Paŭłoŭski adsudziŭ za zvalnieńnie amal 12 młn rubloŭ

U sudzie Kastryčnickaha rajona Mahilova 12 krasavika padpisana miravoje pahadnieńnie pamiž AAT «Pramžyłbud» i aktyvistam niezaležnaha prafsajuza REP mularam Alaksiejem Paŭłoŭskim, jaki patrabavaŭ źmianić farmuloŭku zvalnieńnia i vypłacić hrašovuju kampiensacyju ŭ 11 młn. 662 tys. rubloŭ.

Sudździa Alaksandr Ramanaŭ začytaŭ bakam tekst miravoha pahadnieńnia, da jakoha jany pryjšli pierad pačatkam sudovaha pasiadžeńnia. Iściec i adkazčyk u asobie viadučaha jurysta AAT Raisy Kraśnikavaj padpisali dakumient.

Zhodna ź miravym pahadnieńniem, kiraŭnictva AAT «Pramžyłbud» da 25 krasavika źmienić farmuloŭku zvalnieńnia Paŭłoŭskaha. Zamiest zapisu ab zvalnieńni ŭ suviazi z zakančeńniem pracoŭnaha kantrakta ŭ jaho pracoŭnaj knižcy budzie zapisana, što jon zvolnieny pa pryčynie skasavańnia im pracoŭnaha dahavora ŭ suviazi ź jaho parušeńniem najmalnikam.

Da hetaha ž terminu «Pramžyłbud» abaviazany vypłacić Paŭłoŭskamu 11 młn. 662 tys. rubloŭ. Heta suma składvajecca z kampiensacyi za parušeńnie pravavoha stanovišča rabotnika i vychadnoj dapamohi.

Paŭłoŭski sa svajho boku zdymaje iskavyja patrabavańni. Sudovyja vydatki bakami pahašajucca ŭzajemna. Pastanova suda ab miravym pahadnieńni moža być abskardžana bakami na praciahu 10 dzion.

«Bok istca na 100% dakazaŭ parušeńnie pracoŭnaha zakanadaŭstva i pracoŭnaha kantrakta AAT «Pramžyłbud» — arhanizacyjaj, čyj kiraŭnik Leanid Bałdzienka ŭdastojeny za 2011 hod zvańnia «Čałaviek hoda», — zajaviŭ Paŭłoŭski,

zaznačyŭšy, što jon zadavoleny rašeńniem suda.

U dačynieńni da aficyjnaha prafsajuza, jaki, pavodle słoŭ Paŭłoŭskaha, u pracoŭnaj sprečcy z samaha pačatku vystupaŭ na baku najmalnika, mular maje namier padać isk u sud. «Ich pradstaŭniki zaklučali kałdahavor, da jakoha ja dałučyŭsia, i ŭsio, što tolki možna, było parušana», — skazaŭ rabočy.

Kiraŭnictva pradpryjemstva «Pramžyłbud» nie pradoŭžyła z 10 lutaha pracoŭny kantrakt z aktyvistam prafsajuza REP Paŭłoŭskim. Budaŭnik, u svaju čarhu, zajaviŭ pra šmatlikija parušeńni zakanadaŭstva, u pryvatnaści achovy pracy na budoŭli, jakaja viadziecca niepadalok ad AAT «Mahiloŭchimvałakno», i padaŭ zajavu ab daterminovym skasavańni kantrakta z-za nievykanańnia najmalnikam umoŭ pracoŭnaha pahadnieńnia.

Iściec patrabavaŭ, kab pryčynaj jaho zvalnieńnia byŭ art. 41 Pracoŭnaha kodeksa (u suviazi z parušeńniem najmalnikam umoŭ kantrakta), jaki praduhledžvaje vypłatu trochmiesiačnaj vychadnoj dapamohi. Finansavyja patrabavańni Paŭłoŭskaha — 11 młn. 662 tys. rubloŭ, u jakija ŭvachodziać kampiensacyja za paharšeńnie pravavoha stanovišča ŭ pamiery troch siaredniamiesiačnych zarabotnych płat i vychadnaja dapamoha ŭ pamiery dvuchtydniovaha siaredniaha zarobku.

Sudovyja pasiadžeńni pa isku Paŭłoŭskaha da «Pramžyłbuda» pačalisia 28 sakavika. Paśla pasiadžeńnia 3 krasavika pradstaŭnik istca pravaabaronca Barys Buchiel zajaviŭ BiełaPAN, što sud prainfarmavany ab 53 parušeńniach zakanadaŭstva, dapuščanych najmalnikam u dačynieńni da Paŭłoŭskaha. «Čatyrnaccać ź ich užo dakumientalna paćvierdžanyja adpaviednymi strukturami, takimi jak centr hihijeny i epidemijałohii, bank, dzie moj daviernik atrymlivaŭ hrošy, inśpiekcyja pracy, abłasny kamitet pa pracy i sacyjalnaj abaronie», — skazaŭ pravaabaronca.

Zvalnieńniu Paŭłoŭskaha papiaredničaŭ pracoŭny kanflikt rabočych jaho bryhady z administracyjaj budaŭničaj arhanizacyi. U studzieni 15 čałaviek piśmova zapatrabavali praciahu kantrakta z Paŭłoŭskim i pryhrazili vychadam ź Biełchimprafsajuza i zvalnieńniem u znak salidarnaści. Potym praktyčna ŭsie jany adklikali svaje podpisy. Troje budaŭnikoŭ napisali novaje chadajnictva da administracyi, kab Paŭłoŭskaha pakinuli na pracy.

• 0
• 0
• 0
• 0
• 0
• 0
• 0
• 0