Adpaviedny list atrymaŭ baćka palityka.
Baćka Mikoły Statkieviča atrymaŭ aficyjny adkaz ad Departamentu vykanańnia pakarańniaŭ pra toje, što jahonamu synu admovili ŭ daterminovym vyzvaleńni. Mikoła Statkievič adbyvaje pakarańnie na «chimii» ŭ vioscy Błoń Puchavickaha rajonu za arhanizacyju vuličnych demanstracyjaŭ pratestu suprać falsyfikacyi vynikaŭ vybaraŭ i referendumu‑2004. Palityk aburany rašeńniem uładaŭ.
Pavodle aficyjnaha adkazu Departamentu vykanańnia pakarańniaŭ, pytańnie ab umoŭna‑daterminovym vyzvaleńni Mikoły Statkieviča razhledzieli jašče 31 lipienia. Sam palityk ničoha pra heta nia viedaŭ. U toj čas jon adbyvaŭ pakarańnie ŭ Baranavickaj speckamendatury. Mikoła Statkievič paviedamiŭ «Svabodzie»:
(Statkievič: ) «U kancy žniŭnia ŭ kamendatury Baranavičaŭ, dzie ja ŭ toj čas znachodziŭsia, kazali: «Nu, Viktaravič, načalnik vyjdzie z adpačynku napačatku vieraśnia, razhledzim». Takim čynam, pačalisia padmany, kali zadnim čysłom robiacca dakumenty. Baćku paviedamili, što pytańnie pajezdak da jaho ciapier u kampetencyi Puchavickaj kamendatury. Ja ŭžo ad vieraśnia nia bačyŭ svajho baćku, i mianie vielmi turbuje jahony stan, bo jamu ŭ studzieni spoŭnicca 80 hadoŭ, i jon adzin tam».
Kiraŭnictva speckamendatury ŭ vioscy Błoń paviedamiła Mikołu Statkieviču, što da kanca studzienia pytańnia pra toje, ci adpuścić jaho dadomu na vychodnyja, naahuł, razhladacca nia budzie.
Artur Fińkievič, aktyvist niezarehistravanaj arhanizacyi «Małady front», jaki adbyvaje pakarańnie na «chimii» ŭ Mahilovie za palityčnyja hrafici, taksama Novy hod sustrenie ŭ internacie speckamendatury. Jamu paviedamili, što ŭ śviatočnyja dni navat nie dazvolać vyjści ŭ horad.
Paŭłu Sieviaryncu, jaki adbyvaje pakarańnie ŭ vioscy Małoje Sitna, paabiacali, što 31 śniežnia adpuściać na dva dni naviedać baćkoŭ u Viciebsku.
Kamientary