Za hod biełarus niedajadaje 20 kh miasa, sadaviny i jahad 65 kh

Za hod siaredniestastyčny biełarus niedaatrymaŭ prykładna 19,7 kh miasa i miasapraduktaŭ, paviedamiła 23 maja na pres-kanfierencyi ŭ Minsku načalnik adździeła charčavańnia i markietynhavych daśledavańniaŭ RUP «Navukova-praktyčny centr NAN Biełarusi pa charčavańni» Eleanora Kapitonava.

«Za hod siaredni biełarus niedaatrymaŭ prykładna 19,7 kh miasa i miasapraduktaŭ. U tym liku posnaha miasa, jałavičyny, jon źjeŭ, pavodle źviestak Biełstata, 30 hramaŭ pry rekamiendavanaj normie prykładna 70 hramaŭ — usiaho za hod niedzie 14,5 kh niedaatrymaŭ. Ź jajkami jon ukłaŭsia ŭ normu. A voś bulby jon źjeŭ za hod na 36,5 kh bolš za normu.

Sadaviny i jahad za hod „niedajeŭ“ prykładna 65,5 kh, aharodniny i bachčavych — 16 kh, a małaka i małočnych praduktaŭ — 220,5 kh», — paviedamiła Kapitonava.

Pavodle jaje słoŭ, pryčyn takomu racyjonu moža być mnostva — ad faktaru vysokaha koštu niekatorych praduktaŭ da charčovych pieravah. Adnak, upeŭniena śpiecyjalist, u lubym vypadku heta pryviadzie da niedachopu niekatorych elemientaŭ u arhaniźmie, što moža paciahnuć za saboj adpaviednyja zachvorvańni. Tak, daśledavańni, što pravodzilisia ŭ Biełarusi ŭ roznyja hady, u asobnych hrupach nasielnictva rehistrujuć niedachop sielenu, kalcyju, vitaminaŭ S, D, folijevaj kisłaty, cynku i žaleza. Heta pahražaje raźvićciom sardečna-sasudzistych, ankałahičnych i endakrynnych zachvorvańniaŭ, patałohij imunnaj sistemy, chvarob straŭnikava-kišačnaha traktu.

«Kali pahladzieć, čym chvarejuć biełarusy, to ŭ struktury zachvorvańnia na 100 tysiač darosłaha nasielnictva atrymlivajecca, što try čałavieki z sotni chvarejuć na sardečna-sasudzistyja zachvorvańni, dva — na ankałahičnyja, piać — kaściova-myšačnyja. Lišak masy cieła majuć amal 60% darosłaha nasielnictva i 21% padletkaŭ, a dyjahnaz „atłuścieńnie“ pastaŭleny 15% darosłaha nasielnictva i da 7% padletkaŭ. Navat nieprafiesijanału bačna: pry niezbałansavanym charčavańni niama bałansu mikra- i makraelemientaŭ i vitaminaŭ, i, adpaviedna, isnuje zachvorvańnie na tyja hrupy chvarob, jakija źviazany z charčavańniem», — padkreśliła Kapitonava.

• 0
• 0
• 0
• 0
• 0
• 0