Alaksiej Janukievič. Partyja, što abjadnaje nacyju

 Partyja, što abjadnaje nacyju

Alaksiej Janukievič

Analiz vynikaŭ prezydenckaje kampanii-2001 praciahvajecca jak na partyjnych schodach, tak i na staronkach niezaležnych vydańniaŭ. Pry hetym pryčyny parazy nazyvajuć samyja roznyja, a niekatoryja naahuł śćviardžajuć, što apazycyja zusim nie prajhrała. Što ž datyčyć mierkavańniaŭ ab stanoŭčym vyniku vybaraŭ dla apazycyi, jany nadziva adnadušnyja: “Apazycyja zdoleła zhurtavacca”. Mienavita ŭtvareńnie Šyrokaj Hramadzkaj Kaalicyi razhladajecca bolšaściu palityčnych lideraŭ jak asnoŭny j adziny pazytyŭny vynik ich pracy ŭ 2001 h. Nasamreč, abjadnańnie palityčnych subjektaŭ z supraćlehłymi intaresami kaštavała zadoraha, kab ciapier im nie hanarycca. U achviaru Kaalicyi byli pakładzienyja nia tolki partyjnyja intaresy, efektyŭnaść dziejańnia apazycyi, palityčnaja inicyjatyva i, u vyniku, sama pieramoha na vybarach. U achviaru kaalicyi była pakładzienaja Nacyjanalnaja Ideja.

Naturalna, pieramoha adzinaha kandydata mahła b adkryć novyja mahčymaści dla realizacyi intaresaŭ nacyjanalnych siłaŭ: parlamenckija vybary, raźniavoleńnie hramadztva j h.d. Adnak kaalicyja paciarpieła parazu. I – pavinna była spynić svajo isnavańnie.

Vidavočna, što apazycyjnaść da isnujučaha režymu była vielmi nietryvałym hruntam dziela pabudovy realnaj, efektyŭnaj kaalicyi. Siońnia ž, kali prablema atrymańnia demakratyčnymi siłami ŭłady na nacyjanalnym uzroŭni adkładajecca na niapeŭny čas i pierad apazycyjaj stajać zusim inšyja zadačy, subjektaŭ Kaalicyi-2001 abjadnoŭvajuć chutčej nie supolnyja intaresy ci plany na budučyniu, ale supolnaje minułaje j admoŭny palityčny dośvied.

Razam z tym, dziejničać paasobku taksama nie vypadaje. Prynamsi tym palityčnym siłam, jakija majuć padobnyja intaresy j kaštoŭnaści. Mienavita ciapier nadychodzić čas dziela stvareńnia novaj kaalicyi, što maje abjadnać usie nacyjanalnyja, niezaležnickija siły na hruncie nacyjanalnaj idei. Tym bolš, što kampanija-2001 zaśviedčyła: niama inšych siłaŭ u Biełarusi, zdolnych realna ŭpłyvać na hramadzka-palityčnuju sytuacyju ŭ krainie, aproč siłaŭ nacyjanalnych.

Novaja kaalicyja pavinna ŭtvarycca jak maha chutčej, da pačatku palityčnaha sezonu 2002 h., kab nie paŭtaryć losu svajoj papiarednicy. U adroźnieńnie ad Šyrokaj Hramadzkaj, Nacyjanalnaja Kaalicyja zdoleje realna zmabilizavać najaŭnyja resursy svaich subjektaŭ, pieradusim samyja kaštoŭnyja – ludzkija, dziela vyrašeńnia supolnych zadačaŭ. U bližejšyja dva hady Nacyjanalnyja Siły ŭ składzie svajoj kaalicyi pavinny pieraniać i ŭtrymlivać palityčnuju inicyjatyvu, ustalavać kantakt z hramadztvam i viarnuć jahony davier da siabie, zabiaśpiečyć sabie padtrymku z boku nacyjanalnych elitaŭ i, narešcie, padrychtavacca j paśpiachova pravieści svaich kandydataŭ u miascovyja Saviety na vybarach 2003 h.

Naturalna, što isnujučuju ŭładu ŭ režymie reahavańnia pieramahčy niemahčyma ŭ pryncypie. My pavinny navučycca nia tolki dumać i dziejničać chutčej, čym našyja apanenty, ale j praličvać napierad mahčymyja nastupstvy tych ci inšych palityčnych padziejaŭ. Kaalicyja nacyjanalnych siłaŭ pavinna mieć svoj infarmacyjna-analityčny centar, inakš našyja stratehičnyja plany j nadalej buduć raźbivacca ab rečaisnaść palityčnaha žyćcia jašče da pačatku ich ažyćciaŭleńnia. Pierajmańnie palityčnaj inicyjatyvy patrabuje dziejańniaŭ, skiravanych na dasiahnieńnie kankretnych metaŭ. Praktyka hlabalnych symbaličnych kampanijaŭ pavinna być spynienaja. My nia musim raźličvać na toje, što za 3—4—6 miesiacaŭ sytuacyja moža istotna źmianicca, ale pavinny dziejničać małymi krokami, staviačy realnyja mety j abaviazkova ich dasiahajučy. Ahulnanacyjanalny pośpiech budzie składacca z tysiačaŭ nievialikich miascovych pieramohaŭ. Kab źmianić sytuacyju na svaju karyść, nam patrebnaja peŭnaja krytyčnaja masa stanoŭčych vynikaŭ. I, viadoma, trymańnie palityčnaj inicyjatyvy vymahaje adpaviednaj palityčnaj voli. Treba być mocnymi j iści da kanca, kali my niešta pačynajem.

