Milinkievič pra Čarnobyl: «Palityka režymu viadzie da jašče bolš ciažkaj sytuacyi»

Ułada bahata kaža pra čarnobylskuju prablemu i prablemy hramadzianaŭ, jakija pražyvajuć na zabrudžanaj terytoryi. Adnak, nasamreč, palityka režyma viadzie da jašče bolš ciažkaj situacyi, pahłyblaje prablemy. Pavialičvajecca kolkaść achviaraŭ niepradumanaj palityki i falšyvych sacyjalnych harantyjaŭ, — zajaviŭ u Homiele lider demakratyčnych sił Biełarusi Alaksandr Milinkievič, kažučy pra pieršyja vyniki naviedvańnia rajonaŭ Biełarusi, jakija paciarpieli ŭ vyniku avaryi na Čarnobylskaj AES.

Alaksandr Milinkievič adznačyŭ taksama šerah, na jahonuju dumku, hałoŭnych prablemaŭ i pamyłak ułady ŭ halinie minimizacyi nastupstvaŭ avaryi na Čarnobylskaj AES.

— Na siońniašni dzień možna kazać pra toje, što ŭłada nie prymaje dastatkovych mieraŭ pa ŭviadzieńni technałohij, jakija dazvalajuć vyrablać na zabrudžanych terytoryjach umoŭna čystyja pradukty charčavańnia. Vyraščanaja na hetych terytoryjach sielskahaspadarčaja pradukcyja abiežavana praviarajecca na najaŭnaść radyjonuklidaŭ. Ludziam niama čym zamianić niebiaśpiečnyja pradukty charčavańnia, u vyniku ŭ arhaniźmie nakoplivajecca radyjacyja, — skazaŭ palityk.

Alaksandr Milinkievič adznačyŭ, što na zabrudžanych terytoryjach vostra staić prablema palapšeńnia sistemy achovy zdaroŭja. Va ŭmovach niedastatkova aktyŭnaj prafiłaktyki šmat tych, chto maje patrebu, nie atrymlivajuć preparataŭ, jakija błakujuć radyjonuklidy i vyvodziać ich vonki. Na dumku Alaksandra Milinkieviča, adnym z faktaraŭ paharšeńnia miedyka‑demahrafičnaj i ekałahičnaj situacyi ŭ Čarnobylskaj zonie źjaŭlajecca adstutnaść dastatkovych srodkaŭ na źmianšeńnie niehatyŭnych nastupstvaŭ avaryi. Va ŭmovach mižnarodnaj izalacyi režyma Łukašenki Biełaruś nie atrymlivaje ŭ nieabchodnych pamierach humanitarnuju dapamohu: leki, miedyčnaje abstalavańnie. Palityka režyma faktyčna pakinuła nasielnictva Biełarusi sam na sam z Čarnobylskaj prablemaj.

Alaksandr Milinkievič nahadaŭ taksama, što prykancy 2004 hodu ŭkazam Alaksandra Łukašenki było pastaŭlena pad pytańnie azdaraŭleńnie dziaciej z zabrudžanych terytoryjaŭ za miažoj. Alaksandra Łukašenka matyvavaŭ heta tym, što dzieci viartajucca «ź inšym śvietapohladam».

— Ułada skaračaje dapamohu ludziam u Čarnobylskaj zonie. Pastajanna, administracyjnym šlacham, źmianšajecca kolkaść nasielenych punktaŭ, jakija znachodziacca ŭ zonach radyjacyjnaha zabrudžańnia. Źmiena statusa hetych nasielenych punktaŭ viadzie da admieny ilhotaŭ nasielnictvu, jakoje tam pražyvaje. Taksama skaračajucca ilhoty likvidataram avaryi na ČAES. Siońnia na razhladzie Savieta ministraŭ znachodzicca prajekt pastanovy, jakaja praduhledžvaje skaračeńnie pamieru ilhotaŭ likvidataram, — skazaŭ Alaksandr Milinkievič.

Alaksandr Milinkievič padkreśliŭ, što nazvanyja vysnovy zroblenyja im na padstavie dadzienych ekśpiertaŭ, a taksama źviestak, atrymanych padčas naviedvańnia čarnobylskich rajonaŭ. Nahadajem, što 21‑25 krasavika lider demakratyčnych sił Biełarusi Alaksandr Milinkievič naviedvaje rajony, jakija paciarpieli ŭ vyniku avaryi na Čarnobylskaj AES. 21 krasavika palityk sustrakaŭ z žycharami Łuninieckaha i Stolinskaha rajonaŭ Bresckaj vobłaści. 22‑23 krasavika naviedaŭ Mazyr, Chojniki, Brahin i Homiel. Siońnia nakiravaŭsia na Mahileŭščynu.

• 0
• 0
• 0
• 0
• 0
• 0
• 0
• 0