KDK: Mnohija damy paśla ŭvodu ŭ ekspłuatacyju nieprydatnyja dla pražyvańnia

Jak paviedamiła pres-słužba Kamiteta dziaržkantrolu, takaja vysnova zroblena pavodle vynikaŭ praviedzienaha niadaŭna manitorynhu budaŭnictva žylla ŭ rehijonie.

Tak, u šerahu kvater uviedzienaha ŭ studzieni 2011 hoda 12-kvaternaha doma ŽBVK «Žamčužny-bud» u Kapyli z-za vilhotnaści i zaśmiečvańnia vientylacyjnych kanałaŭ na ścienach źjaviłasia ćvil, adstali špalery. Paśla ŭmiašańnia KDK padradčyk za svoj košt ustaraniŭ usie defiekty. U 24-kvaternym domie ŽBVK u Lubani, uviedzienym z azdableńniem u sakaviku, u niekatorych kvaterach ustanavili škłopakiety z raźbitymi šybami, adklejvalisia špalery, afarbavanyja stoli zaćvili, uvachodnyja i mižpakajovyja dźviery nie začynialisia. Pavodle patrabavańnia KDK brak byŭ likvidavany na praciahu miesiaca.

U siami ź dzieviaci padjezdaŭ doma ŽBVK «Rahnieda-Zasłaŭje» praz 10 miesiacaŭ paśla ŭvodu ŭsio jašče nie było hazu. Haz padklučyli tolki paśla vyjezdu rabotnikaŭ Kamiteta dziaržkantrolu na abjekt z kamisijaj pa zajavie hramadzian. Zvyš troch miesiacaŭ nie padklučali kacielniu va ŭviedzienym u mai 141-kvaternym domie ŽBVK «Baravaja-2007», dzie padaču haračaj vady KUP «ŽKH Minskaha rajona» zabiaśpiečyła pavodle patrabavańnia KDK.

Na ŭsich abjektach vyjaŭlena zavyšeńnie koštu budaŭniča-mantažnych rabot, jakoje skłała 555 młn. rubloŭ, u tym liku z-za pamyłak prajekciroŭščykaŭ — 327 młn.

Manitorynh pakazaŭ, što bolšaść uviedzienych žyłych damoŭ zdadziena ŭ ekspłuatacyju ź pieravyšeńniem narmatyŭnaha terminu budaŭnictva. U pryvatnaści, bolš za dva hady budujucca dva 54-kvaternyja damy ŽBVK u Minskim rajonie, praciahłaść budaŭnictva ŭžo pieravyšaje narmatyŭ u čatyry razy.

Budaŭnictva 148-kvaternaha doma ŽBVK u Dziaržynsku, pačataje ŭ listapadzie 2008 hoda, pieranosiłasia piać razoŭ i nie zavieršana dahetul.

Zaciahvańnie terminaŭ budaŭnictva, niajakasnaje vykanańnie rabot vyjaŭlena ŭ damach, što budujucca, zamoŭcami jakich vystupali UKB Minskaha, Vałožynskaha, Maładziečanskaha, Lubanskaha, Kapylskaha, Puchavickaha, Červieńskaha rajonaŭ, a taksama Žodzina.

Pry razhladzie zvarotaŭ, što pastupili ŭ Kamitet dziaržkantrolu Minskaj vobłaści, vyjaŭlena 19 budaŭničych i prajektnych arhanizacyj, jakija nie vykanali abaviazacielstvy pierad zabudoŭščykami. Za studzień-vierasień da administracyjnaj adkaznaści pryciahnuta 13 jurydyčnych i dzieviać słužbovych asob, za zavyšeńnie koštu vykananych rabot nakładziena administracyjnych štrafaŭ na 502 młn. rubloŭ.

Pavodle vynikaŭ manitorynhu Minskamu abłvykankamu prapanavana pryniać miery pa naviadzieńni paradku ŭ budaŭničaj halinie. KDK zajaŭlaje, što praciahnie kantralavać praces zaviaršeńnia budaŭnictva prablemnych damoŭ ŽBK da ŭvodu ich u ekspłuatacyju.

• 0
• 0
• 0
• 0
• 0
• 0
• 0
• 0