Z pryčyny zatrymańnia milicyjaj akcior Homielskaha teatra spaźniŭsia na śpiektakl

U Homieli jašče da pačatku akcyi maŭklivaha pratestu, prykładna ŭ 18.10, u roznych miescach było zatrymana kala 20 ravarystaŭ, siarod jakich i akcior Homielskaha abłasnoha dramatyčnaha teatra Michaił Mišuraŭ.

Siońnia jon pavinien byŭ ihrać rolu Čarli ŭ śpiektakli «Niedasiahalnaja» pavodle pjesy Somiersieta Moema.

U 20.40 Mišurava vypuścili z apornaha punkta. «Ja ničoha nie maju suprać dziejsnaj ułady, ale ja źbiantežany pavodzinami supracoŭnikaŭ milicyi. Ja jechaŭ na pracu, ja pavinien byŭ viečaram ihrać u śpiektakli. Kali mianie zatrymali, ja heta rastłumačyŭ milicyjanieram. Mianie abiacali adpuścić praz 10 chvilin, u vyniku pratrymali bolš za dźvie hadziny, ja prasiŭ dakumient, jaki paćviardžaje, što ja byŭ u apornym punkcie, kab padać jak apraŭdańnie kiraŭnictvu teatra, ale milicyjanier Prakapienka skazaŭ, što jaho kiraŭnictva zahadała nikomu nie davać nijakich apraŭdalnych dakumientaŭ.

Ja nie ŭdzielnik nijakich akcyj, nijakich mitynhaŭ, ja pravasłaŭny chryścijanin, ja nie maju pretenzij da ŭłady, usiakaja ŭłada ad Boha.

Prykładna, a 18-j hadzinie była zatrymana studentka Marharyta Rus. «Prosta jechała na rovary, słuchała muzyku, spynili i dastavili ŭ aporny punkt. Ja čuła pra niejki mitynh, ale ja sapraŭdy nie tudy jechała, ja jechała ŭ łaźniu, voś pobač, i nie dajechała», — raskazała studentka. Viartaŭsia z mahazina na rovary i hamialčanin Ivan Kančar, ale taksama byŭ dastaŭleny razam z technikaj u aporny punkt. Usim zatrymanym rastłumačyli, što nibyta treba pravieryć ich techniku, bo ciapier u vobłaści ŭsplosk kradziažoŭ rovaraŭ.

Nahadajem, akcyja maŭklivaha pratestu 13 lipienia ŭ Homieli prajšła na adkrytaj placoŭcy kala adnajmiennaha ŭniviermaha. Da pryznačanaha času — 19 hadzin — tut užo sabralisia kiraŭniki ŭpraŭleńnia ideałahičnaj pracy abłvykankama, namieśniki načalnika UUS i strukturnych padraździaleńniaŭ milicyi, a taksama niekalki dziasiatkaŭ milicyjanieraŭ i supracoŭnikaŭ śpiecnaza.

Kolkaść udzielnikaŭ ustanavić nie ŭdałosia, ale ich było nie mienš jak 150–200 čałaviek. Sprava ŭ tym, što kala ŭniviermaha znachodzicca bujnaja transpartnaja raźviazka, mahaziny, apteka, zabaŭlalnyja ŭstanovy. Było ciažka vyznačyć — biaruć ludzi ŭdzieł u akcyi ci prosta hulajuć. Prynamsi, ni apładysmientaŭ, ni zvankoŭ budzilnikaŭ na mabilnych telefonach čuvać nie było. Čas ad času z natoŭpu prachožych supracoŭniki śpiecnaza vychoplivali hramadzian i dastaŭlali ŭ aŭtobus. Pa jakich kryteryjach zatrymlivali ludziej — nieviadoma.

Pavodle nazirańniaŭ karespandenta BiełaPAN, zatrymany byli ŭ asnoŭnym vypadkovyja prachožyja, jakija nie majuć nijakaha dačynieńnia da akcyj i mitynhaŭ. Takim čynam byli zatrymany nie mienš jak 15 čałaviek.

• 0
• 0
• 0
• 0
• 0
• 0
• 0
• 0