Siła kožnaj palityčnaj partyi vymiarajecca jejnaj realnaj padtrymkaj u hramadztvie. Mienavita hramadztva vyrašaje, chto budzie kiravać krainaj, navat pry aŭtarytarnym režymie, jaki my majem u Biełarusi.

Vialikaj pamyłkaj nacyjanalnych siłaŭ było supraćpastaŭleńnie siabie hramadztvu. Naturalna, dla ŭsich dobry nia budzieš. Ale my, nia zdoleŭšy znajści ŭ našym hramadztvie padtrymki niekatorych našych idejaŭ, padzialili hramadztva ŭ svaim ujaŭleńni na “śviadomych” i “mankurtaŭ” (“lumpenaŭ”, “saŭkoŭ” i h.d.), pakinuŭšy samim sabie rolu mienšaści. Adukavanaj, razumnaj, hodnaj absalutnaj mienšaści. Nam treba abaviazkova razburyć u svajoj śviadomaści stereatyp, što hramadztva nas nie padtrymlivaje i nikoli nie padtrymaje. Ź inšaha boku, my pavinny pačać prysłuchoŭvacca da hramadztva, my pavinny imknucca adpaviadać hramadzkim patrebam, abaraniać realnyja žyćciovyja intaresy ŭsich biełarusaŭ. Nacyjanalnyja Siły pavinny ŭvajści ŭ kaalicyju z hramadztvam, a nie ź biurakratami ci liberałami. My musim abjadnać nie palityčnyja elity, ale nacyju.

Z vyšejskazanaha naturalnym čynam vynikaje, što padtrymka Nacyjanalnaj Kaalicyi z boku navukovaj, spartovaj, kulturnickaj i inšych nacyjanalnych elitaŭ dla nas vielmi istotnaja, pakolki pradstaŭniki takich elitaŭ źjaŭlajucca liderami hramadzkaj dumki j mocna ŭpłyvajuć na jaje farmavańnie. Ludzi daviarajuć u pytańniach palityki piśmieńnikam, navukoŭcam i spartoŭcam značna bolej, čym lideram palityčnych partyjaŭ. Ź inšaha boku, padtrymka nacyjanalnych elitaŭ patrebnaja našym aktyvistam dziela bolšaj upeŭnienaści ŭ svaich siłach, u słušnaści taho, što robić ich partyja. Razam z tym, navat niefarmalnaja prysutnaść usieahulna pryznanych nacyjanalnych aŭtarytetaŭ u składzie novaj kaalicyi budzie dadatkova spryjać jaje samaidentyfikacyi jak mienavita nacyjanalnaj.

Kožnaja kaalicyja pavinna mieć nia tolki ahulnuju hlebu dla jadnańnia, ale j kankretnuju metu. Takoj metaj dla Nacyjanalnych Siłaŭ pavinny stać vybary ŭ miascovyja saviety ŭ 2003 h. My, kaniečnie, musim uziać udzieł u hetych vybarach, bo dalejšaje samaŭchileńnie ad palityčnaj baraćby na vybarach pryviadzie da poŭnaha zaniapadu strukturaŭ i kančatkovaha rasčaravańnia jak našych aktyvistaŭ, tak i toj častki hramadztva, što nam spačuvaje. Badaj, nia treba mieć iluzijaŭ adnosna ŭmovaŭ praviadzieńnia hetych vybaraŭ – my budziem sutykacca j ź ciskam na ludziej, i z falsyfikacyjami, ale my realna možam navat u takich umovach pravieści ŭ orhany ŭłady dastatkovuju kolkaść svaich ludziej. Padrychtoŭku da Vybaraŭ-2003 treba pačać užo sioleta. Zastajecca mienš za dva hady – čas dastatkovy, ale nia bolej za toje.

I, narešcie, ab tym, jakaja siła moža abjadnać siońnia nas usich vakoł nacyjanalnaj idei. Adkaz, jak i dziesiać hadoŭ tamu, adzin – BNF. Niahledziačy na šerah parazaŭ, stratu častki prychilnikaŭ, unutranyja supiarečnaści i pošuki, šalonyja represii j šalmavańnie, razhublenaść i rasčaravańnie svaich aktyvistaŭ paśla kampanii-2001, BNF zastajecca adzinaj surjoznaj palityčnaj siłaj, jakaja vyznaje i paśladoŭna adstojvaje nacyjanalnyja kaštoŭnaści. Naturalna, BNF sam pavinny źmianicca ŭ adpaviednaści sa svajoj novaj misijaj. Šyroki antykamunistyčny ruch supracivu pavinny adyści ŭ historyju razam z kamunizmam, na poli palityčnaha zmahańnia pavinna paŭstać pravaja nacyjanalnaja partyja. Partyja, jakaja budzie ćviorda stajać na hruncie biełaruskich tradycyjaŭ, adstojvać našyja kaštoŭnaści, jakaja ŭsprymie našaje hramadztva takim, jakim jano jość, partyja sapraŭdy biełaruskaja j sapraŭdy narodnaja. Partyja, što abjadnaje nacyju.