Klizma z koka-koły dapamahła tam, dzie nie spracavali słabilnyja. Jak heta mahčyma?

Jak piša Le Monde, 82‑hadovaja žycharka Fłarydy trapiła ŭ balnicu z bolem u žyvacie, młosnaściu i vanitami, jakija praciahvalisia dva dni. Žančyna pakutavała ad chraničnaha zaporu i demiencyi, amal nie ruchałasia i nie mahła samastojna siabie absłuhoŭvać.

Kampjutarnaja tamahrafija vyjaviła ŭ nižniaj častcy toŭstaj kiški i pramoj kišcy vializny kałavy kamień pamieram 12,2 na 10,5 santymietra.

Takija ŭtvareńni nazyvajuć fiekałomami. Heta ščylnyja masy zaćviardziełych, abiazvodžanych kałavych rečyvaŭ, jakija nie mohuć vyjści naturalnym šlacham. Jany asabliva časta ŭtvarajucca ŭ pažyłych ludziej z chraničnym zaporam. Hetamu spryjajuć małaruchomaść, nieŭrałahičnyja zachvorvańni i niekatoryja leki. Vialikija kałavyja kamiani mohuć vyklikać nieprachodnaść kišečnika i navat razryŭ jaho ścienki.

U pacyjentki kamień znachodziŭsia zanadta vysoka, kab jaho možna było vydalić uručnuju. Daktary pryznačyli słabilnyja preparaty, u tym liku srodak na asnovie sieny, parafinavy alej i polietylenhlikol, a taksama zrabili klizmu z fasfatam natryju.

Ale lačeńnie nie dapamahło. Na piaty dzień špitalizacyi paŭtornaja tamahrafija pakazała, što kamień praktyčna nie źmienšyŭsia. Da 13‑ha dnia palapšeńnia tak i nie nastupiła, i daktary vyrašyli pasprabavać niezvyčajny mietad — klizmu z koka-koły.

Žančynie praz pramuju kišku ŭviali litr napoju, pakinuli jaho ŭ kišečniku na hadzinu, a zatym dali vadkaści vyjści. Pacyjentka dobra pieraniesła praceduru. Užo na nastupny dzień bol i vanity źnikli, a tamahrafija pakazała, što abjom kałavaha kamienia źmienšyŭsia ŭdvaja. Praŭda, uzdućcie žyvata jašče zachoŭvałasia.

Praz try dni praceduru paŭtaryli, znoŭ vykarystaŭšy litr koka-koły. Paśla hetaha źnikli i astatnija simptomy. Na nastupny dzień žančynu vypisali, pryznačyŭšy słabilnyja preparaty dla prafiłaktyki zaporu. Chirurhičnaha ŭmiašańnia ŭdałosia paźbiehnuć.

Hety vypadak amierykanskija chirurhi z Majami apisali ŭ navukovym časopisie Cureus.

Čamu koka-koła moža dapamahać?

Ideja vykarystoŭvać haziroŭku dla razbureńnia ščylnych utvareńniaŭ u stravavalnym trakcie źjaviłasia nie na pustym miescy. Užo kala dvaccaci hadoŭ miedyki ŭžyvajuć koka-kołu dla razbureńnia tak zvanych fitabiezaaraŭ — ščylnych kamiakoŭ raślinnych vałoknaŭ, łupin i nasieńnia, jakija časam utvarajucca ŭ straŭniku.

Ahlad 46 vypadkaŭ pakazaŭ, što lačeńnie z vykarystańniem koka-koły było paśpiachovym u 91,3% vypadkaŭ. Praŭda, sam napoj dapamahaŭ pryblizna ŭ pałovie vypadkaŭ, a dla astatnich spatrebilisia dadatkovyja endaskapičnyja pracedury.

Navukoŭcy miarkujuć, što efiekt moža tłumačycca spałučeńniem niekalkich ułaścivaściaŭ koka-koły.

Pa-pieršaje, heta vielmi kisły napoj — jaho pH składaje kala 2,5. Pa-druhoje, hidrakarbanat natryju moža spryjać razbureńniu rečyvaŭ, jakija zmacoŭvajuć ščylnuju masu. Narešcie, burbałki vuhlakisłaha hazu stvarajuć miechaničnaje ŭździejańnie, jakoje dapamahaje jaje razdrabnić.

Pakolki ŭ kałavych kamianiach taksama mohuć utrymlivacca raślinnyja vałokny, daśledčyki dapuścili, što koka-koła zdolnaja dziejničać na ich padobnym čynam. Adnak straŭnik maje kisłaje asiarodździe, a ŭ toŭstaj kišcy jano blizkaje da niejtralnaha. Tamu miechanizm dziejańnia napoju ŭ hetych orhanach moža adroźnivacca.

Tym nie mienš pra paśpiachovaje vykarystańnie koka-koły dla raźmiakčeńnia i vydaleńnia kałavych kamianioŭ paviedamlali taksama daktary z Ispanii, Paŭdniovaj Karei i Indyi.

Adnak mietad dapamahaje nie zaŭsiody. Naprykład, u 94‑hadovaha mužčyny z chvarobaj Parkinsona koka-koła nie zmahła dastatkova raźmiakčyć kałavy kamień, tamu spatrebilisia dadatkovyja endaskapičnyja pracedury.

A ŭ 72‑hadovaj žančyny ź Indyi lačeńnie dało tolki časovuju palohku. Praz try miesiacy joj daviałosia rabić terminovuju apieracyju z-za razryvu ścienki kišečnika. Pry hetym u žančyny byli surjoznyja parušeńni pracy i budovy kišečnika, jakija koka-koła likvidavać nie mahła.

Čamu heta pakul nie standartnaje lačeńnie?

Niahledziačy na paśpiachovyja vypadki, efiektyŭnaść i biaśpieka takoha mietadu pakul niedastatkova vyvučanyja. Usie apisanyja historyi — asobnyja kliničnyja nazirańni, a nie maštabnyja daśledavańni. Daktary jašče nie viedajuć, jakaja kolkaść koka-koły najbolš efiektyŭnaja, jak doŭha jana pavinna ŭździejničać na kałavy kamień i ci biaśpiečna paŭtarać praceduru. Nie vyklučanyja i pabočnyja efiekty, u tym liku paškodžańnie ślizistaj abałonki kišečnika i parušeńnie bałansu elektralitaŭ.

Tamu klizmy z koka-koły ni ŭ jakim razie nielha rabić samastojna. Hety mietad zastajecca ekśpierymientalnym i moža prymianiacca tolki ŭ balnicy, pad nahladam daktaroŭ, kali zvyčajnaje lačeńnie nie dapamahło.

• 0
• 0
• 0
• 0
• 0
• 0
• 0
• 0