełarusi u zamien za admaŭleńnie našaj krainy ad jadziernaj zbroi.Nahadaju, Memarandum padpisany Biełarusiaj, ZŠA, Vialikabrytanijaj i Rasiejaj 5-6 śniežnia 1994 hoda ŭ Budapešcie na 52-m Samicie kanferencyi ABSE. Punkt 3-ci napisany tak: «ZŠA, RF i Złučanaje Karaleŭstva paćviardžajuć ichnija abaviazacielstvy da Respubliki Biełaruś u adpaviednaści z Pryncypami Zaklučnaha Aktu ABSE nie prybiahać da ekanamičnaha cisku z metaj padparadkavać svaim intaresam vykarystańnie Respublikaj Biełaruś jaje pravoŭ, nieadjemnych ad jaje suvierenitetu, a taksama nie zabiaśpiečvać sabie pieravahi jakoha-kolvičy kštałtu».
Prytym, zhodna Memarandumu, krainy-padpisanty ŭziali na siabie abaviazacielstvy być harantami biaśpieki niezaležnaści Biełarusi. Punkt 6-y zapisany hetak: «ZŠA, RF i Złučanaje Karaleŭstva buduć pravodzić kansultacyi ŭ vypadku, kali ŭźniknie sytuacyja, jakaja pastavić pytańni adnosna hetych abaviazacielstvaŭ».
Sytuacyja jakraz uźnikła. Maskva ŭžo nia raz hruba parušała pryniatyja pahadnieńni. Znoŭ nastaje čas, kab našaja biełaruskaja hramadzkaść i palityki źviarnulisia da krainaŭ-padpisantaŭ ab ahresiŭnych ekanamičnych dziejańniach Rasiei suprać Biełarusi i ab razhladzie hetych dziejańniaŭ na kanferencyi ABSE.
Zaraz da realnaha vyrašeńnia pytańnia z uładaj važna prypynić čarhovuju maskoŭskuju ekanamičnuju ahresiju suprać Biełarusi.
U intaresach biełaruskaj nacyi i dziaržavy treba, kab Biełaruś nie ŭstupiła ŭ kramloŭski «mytny źviaz».Na žal, haniebny stan našaha hramadztva ŭ tym, što ŭsio losavyznačalnaje zaležyć ad adnoj asoby. Jaje prysutnaść u biełaruskaj palitycy stała fatalna niebiaśpiečnaj dla biełaruskaj nacyi.
Kab suproćdziejničać ekanamičnaj ahresii Rasiei, biełarusam patrebnaja narmalnaja biełaruskaja ŭłada, jakaja stanie hruntavacca na intaresach biełaruskaj nacyi i dziaržavy. Nieabchodny chutki razvarot da svajho naroda, treba dać jamu reformy, pravy, spryjalnyja zakony, svabodu ekanamičnaj i pracoŭnaj dziejnaści. Siła ŭ nas samych, u našym hramadztvie.
Nieabchodna chutka prystupać da dyviersifikacyi pastavak enerharesursaŭ. Tut jość mahčymaści.
Treba vyzvalić navuku, adnavić u navucy razburanaje tupym režymam (jaki finansavaŭ pabudovu «perpetuum mobile»), pamiatajučy, što navuka (asabliva fundamentalnaja) jość ciapier hałoŭnaja vytvorčaja siła.
Treba chutka i razumna vyrašyć pytańnie z ułasnaściu i vykarystańniem ziamli, adnavić sialanstva, dajučy ludziam ułasnaść, svabodu pracy i handlu, mahčymaść i prava volna karystacca z vynikaŭ pracy.
Stračana šmat za hety čas, ale nia stračana hałoŭnaje — niezaležnaść, dziaržava i ludzi. My jašče ŭsio možam papravić i adradzić, była b tolki na heta naša vola.
Kamientary