Upraŭleńnie ŭnutranych spravaŭ Mienskaj vobłaści prapanuje Arhkamitetu dziela ŭšanavańnia pamiaci achviaraŭ stalinskich represij płacić za achovu ŭročyšča Kurapaty.
Upraŭleńnie ŭnutranych spravaŭ Mienskaj vobłaści prapanuje Arhkamitetu dziela ŭšanavańnia pamiaci achviaraŭ stalinskich represij płacić za achovu ŭročyšča Kurapaty. Adpaviedny list za podpisam namieśnika načalnika abłasnoj milicyi spadara Šutava atrymali siońnia siabry arhkamitetu.
U lutym arhkamitet źviarnuŭsia da staršyni Mienharvykankamu Michaiła Paŭłava sa zvarotam, u jakim byŭ vykazany kłopat nakont uročyšča Kurapaty, jakoje maje historyka‑kulturnuju kaštoŭnaść i zaniesienaje ŭ pieršy rejestar kulturnych i histaryčnych abjektaŭ, jakija achoŭvaje dziaržava. Siabry arhkamitetu raspaviali pra šmatlikija vypadki vandalizmu ŭ dačynieńni da memaryjalnaha znaku «Ad narodu ZŠA narodu Biełarusi dziela pamiaci» hetak zvanaj łavy Klintana.
Apošnim razam memaryjalny znak byŭ razłamany sioleta ŭ studzieni. «Usio śviedčyć pra planavy i metanakiravany charaktar razbureńnia», adznačałasia ŭ zvarocie. Arhkamitet paprasiŭ kiraŭnika Mienharvykankamu vyrašyć pytańnie nadziejnaj achovy ŭročyšča Kurapaty i łavy Klintana.
«Dla zabieśpiačeńnia achoŭnych mierapryjemstvaŭ dadzienaha abjektu nieabchodnyja značnyja finansavyja srodki. Upraŭleńnie ŭnutranych spravaŭ Mienabłvykankamu ich nia maje i zabiaśpiečyć kruhłasutačnuju achovu kompleksu Kurapaty na biazvypłatnaj asnovie nia maje mahčymaści», adkazaŭ siabram arhkamitetu namieśnik staršyni abłasnoj milicyi spadar Šutaŭ.
«Razam z tym, — zaznačaje jon. — Mienski abłasny departament achovy pry apłacie z vašaha boku pasłuhaŭ achovy hatovy razhledzić pytańnie ŭ achovie Kurapataŭ».
Sakratar arhkamitetu dziela ŭšanavańnia pamiaci achviaraŭ stalinskich represij Uładzimier Ramanoŭski nazvaŭ viercham cynizmu prapanovu pryniać dziaržaŭny memaryjalny kompleks za pryvatny abjekt, achova jakoha patrabuje apłaty.
Uładzimier Ramanoŭski vykazaŭ nastupnuju prapanovu — napisać list eks‑prezydentu ZŠA Biłu Klintanu, kab jon dapamoh apłacić achovu memaryjalnaha znaku «Ad narodu ZŠA narodu Biełarusi dziela pamiaci», jaki jon ustalavaŭ va ŭročyščy ŭ studzieni 1994 hodu.
Kamientary