Sprava Stros-Kana razvalvajecca. Seks byŭ, hvałt — nie. Pakajoŭka vyjaŭlajecca krucielkaj

Byłoha kiraŭnika MVF vyzvalili z-pad chatniaha aryštu. Jahonaj siamji taksama viarnuli hrašovuju zastavu. Śledčyja bolš nie daviarajuć pakazańniam pakajoŭki, jakaja abvinavaciła Stros-Kana ŭ sprobie zhvałtavańnia.

U piatnicu były kiraŭnik MVF Daminik Stros-Kan byŭ vyzvaleny ŭ zale Kryminalnaha suda Manchetena. Chadajnictva advakataŭ ab vyzvaleńni z-pad chatniaha aryštu francuzskaha palityka, jaki abvinavačvajecca ŭ seksualnych damahańniach, padtrymali prakurory.

Pierad pačatkam papiaredniaha pasiadžeńnia la budynka suda finansista čakaŭ natoŭp, skandujučy "Hańba!". Na hety raz stajali tolki žurnalisty.

Eks-kiraŭnik MVF byŭ u čornaj pary i błakitnym halštuku i vyhladaŭ ščaślivym, pišuć amierykanskija ŚMI.

Stros-Kan byŭ sa svajoj žonkaj En Senkler.

Stros-Kan vypuščany pad padpisku ab niavyjeździe: jon moža pierasoŭvacca pa ZŠA, ale nie moža pakidać terytoryju krainy.

Viarnuli i zastavu, jakuju siamja Stros-Kana ŭnosiła za jaho vyzvaleńnie: heta paŭtara miljona dalaraŭ.

Pradstaŭniki śledstva paviedamili abaronie, što nie daviarajuć pakazańniam 32-hadovaj pakajoŭki, imihrantki z Hviniei, jakaja abvinavaciła eks-kiraŭnika MVF u sprobie zhvałtavańnia.

Pakajoŭka hatela Sofitel zajaviła palicyi, što Stros-Kan sprabavaŭ zhvałcić jaje ŭdzień 14 maja ŭ svaim numary "luks" koštam $ 3000. Pa słovach žančyny, jana zajšła ŭ numar, vyrašyŭšy, što tam nikoha niama. Ale dźviery ŭ vannuju pakoj raptam adčynilisia, i adtul vyskačyŭ hoły pastajalec, jaki staŭ prystavać da paciarpiełaj, potym zaciahnuŭ u vanny pakoj i prymusiŭ da aralnaha seksu. Pakajoŭka śćviardžała, što joj udałosia vyrvacca i ŭciačy, i vyklikali palicyju. Da momantu, kali pryjechali palicyjanty, Stros-Kan pakinuŭ hatel. Praz čatyry hadziny jaho vyjavili ŭ aeraporcie imia Džona Kenedzi i vyvieli z sałona samalota za dziesiać chvilin da vyletu ŭ Paryž.

Adnak śledčyja nie raz łavili damu na chłuśni. Pa słovach prakuroraŭ, jana ŭvieś čas błytajecca ŭ pakazańniach.

Ekśpiertyza paćvierdziła tolki toje, što ŭ palityka byŭ seksualny kantakt z žančynaj. Viersiju samoha Stros-Kana heta nie asprečvaje: pa słovach abvinavačanaha, u jaho sapraŭdy byŭ aralny seks z zajaŭnicaj, ale pa ŭzajemnaj zhodzie.

Śledstva taksama vyśvietliła, što 32-hadovaja ŭradženka Hviniei mieła suviazi z mafijaj, jakaja kantraluje narkabiźnies i zajmajecca admyvańniem hrošy. Z adnym z udzielnikaŭ złačynnaj hrupy ŭ dzień, kali Stros-Kan nibyta damahaŭsia jaje, pakajoŭka źviazvałasia pa telefonie. U zapisanaj razmovie jana abmiarkoŭvaje ź niejkim mužčynam, jakuju vyhadu možna atrymać ad abvinavačvańnia palityka.

Sam Stros-Kan poŭny namieraŭ jak najchutčej viarnucca ŭ francuzskuju palityku.

Žonka i dačka mocna padtrymlivali Stros-Kana na ŭsim praciahu hetaj niecharošaj historyi.

• 0
• 0
• 0
• 0
• 0
• 0
• 0
• 0