№ 11 (220), 12 — 19 sakavika 2001 h.
Biełaruś praz 100 hadoŭ
Novy prajekt “Našaje Nivy”
1901 hod... Ni vojnaŭ, ni hoładu. Nazva “Biełaruś” napaŭzabaronienaja... U Paŭnočna-Zachodnim Krai dynamična raźvivajecca haspadarka i imkliva raście nasielnictva. Ziamli nie staje, i ludzi zmušana vyjaždžajuć u Sibir i Ameryku. Tolki-tolki pamior Bahuševič, davučvajucca Janka Kupała i Jakub Kołas. Jašče Juzef Piłsudzki – šarahovy sacyjalist, i Lenin sa Stalinym – junaki-revalucyjanery. Nichto nie zdahadvajecca, što hetyja nikomu nie viadomyja padpolščyki-pačatkoŭcy buduć rasparadžacca losam našaha kraju. Jašče nia lotajuć samaloty, mała kudy pryjšła elektryčnaść, a ciahnik u nietraziach paleskich puščaŭ zdajecca praŭdzivym cmokam. Śpić narod, niby ziernie ŭ ralli.
Chto b moh padumać, što Miensk, ničym nia lepšy za Vilniu ci Viciebsk, praz 100 hadoŭ budzie stalicaj, horadam-monstram? Chto b padumaŭ, što viekaviečnych paleskich bałotaŭ nia stanie? Chto b padumaŭ, što Chvojniččyna i Brahinščyna praz 100 hadoŭ stanuć miortvaj zonaj? Što ź Biełastoku da Smalensku možna budzie dalatać za hadzinu, a ź Bieraścia da Viciebsku dajaždžać za siem hadzinaŭ? Što viaskovaje nasielnictva skarocicca da kolkaści, mienšaj, čym pierad biełaruska-rasiejskaj vajnoj siaredziny XVII st.? Što lasy buduć nastupać, paletki – źmianšacca?
2001 hod... Depresija, vybary, mienskaja mituśnia i zdranćvieńnie pravincyi. I amal nichto nia dumaje pra budučyniu, 2101 hod zdajecca irealna dalokim.
2101 hod. Jakoj budzie Biełaruś praz 100 hadoŭ? Jakoj budzie dziaržava i jakim dziaržaŭny ład? Jakimi buduć harady? Jaki horad budzie stalicaj Biełarusi? Jakimi miežy krainy? Što biełarusy buduć jeści? Jakimi buduć biełaruskija hrošy? Jakim transpart? Jakimi srodki masavaj infarmacyi? Jakaja litaratura budzie čytacca? Ci zastanucca teatry? Jakija imiony buduć samymi papularnymi? Jakimi stanuć lasy i reki? Ci možna budzie kupacca ŭ zabrudžanych siońnia aziorach? Jakija źviary źniknuć, jakija novyja raśliny zaviaducca? Što budzie z čarnobylskaj zonaj? U jakich cerkvach buduć malicca ludzi? Što jany viedaćmuć pra 2001 hod? Što budzie z nami?
Pačynajučy z 25 sakavika štotydnia – mary i fantazii pra budučyniu Viečnaj Biełarusi, ese, prahnozy i futuralahičnyja artykuły ŭ novaj rubrycy “NN” – “Biełaruś praz 100 hadoŭ”. Z hetaha vyjdzie cełaja kniha! Čakajem Vašych dopisaŭ. Budziem zahadvać.
Ciapier čytajuć
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary