U vyniku praź biełaruskuju terytoryju ciapier jeduć tolki tyja rasiejskija hruzapieravozčyki, što nia majuć mahčymaści źmianić maršrut.
Dziaržaŭny mytny kamitet Biełarusi bolš nie prymaje rasiejskich harantyjaŭ pry tranzycie hruzaŭ praź biełaruskuju terytoryju, paviedamlaje maskoŭski “Kommiersant'”. Zamiž hetaha ŭvodzicca abiaviazkovaje mytnaje supravadžeńnie, jakoje maje achapić 90 pracentaŭ rasiejskich hruzaŭ, što iduć tranzytam praz našuju krainu.
Farmalnaj padstavaj dla admieny pryjomu rasiejskich tranzytnych harantyjaŭ staŭ incydent 8 studzienia, kali dva transpartnyja srodki (mikraaŭtobus i maped) nie dajechali da Rasiejskaj Federacyi i zhubilisia dzieści ŭ našaj krainie. Rasiejski bok admoviŭsia pakryvać straty biełaruskaha biudžetu.
Harantyjnyja sertyfikaty, jakija dziejničali ad śniežnia 2003 h., faktyčna zabiaśpiečvali apłatu mytnych płaciažoŭ. Ciapier biełaruskaja mytnia vykarystoŭvaje harantyi trecich asobaŭ, a taksama prymaje ŭnioski na raźlikovy rachunak mytni ŭ pamiery 500 eŭra dla fizyčnych asobaŭ u vypadku tranzytu aŭtatranspartu.
Uniosak viartajecca, kali transpartny srodak traplaje na miesca pryznačeńnia. Biełaruskaja mytnia prapanuje vybar: uniosak možna nie rabić u vypadku, kali pieravozčyk pahodzicca na mytnaje supravadžeńnie, ci supravadžeńnie specpadraździaleńniem departamentu achovy. Adnak i biez uniosku za pasłuhi supravadžeńnia daviadziecca zapłacić ad 250 da 400 dalaraŭ ZŠA ŭ zaležnaści ad maršrutu tranzytu. Mytny kanvoj supravadžaje kala dvuch dziasiatkaŭ mašyn za pajezdku, što składaje niaznačnuju častku tranzytu hruzaŭ i pravakuje vialikija čerhi na miažy z Rasiejaj.
Zdymak z sajtu tut.by
Ciapier čytajuć
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary