Najlepšym albomam 2010-ha pryznali «Ruch» hurtu «Dziecidziaciej»

Chočaš nie chočaš, ale muzyčnyja vyniki 2010 hoda usio ž taki daviadziecca padvieści, choć adzin raz.

Pakolki Rok-karanacyja ŭ hetym hodzie pieraŭtvaryłasia ŭ hała-kancert, samymi hałoŭnymi śpiecyjalistami ŭ muzycy stali supracoŭniki sajta Experty.by. Internet-prajekt «Ekśpierty» zasnavali ŭ 2008 hodzie Siarhiej Budkin, Aleh Klimaŭ, Źmicier Bieskaravajny i Źmicier Padbiarezski. Ludzi ŭ muzycy daśviedčanyja i aŭtarytetnyja. Takim čynam 1 sakavika stali viadomyja najlepšyja albomy za minuły hod. Ich vyjaviłasia roŭna try.

Biełaruskaj movy stała bolš

Badaj što samym niečakanym minułahodnim vynikam stała toje, što albomaŭ na biełaruskaj movie vyjšła ŭ 2010 hodzie na adzin bolš, čym rasiejskamoŭnych. Upieršyniu za ŭsiu historyju prajektu. Dyj atrymałasia tak, što va ŭsich naminacyjach pieramahli mienavita biełaruskamoŭnyja albomy. Trojčy adznačany pryzami albom «Koła viartańniaŭ» (hurt Hvara), jaki, darečy, choć i śpiecyjalizujecca na biełaruskaj folk-muzycy, pa składzie źjaŭlajecca internacyjanalnym. Čatyry naminacyi ŭziaŭ albom hurtu «Dziecidziaciej» «Ruch».

Usiaho ž prasłuchana ekśpiertami 44 albomy, što vyjšli ŭ 2010 hodzie. Heta na 17 kružełak mienš, čym u minułym: hod atrymaŭsia nie samym udałym na muzyku, pra što śviedčyć chacia b toje, što naminacyi «pop-albom» nie było ŭvohule. Pop-albomy taki ŭ 2010-m byli, ale vyjavilisia takimi, što naminacyju pryjšłosia prybrać — pa 10-balnaj škale samy lepšy ź ich nie nabraŭ i 6 bałaŭ.

«Niejra Dziubiel» suprać niaisnych «Dziecidziaciej»

Spabornictva pamiž hurtami «Dziecidziaciej» i «Niejra Dziubiel» za najlepšy albom, ci chacia b za najlepšy rok-albom było hałoŭnaj intryhaj viečara. Jak vyjaviłasia, u abiedźviuch naminacyjach pieramoh hurt Hanny Chitryk, jaki, darečy, paśpieŭ ruchnuć. U vyniku Kulinkoviču (jakoha bolšaść ličyła biassprečnym lideram) byŭ uručany muzyčny instrumient «dreva daždžu», a «Dziecidziaciej» na raźvitańnie atrymali ažno čatyry dypłomy.

Jak bačym, vyniki hodu zusim nie radasnyja: razhladalisia až 44 albomy, ale ŭsie pryzy raźmierkavalisia miž tryma hurtami -- "Dziecidziaciej", Hvarna i rep-hurt Pananieba, što atrymali ŭznaharodu za najlepšy debiutny albom. Choć, kali pahladzieć TOP-10 pa tych ža naminacyjach, vyśviatlajecca, što nie try hurty mahli pieramahčy, a až siamnaccać. Niaŭžo biełaruski rok-n-roł pieražyvaje taki kryzis?

Takim čynam biełaruskaja muzyka (akramia debiutantaŭ) pradstaŭlena hurtam «Dziecidziaciej» (jaki bolš nie isnuje) i hurtam Hvarna, aryjentavanym chutčej na zamiežnaha, a nie biełaruskaha słuchača.

Śpis finalistaŭ

Lepšy debiutny albom — Pananieba «Na bałocie»

Lepšy fołk-albom albom — Hvarna «Koła viartańniaŭ»

Lepšy rok-albom — «Dziecidziaciej» «Ruch»

Lepšy biełaruskamoŭny albom «Dziecidziaciej» «Ruch»

Lepšy rekard-łejbł — West Records

Pryz narodnych ekśpiertaŭ — Hvarna «Koła viartańniaŭ»

Pryz zamiežnych ekśpiertaŭ — Hvarna «Koła viartańniaŭ»

Pryz vialikaha žury — «Dziecidziaciej» «Ruch»

Lepšy albom — «Dziecidziaciej» «Ruch»

• 0
• 0
• 0
• 0
• 0
• 0