Armija chakieraŭ suśvietnaha kłasu Paŭnočnaj Karei — sakretnaja zbroja, jakaja źniščyła Binance

FBR i sama Binance abvinavacili ŭ kradziažy Paŭnočnuju Kareju. Kampanii, jakija rasśledujuć apieracyi z kryptavalutami, źviazali ŭzłom z paŭnočnakarejskaj hrupoŭkaj TraderTraitor. Pchieńjan svaju datyčnaść admaŭlaje.

Były vykładčyk Kim Chyn Hvan, jaki rychtavaŭ chakieraŭ dla dziaržavy, a ŭ 2004 hodzie ŭciok u Paŭdniovuju Kareju, nazyvaje ich adnoj z tajemnych zbrojaŭ Kim Čen Yna.

Pavodle jaho, ułady sistematyčna šukajuć samych zdolnych dziaciej, kab pieratvaryć ich u vykanaŭcaŭ dziaržaŭnych apieracyj. Žadańnie samich školnikaŭ pry hetym značeńnia nie maje.

Štohod dla pahłyblenaha vyvučeńnia infarmatyki adbirajuć prykładna 150—200 dziaciej, pačynajučy z 11—12 hadoŭ. U 17 najlepšyja pastupajuć u viadučyja ŭniviersitety krainy. Paśla novych adboraŭ tolki častka traplaje ŭ vajskovaje kibierpadraździaleńnie.

Akramia vyšejšaj matematyki i zamiežnych moŭ, jany vyvučajuć, jak pracujuć kryptavaluty, a taksama raźbirajuć zamiežnuju techniku, kab razumieć jaje.

Tych, chto nie stanovicca chakieram, rychtujuć da inšaj pracy: dystancyjna stvarać prahramy i dadatki dla zachodnich kampanij, zarablajučy valutu dla režymu.

Paśpiachovaja apieracyja chakieraŭ moža prynieści vajskovamu padraździaleńniu da 30% skradzienych srodkaŭ u dalarach, raskazvaje Kim Chyn Hvan. Sami vykanaŭcy mohuć atrymać kvateru ŭ stalicy, kudy dazvolać pierasialicca i ich baćkam.

Pavodle prafiesara Karejskaha ŭniviersiteta Lim Čon Ina, płošča takoha žylla moža dasiahać 130 kvadratnych mietraŭ. Siarod inšych pryvilejaŭ — ustupleńnie ŭ partyju, šluby z pradstaŭnikami ŭpłyvovych siemjaŭ i pajezdki ŭ družalubnyja krainy, naprykład Kitaj.

Aficyjna takich śpiecyjalistaŭ nazyvajuć navukoŭcami abo daśledčykami. Dziaržaŭnyja miedyja nie ŭschvalajuć ich uzłomy, zatoje rehularna raskazvajuć pra talenavitych junych prahramistaŭ.

Pavodle acenki paŭdniovakarejskaj raźviedki za 2024 hod, u kibierpadraździaleńniach KNDR pracavali kala 8400 čałaviek.

Dziaržaŭnaja padtrymka daje im istotnuju pieravahu. Jak tłumačyć pradstaŭnik analityčnaj kampanii Chainalysis Alek Ziebryk, zvyčajnamu kibierzłačyncu moža chapić adnoj pamyłki, kab jaho znajšli pravaachoŭniki. Paŭnočnakarejskija chakiery praciahvajuć pracavać i paśla pośpiechaŭ, i paśla pravałaŭ: mižnarodnaja supolnaść maje mała mahčymaściaŭ ich spynić.

Važnuju rolu ŭ ich pracy adyhryvaje štučny intelekt. Jutubier Deeveeaar, jaki śćviardžaje, što atrymaŭ dostup da kamier nazirańnia za paŭnočnakarejskimi IT-pracaŭnikami, nazyvaje ŠI asnovaj ich dziejnaści.

Pavodle jaho, jany karystajucca płatnymi ChatGPT, Claude Code i Cursor, kab pisać prahramy, pierarablać reziume, stvarać falšyvyja dakumienty i asoby.

Sama Binance paviedamiła, što dla praniknieńnia ŭ kampjutary supracoŭnikaŭ złamyśniki vykarystali falšyvaje sumoŭje i škodnasnuju prahramu, schavanuju ŭ rekłamie. Paśla jany skarystalisia ŭnutranym instrumientam štučnaha intelektu, kab zachapić kantrol nad sistemami.

Adnak pryvilei nie aznačajuć lohkaha žyćcia. Byłyja paŭnočnakarejskija IT-pracaŭniki raskazvali pravaabarončaj arhanizacyi PSCORE pra pracoŭnyja dni bolš jak pa dziesiać hadzin, pastajannaje nazirańnie i žorstkija płany zarobku ŭ dalarach.

Za nievykanańnie miesiačnaj normy pahražajuć prynižeńni i inšyja pakarańni. Pavodle kiraŭnika PSCORE Bady Nam, cisk nastolki mocny, što ŭ ludziej uźnikajuć prablemy sa zdaroŭjem.

Tym časam, adznačajuć analityki, paŭnočnakarejskija hrupoŭki ŭsio čaściej vybirajuć bujnyja kampanii ź vialikimi zapasami srodkaŭ. Uzłamać ich ciažej, ale prykład Binance pakazvaje, nakolki vialikaj moža być zdabyča.

• 0
• 0
• 0
• 0
• 0
• 0
• 0
• 0