«Małady front» patrabuje ad deputataŭ inicyjavać hałasavańnie nakont maratoryja na śmiarotnuju karu
Aktyvisty zarehistravanaj u Čechii mižnarodnaj hramadskaj arhanizacyi «Małady front» patrabujuć ad deputataŭ Pałaty pradstaŭnikoŭ Nacyjanalnaha schodu Biełarusi inicyjavać u parłamiencie hałasavańnie pa pytańni ŭviadzieńnia maratoryja na śmiarotnuju karu.
Jak paviedamiŭ
«Biełaruś — apošniaja kraina kantynienta, dzie dahetul isnuje praktyka vyniasieńnia śmiarotnych pryhavoraŭ. Na našu dumku, sam fakt zabojstva čałavieka dziaržavaj daŭno nie adpaviadaje paniaćciu „cyvilizavanaje hramadstva“ i supiarečyć chryścijanskim tradycyjam našaj krainy», — skazana ŭ zvarocie.
«Małady front» źviartaje ŭvahu parłamientaryjaŭ na vierahodnaść sudovaj pamyłki i vidavočnuju niemahčymaść vypravić jaje ŭ situacyi, kali «pryhavory vykonvajucca ŭ karotkija terminy, biez naležnych i dadatkovych pravierak, mižnarodnych ekśpiertyz».«Nas aburaje i toje, što svajakam zabitych nie paviedamlajecca data śmierci i miesca pachavańnia, nie vydajucca cieły», — skazana ŭ zvarocie.
Jaho aŭtary nie ličać pierakanaŭčymi spasyłki čynoŭnikaŭ na refierendum 1996 hoda, padčas jakoha bolšaść nasielnictva ŭchvaliła prymianieńnie śmiarotnaj kary ŭ Biełarusi.
«Prajšło piatnaccać hadoŭ z času, kali hramadzianie krainy vykazalisia za isnavańnie śmiarotnaj kary. Mahčyma, tady mnohija źviazvali isnavańnie hetaj miery z chutkaj pieramohaj złačynnaści. Zaraz situacyja źmianiłasia, źmianilisia ludzi. Pa telebačańni kažuć, što i złačynnaść daŭno pieramahli. Bolšaja častka aktyŭnych biełarusaŭ, katalicki kaścioł i pravasłaŭnaja carkva siońnia vystupajuć suprać śmiarotnaj kary. Da taho ž statystyka śviedčyć, što taki vid pakarańnia nie sadziejničaje źmianšeńniu kolkaści ciažkich złačynstvaŭ», — zaznačajecca ŭ liście.
«My chacieli b pačuć abhruntavany adkaz: čamu vy hatovyja abo nie hatovyja ŭźniać heta pytańnie ŭ Pałacie pradstaŭnikoŭ. Viadoma, usie adkazy buduć apublikavanyja ŭ internecie, i my pastarajemsia danieści hetu infarmacyju da vašych vybarščykaŭ», — paviedamlaje «Małady front».
Kamientary