U Minsku nie chapaje aparataŭ MRT

Kliniki ŭ Minsku, dzie možna zrabić MRT, možna pieraličyć na palcach kali nie adnoj, to ŭžo dźviuch ruk dakładna. Kab prajści nieabchodnaje abśledavańnie, treba nie tolki rychtavać vialikuju sumu, ale i zapaścisia ciarpieńniem. Adnak haradskija ŭłady, miarkujučy pa ŭsim, vialikaj prablemy ŭ niedachopie aparataŭ dla mahnitna-rezanansnaj tamahrafii nie bačać. Naprykład, pieršy namieśnik staršyni kamiteta pa achovie zdaroŭja Minharvykankama Ihar Jurkievič spasyłajecca na dośvied «raźvitych jeŭrapiejskich krain», śćviardžajučy, što tam čerhi na anałahičnyja abśledavańnia dasiahajuć 3–6 miesiacaŭ.

Razam z tym profilny kamitet Minharvykankama pryniaŭ rašeńnie ab tym, što MRT u staličnych klinikach ciapier buduć rabić i ŭ suboty. U vyniku kliniki bolš zarobiać, a dla pacyjentaŭ pasłuha budzie bolš dastupnaja, adznačyŭ Jurkievič.

«Kampjutarnaja tamahrafija i mahnitna-rezanansnaja tamahrafija — nie skryninhavyja mietady abśledavańniaŭ, šyrokamaštabna nie pravodziacca, jak, naprykład, mamahrafija. U vypadku z KT i MRT adnaho žadańnia pacyjenta niedastatkova, navat kali jon hatovy», — cytuje Jurkieviča ahienctva «Minsk-Naviny».

Varta zaŭvažyć, što ŭ Biełarusi i mamahrafija šyrokamaštabna nie pravodzicca.

Viartajučysia da MRT, adznačym, što pracedura praktyčna niezamiennaja pry dyjahnostycy zachvorvańniaŭ centralnaj niervovaj sistemy, sasudzistaj sistemy, pazvanočnika, šerahu ŭnutranych orhanaŭ.

U vypadkach prablem z pazvanočnikam, pry bolach u śpinie, hałaŭnym boli daktary časta rekamiendujuć zrabić mienavita MRT. Mahnitna-rezanansnaja tamahrafija dazvalaje vizualizavać z vysokaj jakaściu hałaŭny, śpinny mozh i inšyja ŭnutranyja orhany. Akramia taho, MRT źjaŭlajecca pakazalnaj u dyjahnostycy zachvorvańniaŭ pazvanočnika, sustavaŭ, kaściova-myšačnaj sistemy. Jość ceły pieralik patałohij, vyjavić jakija biez vykarystańnia MRT faktyčna niemahčyma.

Na ŭvieś Minsk ź ciažkaściu nabiarecca dziasiatak aparataŭ MRT.

Pytańnie asnaščeńnia miedycynskich ustanovaŭ sučasnymi aparatami MRT, jak zaŭsiody, upirajecca ŭ hrošy. Prykładny košt tamohrafa — miljon dalaraŭ. Ale navat takuju, nie samuju niepadjomnuju dla bujnoha horada sumu znajści niaprosta. Naprykład, Minskaj haradskoj dziciačaj infiekcyjnaj balnicy aparat MRT abiacajuć užo daŭno. Tam hetaja technika realna patrebnaja. Ale nie nabyli jaje da hetaha času.

Z pryčyny deficytu aparataŭ zapisacca na dyjahnostyku niaprosta, dy i kaštuje niatanna.

• 0
• 0
• 0
• 0
• 0
• 0
• 0
• 0