Michał Zaleski. Pamrem, a Pienzie dapamožam!

pazytyvy

Pamrem, a Pienzie dapamožam!

Biełaruś maje namier padtrymać raźvićcio ahrakompleksu Pienzienskaj vobłaści

Radasnaja navina. Ludzi vielmi ŭdziačnyja načalstvu i za heta taksama. Asabliva žychary bratnich Viciebskaj i Mahiloŭskaj abłaściej, dzie «realizacyja» miasapraduktaŭ, ahulnapryznanych symbalaŭ ščaścia, skłała adpaviedna 91 i 85% da ŭzroŭniu 1998 h.

Zatoje ŭ siarednim pa krainie «realizacyja» miasapraduktaŭ navat pavialičyłasia na 2% proci 1998 h., bałazie vytvorčaść miasa skaraciłasia ŭsiaho na 7%. Adkul uziaŭsia dadatkovy miasapradukt? Kali vy nia jeli kiłbasy «Zahadka» i paštetu «Junacki žoŭty», nie zdahadajeciesia. Dzivosy treba apisvać adpaviednymi, kazačnymi słovami.

Hetak i robicca. Apošnimi hadami šyraka raspaŭsiudziłasia i ŭsio čaściej vykarystoŭvajecca sakralnaja formuła: «Raście vałavy nutrany pradukt». Zaklaćcie vyklikaje hanarlivaje vurkatańnie elektaratu, a prysutnyja ŭ «nacyjanalnym schodzie» ad taho dasiahajuć niekalkich kansensusaŭ za adnu sesiju.

Čaradziejnamu efektu analityki dajuć roznyja tłumačeńni. Neafrajdysty zasiarodžvajuć uvahu na słovach «raście» i «nutrany». Papulisty kancentrujucca na paniaćci «pradukt». Neakamunisty na prymietniku «vałavy».

Minstat, kab adkinuć mistyčnyja manipulacyi, raźličvaje VNP u try roznyja sposaby i dakładna viedaje vartaść tavaraŭ i pasłuh, stvoranych u krainie va ŭsich halinach ekanomiki i pryznačanych dziela spažyvańnia, nazapašvańnia i ekspartu.

Nie zabyvajucca dziaržaŭnyja rachunkavody i pra nasielnictva. Uličvajecca ŭsio: nabytyja tavary, pasłuhi i navat raśliny z žyviołami, spažytyja hramadzianami ŭ naturalnaj formie. Da hetaha dadajucca «ŭmoŭna naličanyja pasłuhi» za pražyvańnie tutejšych va ŭłasnych chatach i atrymlivajecca «kancavoje spažyvańnie chatnich haspadarak».

Ajčynnaja statystyka vučyć nas, što za peryjad nacyjanalnaj niezaležnaści VNP pavialičyŭsia ŭ biahučych koštach ŭ 67373 razy. Jon byŭ padaŭ, potym raptam padniaŭsia, znoŭ padniaŭsia, ale nia vielmi... Vyhladaje dramatyčna. Ale, kali paličyć ŭ realnych koštach, vyśvietlicca, što suviaź pamiž rostam VNP i kancavym spažyvańniem nasielnictva niečakana małaja (kaeficyent karelacyi składaje ŭsiaho 0,54).

Mienavita tamu bolšaść nacyi nie zaŭvažaje fenamenalnaha rostu. Ludzi zaniatyja naturalnymi spravami, u pryvatnaści, spažyvańniem.

Uparty narod tak prosta nie źbirajecca spažyvać mieniej, čym jamu treba. Vahańni VNP i kancavoha spažyvańnia adbyvajucca razam, ale majuć rozny razmach. Uzrovień spažyvańnia našmat bolš ustojlivy.

Voś užo i sp. dyrektar M.Lavonaŭ z MTZ uhołas ździviŭsia: čamu pry roście VNP źnižajecca jakaść žyćcia? Kudy dziajecca toj vałavy pradukt?

Darma ździŭlajecca i nie daje viery Minstatu. Raście pradukt, raście. Prosta jon, jak ajčynny «miasapradukt»: miasa ŭ im usio mieniej, soi — usio bolej. Choć miasa ŭ nas raście, a soja — nie raście.

Michał Zaleski