«My ŭsie ŭ šoku». Jak stralanina ŭ centry horada zakranuła biełarusaŭ u Krakavie

«Staralisia być usie razam i padtrymlivać adno adnaho»

U subotu, 7 listapada, Kaciaryna išła ŭ pamiaškańnie chabu «Prastora», jakoje znachodzicca ŭ centry Krakava. Biełarusy płanavali ŭšanavać pamiać pamierłych prodkaŭ, zładzić tradycyjnuju dziadoŭskuju viačeru. Pa darozie jana pačuła streły.

«Ja pačuła niejkija streły, ale padumała, što ŭ nas u horadzie vielmi časta niešta adbyvajecca: niejkija fiestyvali, kancerty. Baču, što biahuć ludzi, ale moj mozh nie adrazu moh uspryniać, što heta niejkaja niebiaśpieka. Ja pačała pytacca, što adbyvajecca, ale mnie nichto nie adkazvaŭ — ludzi prosta biehli. Tolki zamiežniki pa-anhielsku skazali, što stralajuć», — raskazvaje Kaciaryna.

Jana vyrašyła nie biehčy razam z natoŭpam, a schavacca.

«Ja acaniła, što mnie bližej budzie zabiehčy ŭ našu kamianicu, čym biehčy razam z usim natoŭpam. U nas ciapier idzie ramont fasadu, i ja padumała, što chutčej budzie schavacca za kanstrukcyjami hetaj budoŭli. Prybiehła tudy. Pamiataju, što było kala bieź piaci try», — kaža surazmoŭca.

Užo znachodziačysia ŭ biaśpiecy, jana pačuła, jak na miesca pryjazdžaje palicyja i hučać sihnały sirenaŭ.

U biełaruskaj «Prastory» ŭ hety čas pačali źbiracca ludzi, jakija pryjšli na dziadoŭskuju viačeru. Jany sačyli za navinami i staralisia padtrymlivać adno adnaho.

«My prosta nie vieryli, što heta adbyvajecca. Staralisia być usie razam, padtrymlivać adno adnaho, adkazvać blizkim i siabram, jakija pisali i pytalisia, jak my», — raskazvaje Kaciaryna.

Paźniej, kali ludzi pačali razychodzicca pa damach, centr horada byŭ ačepleny palicyjaj.

Jak Krakaŭ pieražyvaje nastupstvy stralaniny

Biełaruski hid u Krakavie Hleb Lapiejka kaža, što na nastupny dzień paśla trahiedyi ŭ horadzie było davoli spakojna. Pavodle jaho, jon stanoŭča ŭražany tym, jak spracavali słužby i jak pavodziać siabie ludzi:

«Z taho, što ja baču, usio davoli spakojna. Ja pad pryjemnym uražańniem ad taho, jak spracavali słužby i jak siabie pavodziać ludzi. Z pryčyny žałoby ŭsie mierapryjemstvy admienienyja, ludzi prosta špacyrujuć pa vulicy. Siońnia soniečnaje nadvorje. Nijakaj paniki nie baču, u sacsietkach u tym liku. Ahułam na vulicy niby cišej, čym zvyčajna, ale heta mnie tak moža zdavacca».

Sam jon padčas stralaniny znachodziŭsia daloka ad centru horadu, ale padziei ŭsio roŭna mocna jaho zakranuli. A 15‑j hadzinie, kali ŭ centry adbyvaŭsia napad, Hleb pačynaŭ ekskursiju pa mohiłkach.

«My navat nie čuli ničoha. I heta siurrealistyčny dośvied — pravodzić taki špacyr padčas teraktu ŭ centry», — raskazvaje jon.

Paśla ekskursii Hleb, jaki raniej pracavaŭ žurnalistam, uziaŭsia źbirać infarmacyju, kab dapamahčy ludziam razabracca ŭ tym, što adbyłosia.

«Jak były žurnalist, chacia byłych nie byvaje, paśla ekskursii sieŭ źbirać pravieranuju infarmacyju, kab mienš razychodzilisia čutki. Ciažka na sercy ad usiaho hetaha, a mozh pačynaŭ vydumlać scenary, jak ja moh apynucca ŭ centry. Ja tam amal kožny dzień byvaju. Siońnia ŭžo lahčej», — kaža Hleb Lapiejka.

Što viadoma pra stralaninu ŭ Krakavie

Stralanina adbyłasia 7 listapada kala treciaj hadziny dnia ŭ rajonie hałoŭnaj rynkavaj płoščy Krakava. Pavodle polskaj palicyi, mužčyna stralaŭ pa vypadkovych ludziach z aŭtamabila, jaki ruchaŭsia.

Zahinuli šeść čałaviek — čatyry žančyny i dvoje mužčyn. Siarod zahinułych byli hramadzianie Polščy, Vialikaj Brytanii i Rasii. Jašče 15 čałaviek atrymali ranieńni. Siarod paciarpiełych byli zamiežniki i dvoje palicyjantaŭ. Stan adnaho z palicyjantaŭ aceńvaŭsia jak krytyčny.

Napadnika, 24‑hadovaha hramadzianina Polščy, zatrymali paśla pierastrełki z palicyjaj. Jon byŭ paranieny i trapiŭ u špital. Pavodle polskaha ministra ŭnutranych spravaŭ Marcina Kiervińskaha, jość prykmiety taho, što mužčyna zachaplaŭsia krajnie pravymi ideałohijami i mieŭ radykalnyja ŭltranacyjanalistyčnyja pohlady.

Paśla napadu ŭ domie zatrymanaha ŭ horadzie Astroviec-Śvientakšyski znajšli cieły jašče troch čałaviek — baćkoŭ i siastry napadnika.

Polskija ŭłady rasśledujuć abstaviny i matyvy napadu. 8 i 9 listapada ŭ Polščy abvieščanyja dniami nacyjanalnaj žałoby.

• 0
• 0
• 0
• 0
• 0
• 0
• 0
• 0