Stralali ŭ Domaša

 Stralali ŭ Domaša

Utvaryłasia varonka hłybinioju 6 i dyjametram 17 santymetraŭ

Infarmacyja pra “terakt” la rasiejskaj ambasady pratačyłasia ŭ ŚMI jakraz pierad prylotam Pucina ŭ Miensk na rehijanalny samit.

Aficyjnaja versija – chtości zašpurnuŭ hranatu na panadvorak byłoha hieneralskaha pałacyka na rahu Kamunistyčnaj i Staravilenskaj, jaki z pačatku 90-ch hadoŭ minułaha stahodździa addali pad rasiejskaje pasolstva. U vyniku vybuchu ci dvuch – u “pakazańniach” siłavych strukturaŭ i aficyjoznych ŚMI niama poŭnaje jednaści pa hetym pytańni – na hazonie ŭtvaryłasia “varonka” hłybinioju 6 i dyjametram spačatku 17, a paśla 30 sm (i tut niama zhody miž tavaryšami). Ministar unutranych spravaŭ Navumaŭ kanstatavaŭ taksama najaŭnaść lohkich paškodžańniaŭ fasadu budynku i płotu. Adnak BT, łasaje da smažanych faktaŭ i zdymkaŭ schavanaj kameraj, čamuści “varonki” j “paškodžańniaŭ” nie pakazała. Dyj zamiest nibyta znojdzienych askiepkaŭ RHD-5 telehledačy pabačyli tolki jaje kamputarny malunak.

Hetyja supiarečlivyja padrabiaznaści dazvalajuć mocna zasumniavacca ŭ tym, ci sapraŭdy hranatu pierakinuli cieraz płot i ci paŭnavartasny zarad byŭ u joj zakładzieny.

Bojehatoŭnaść biełaruskich hranataŭ była mocna padarvanaja za hady “ŭmacavańnia našaha abaronnaha patencyjału”, u hetym nichto nie sumniajecca, ale kab nastupstvy vybuchu (ci dvuch?) byli nastolki mizernyja... Mo ŭ rečaisnaści nie hranatu kinuli z-za płotu ŭ prysutnaści hrupy milicyjantaŭ, a niešta prosta vypała z pasolskaha akna? Śledztva, spadziajemsia, daść adkaz – ale, napeŭna, tolki paśla parazy Łukašenki na vybarach.

“Terakt” byŭ vykarystany aficyjnym Mienskam napoŭnicu. BT pryplało da vybuchu Sieviarynca, a “Biełorusskaja Diełovaja Hazieta” – biełaruskuju apazycyju, suprać jakoj “nijakich aktyŭnych dziejańniaŭ ułady pakul nie pradprymajuć”. I tyja, i druhija dali słova Zamiatalinu dy pres-sakrataru KDB Kotavu, ale nie samoj apazycyi.

Anatol Labiedźka ŭ interviju Radyjo Svaboda adnaznačna zajaviŭ, što «nitki hetaj pravakacyi ciahnucca ŭ administracyju Alaksandra Łukašenki».

Hetaje mierkavańnie lidera liberałaŭ vyhladaje bolš praŭdapadobna, čym versii ŭładaŭ pra palityčnuju pravakacyju “pravaradykałaŭ”, ahučanuju “BDH” i BT. Cpiavak Źmicier Bartosik ličyć: «U kožnaha svoj maštab: Hitler padpaliŭ rajchstah, hety kinuŭ vybuchpakiet u rasiejskuju ambasadu».

Zhadajem, jak napiaredadni pieravybaraŭ Jelcyna ŭ Maskvie vybuchali tralejbusy i elektryčki metro, a ŭ Čačenii išła vajna; pierad abrańniem Pucina ŭ Maskvie vybuchali šmatpaviarchoviki, u Čačenii išła druhaja vajna; nakonadni pieravybaraŭ Kučmy bombu zakłali na sustrečy Natalli Vitrenki z vybarcami, kab abvinavacić u hetym lidera apazycyi Maroza. Daliboh, dać zahad špurnuć takoje biaskryŭdnaje vybuchovaje prystasavańnie, jak u rasiejskaj ambasadzie, moh tolki sapraŭdny čałaviekalubiec.

Valerka Bułhakaŭ, hałoŭny redaktar časopisu “Arche”, prakamentavaŭ padziei vakoł rasiejskaje ambasady hetak: “Zakanamierna, što Miensk za 90-ja zrabiŭsia horadam, dzie niešta adbyvajecca”.

Sapraŭdy, suśvietnaja słužba telekanału BBC u čaćvier dała repartaž ź Miensku ŭ 11.10, adnačasova z NTV i navat raniej za niekatoryja biełaruskija infarmahienctvy. U čaćvier BBC tolki kanstatavała sprobu “padarvać rasiejskuju ambasadu napiaredadni pryjezdu prezydenta Pucina ŭ Miensk na rehijanalny samit”, a ŭ piatnicu jana zaznačyła, što sprobu teraktu prypisvajuć “biełaruskim niezaležnikam”.

Chto b ni byli aŭtary teraktu, pad pryjezd u Miensk sotni zamiežnych karespandentaŭ jany padhadali dyk padhadali.

Skandał vakoł teraktu skiravany suprać Siamiona Domaša, vierahodnaha kandydata ad demakratyčnaha adzinstva. Mienavita na ŭmacavańnie ŭ masavaj śviadomaści nehatyŭnaha vobrazu palityčnych siłaŭ, jakija stajać za Domašam, pracavała BT uviečary ŭ čaćvier. I adbyłosia heta akurat u momant, kali papularnaść hetych siłaŭ pačała raści. Jak pieršaje abvinavačańnie, vysunutaje suprać Čyhira, nie było apošnim, hetak i adnoj atakaj na Domaša sprava taksama naŭrad ci abydziecca. Kali b u demakratyčnych siłaŭ była svaja kontraraźviedka, joj varta było b papiaredžvać budučyja “najezdy”.

Mikoła