Knižnyja navinki vosieni

Jakimi navinkami sustrenuć paśla letnich adpačynkaŭ pryłaŭki kniharań?

Kab atrymać adkaz na hetaje pytańnie, karespandent «NN» źviarnuŭsia ŭ vydaviectvy «Mastackaja litaratura», «Biełaruskaja navuka», «Biełaruski knihazbor», «Technalohija» i «Łohvinaŭ».

Da pačatku novaha sezonu admysłovuju padrychtoŭku viaduć tolki dziaržaŭnyja vydaviectvy: ichny raźlik — na Dzień biełaruskaha piśmienstva, što sioleta maje adbycca ŭ Turavie. U «Mastackaj litaratury» vyjdzie kniha «Ziamla Załatavusta» — pra litaraturny Turaŭ. U jaje aprača tvoraŭ pryznanych aŭtaraŭ uvajšli vieršy, apaviadańni, histaryčnyja narysy turaŭčan.

Vydaviectva «Biełaruskaja navuka» padrychtavała da śviata histaryčnyja vydańni: «Staražytnaści Turaŭščyny» Leanida Pobala, «Staražytny Turaŭ» Piatra Łysienki (abiedźvie pa-rasiejsku) i kalektyŭnuju pracu «Turaŭ: minułaje, sučasnaje, budučaje».

Z Paleśsia da Monte-Kasyna

«Biełaruski knihazbor» rychtuje čarhovuju knihu ź «zialonaj», histaryčnaj seryi — (1856—1936) «Rečyckaje Paleśsie» Časłava Piatkieviča. U taminu, układzienuju Ŭładzimieram Vasilevičam, uvajšli etnahrafičnyja pracy. Pa-polsku apošniaja kniha Piatkieviča vychodziła ŭ 1938 h. Pavodle dyrektara vydaviectva Hienadzia Viniarskaha, «Rečyckaje Paleśsie» maje stać bestseleram sezonu.

Aprača taho, vydaviectva zaplanavała knihu vieršaŭ Łarysy Ramanavaj «Ptuški i ryby», vokładka jakoj budzie azdoblena karcinaj Alesia Puškina. Ese Ŭładzimiera Lipskaha «Baćka. Piśmy syna» praciahnuć radavodnyja daśledavańni, raspačatyja ŭ knihach «Ja: praŭdzivy apovied pra moj i tvoj radavod», «Baćki i dzieci».

Dla amataraŭ historyi padrychtavana vydańnie «Bitva pad Monte-Kasyna» (na asnovie niaskončanaj pracy Piatra Syča, dapisanaj Vincentam Žuk-Hryškievičam). Dla bolš vuzkaha koła čytačoŭ pryznačanaja manahrafija estetyka Mikoły Krukoŭskaha «Blask i trahiedyja ideału».

Žyćciapis Pałuty

Hałoŭny redaktar «Technalohii» Źmicier Sańko siarod navinak vyłučaje dźvie najbolš značnyja: «Nazvy nasielenych punktaŭ Biełarusi. Haradzienskaja vobłaść» (pieršaja kniha hetaj seryi pieraličvała pasieliščy Mienščyny) i pieršy žyćciapis Pałuty Badunovaj, jaki vyjdzie ŭ seryi «Našy słavutyja ziemlaki», — «Puciavinami zmahańnia i pakutaŭ» aŭtarstva homielskaj daśledčycy Valanciny Lebiedzievaj.

Daśledavańnie Viačasłava Nasieviča «Tradycyjnaja biełaruskaja vioska ŭ eŭrapiejskaj perspektyvie» maje šaniec adrazu ž zrabicca rarytetam: nakład siahaje tolki 1000 asobnikaŭ. Heta ŭnikalnaja praca: na prykładzie vioski Korań, što na Łahojščynie, aