Viadomy žurnalist i palitołah Alaksandr Kłaskoŭski, baćka aryštavanaha pa spravie ab masavych biesparadkach u Minsku 19 śniežnia byłoha milicyjaniera Alaksandra Kłaskoŭskaha, atrymaŭ ad syna pieršy za try miesiacy list.
Kłaskoŭski-starejšy źviazvaje heta z tym, što ŭ minułuju piatnicu, 11 sakavika, hazieta «Narodnaja vola» apublikavała jaho adkryty list na imia hienieralnaha prakurora Biełarusi Ryhora Vasileviča. U liście Alaksandr Kłaskoŭski patrabavaŭ zabiaśpiečyć synu, jaki znachodzicca ŭ śledčym izalatary KDB, mahčymaść narmalna vieści pierapisku i sustrakacca z advakatam.
Na dumku Kłaskoŭskaha-starejšaha, takim čynam «udałosia prarvać infarmacyjnuju błakadu». Jon ukazvaje na toje, što za ŭvieś pieryjad turemnaha źniavoleńnia syna nie atrymlivaŭ ad jaho nivodnaha lista. A miarkujučy pa niešmatlikich listach, jakija atrymała žonka Kłaskoŭskaha-małodšaha, jon, u svaju čarhu, nie atrymlivaŭ listy ad maci i siastry. Zaraz, jak piša Kłaskoŭski-małodšy, situacyja źmianiłasia, i da jaho stali dachodzić listy ad svajakoŭ.
Adkryty zvarot da hienprakurora, miarkuje Kłaskoŭski-starejšy, taksama sadziejničaŭ atrymańniu jaho synam jurydyčnaj dapamohi. U zvarocie, nahadajem, havaryłasia pra toje, što synu Kłaskoŭskaha, jak i inšym aryštavanym pa spravie 19 śniežnia, nie zabiaśpiečana naležnaja jurydyčnaja dapamoha, u pryvatnaści nie dajecca mahčymaść sustrečy z advakatam sam-nasam, jak heta praduhledžana zakonam. «Zaraz syn piša ŭ liście, što napisaŭ adpaviednuju zajavu i spadziajecca najbližejšymi dniami na sustreču z advakatam», — skazaŭ baćka aryštavanaha.
Pavodle jaho słoŭ, syn paviedamlaje, što atrymaŭ list ad baćki ŭ piatnicu, 11 sakavika. Mienavita ŭ toj dzień, padkreśliŭ Kłaskoŭski-starejšy, u «Narodnaj voli» byŭ apublikavany zvarot da Vasileviča. Pavodle słoŭ baćki źniavolenaha, z ulikam taho što z abaniemientnaj skryni № 8 karespandencyja dla viaźniaŭ «amierykanki» vymajecca pa aŭtorkach, možna zrabić vysnovu, što try dni hety list, vidać, trymali i paśla rezanansu ŭ presie addali.
Z hetaha baćka aryštavanaha robić vysnovu: «Usio-taki hałosnaść dziejničaje, i hramadskaści treba bić u zvany, źviartać uvahu na fakty parušeńnia zakonu ŭ dačynieńni da tych asob, jakija ŭtrymlivajucca ŭ hetak zvanaj «amierykancy». Na dumku Kłaskoŭskaha-starejšaha, «u vyniku heta ŭsio-taki prymušaje pradstaŭnikoŭ siłavoha viedamstva ŭnosić karektyvy ŭ svaju palityku adnosna aryštavanych i prytrymlivacca chacia b elemientarnych norm zakonu».
Kamientary