Kolki kažanoŭ hinie ad vietrakoŭ? Maštab akazaŭsia značna bolšym, čym čakali

Vietranaja enierhietyka ličycca adnym sa sposabaŭ skaracić vykidy parnikovych hazaŭ. Adnak vietranyja elektrastancyi niasuć niebiaśpieku dla dzikich žyvioł: ad sutyknieńniaŭ z łopaściami turbin hinuć ptuški i kažany.

Pry hetym pryčyny hibieli kažanoŭ dahetul nie da kanca zrazumiełyja. Navukoŭcy miarkujuć, što žyvioł moža pryciahvać šum turbin abo što jany prymajuć vysokija kanstrukcyi za drevy. Nie vyklučana i toje, što kažany nie paśpiavajuć zaŭvažyć łopaści, jakija kruciacca.

Kab vyśvietlić maštab prablemy, jak piša Phys.org, hrupa navukoŭcaŭ z Hieałahičnaj słužby ZŠA praanalizavała 499 spravazdač ab hibieli kažanoŭ na 277 vietranych elektrastancyjach. Nazirańni, na jakich hruntavalisia hetyja spravazdačy, pravodzilisia z 1996 pa 2024 hod.

Adnak prosta padsumavać znojdzienych miortvych žyvioł było niedastatkova. Na roznych elektrastancyjach ich šukali pa-roznamu, a častka zahinułych kažanoŭ zastavałasia niezaŭvažanaj. Naprykład, cieły mahli źniknuć praz drapiežnikaŭ i inšych žyvioł abo zastacca schavanymi ŭ vysokaj travie.

Tamu daśledčyki raspracavali statystyčnuju madel, jakaja ŭličvała hetyja abstaviny i dazvalała acanić straty navat na elektrastancyjach, dzie takich nazirańniaŭ nie pravodzili.

Vyniki akazalisia ŭražvvlnmi. Pavodle padlikaŭ, z 1981 pa 2024 hod vietranyja elektrastancyi ŭ kantynientalnaj častcy ZŠA mahli stać pryčynaj hibieli kala 18,7 miljona kažanoŭ dziesiaci vidaŭ.

Najbolš paciarpieli try vidy. Na sivych vałasatachvostaŭ (Lasiurus cinereus) prypała kala 6,7 miljona vypadkaŭ hibieli, na čyrvonych vałasatachvostych (Lasiurus borealis) — 5,8 miljona, a na sierabrystavałosych kažanoŭ (Lasionycteris noctivagans) — 3,4 miljona.

Pryčym z raźvićciom vietranoj enierhietyki straty rezka pavialičylisia. Kali ŭ pieršyja dziesiacihodździ kolkaść zahinułych była značna mienšaj, to z 2021 hoda, pavodle acenak navukoŭcaŭ, ad vietrakoŭ štohod hinie bolš za 1,5 miljona kažanoŭ.

Aŭtary daśledavańnia pryznajuć, što, niahledziačy na vykarystańnie sučasnych statystyčnych mietadaŭ, niedachop zychodnych danych nie dazvalaje dakładna acanić kolkaść zahinułych kažanoŭ.

Akramia padliku strat, navukoŭcy vyznačyli faktary, jakija mohuć dapamahčy ich skaracić. Jany prapanujuć uličvać asablivaści kanstrukcyi vietrakoŭ i vybirać miescy dla novych elektrastancyj tam, dzie ryzyka dla kažanoŭ nižejšaja. Pryčym miery abarony mohuć adroźnivacca ŭ zaležnaści ad vidu žyvioł.

• 0
• 0
• 0
• 0
• 0
• 0
• 0
• 0