Kali Biełaruś nie viernie jeŭrapiejskich.
Staršynia kamiteta pa zamiežnych spravach litoŭskaha siejma Emanuelis Zinhierys miarkuje, što praciah dypłamatyčnaha kanfliktu Jeŭrasajuza z aficyjnym Minskam moža skončycca rašeńniem ab vydvareńni ŭsich pasłoŭ Biełarusi z krain ES. Pra heta jon zajaviŭ u intervju telekanału «Biełsat».
U adkaz na ŭviadzieńnie sankcyj Biełaruś vyrašyła nie zaprašać nazad pasłoŭ ES, adklikanych dla kansultacyj, zaznačyŭ jon. «Hetyja miery Biełarusi mohuć vyklikać inšyja miery ŭ adkaz z boku ES. Rašeńnie ab hetych mierach jašče nie pryniata, ale ja nie chacieŭ by, kab usio skončyłasia b rašeńniem vydvaryć usich pasłoŭ Biełarusi z krain ES», — skazaŭ palityk.
«Ja b prapanavaŭ nie zahulacca i pierahledzieć svajo rašeńnie ab nieviartańni pasłoŭ ES u Minsk.Kali ž kanflikt atrymaje praciah, heta moža skončycca viartańniem usich pasłoŭ Biełarusi ŭ Minsk z usich stalic Jeŭrapiejskaha sajuza», — zajaviŭ Zinhierys.
***
Nahadajem, 23 sakavika ministry zamiežnych spraŭ 27 krain ES na pasiadžeńni ŭ Brusieli prahałasavali za pašyreńnie «kropkavych» sankcyj suprać Biełarusi za košt 29 kampanij i 12 pryvatnych asob. Razmova idzie pra sudździaŭ, prakuroraŭ i biźniesmienaŭ, jakija adkaznyja, z punktu hledžańnia ES, za parušeńni pravoŭ čałavieka i represii ŭ dačynieńni da apazicyi i hramadzianskaj supolnaści, a taksama padtrymlivajuć uładu Łukašenki abo źjaŭlajucca jaje bienieficyjarami.
Takim čynam, zaraz u čornym śpisie ES 243 pryvatnyja asoby i 32 pradpryjemstvy Biełarusi.
Rašeńnie ab pašyreńni sankcyj vyklikana tym, što situacyja ŭ Biełarusi paharšajecca, zajaviła viarchoŭny pradstaŭnik ES pa pytańniach źniešniaj palityki i palityki biaśpieki Ketryn Eštan pavodle vynikaŭ pasiadžeńnia ŭ Brusieli.
Sankcyi vykarystoŭvajucca dla taho, kab pierakanać biełaruskija ŭłady ŭ nieabchodnaści vyzvalić palitźniavolenych, padkreśliła jana. Dziejańni Jeŭrasajuza, pavodle słoŭ Eštan, pavinny pierakanać biełaruskija ŭłady ŭ nieabchodnaści vyzvaleńnia palitźniavolenych i viartańnia na šlach kanstruktyŭnych adnosinaŭ z krainami — členami ES.
Papiarednim razam čorny śpis byŭ pašyrany 27 lutaha, paśla čaho biełaruskija ŭłady rekamiendavali dvum dypłamatam, kiraŭniku pradstaŭnictva Jeŭrasajuza ŭ Biełarusi i pasłu Polščy, vyjechać u svaje krainy «dla kansultacyj» sa svaim kiraŭnictvam. U adkaz na heta ŭsie krainy ES adklikali svaich pasłoŭ ź Minska.
23 sakavika, paśla taho jak stała viadoma pra novaje pašyreńnie sankcyj, MZS Biełarusi zajaviła: «Biełaruski bok nie bačyć nieabchodnaści ŭ prysutnaści na terytoryi Biełarusi adklikanych pasłoŭ dziaržaŭ», jakija prahałasavali za rašeńnie ab pašyreńni sankcyj u dačynieńni da pryvatnych asob i pradpryjemstvaŭ Biełarusi.
Nastupnym dniom
Kamientary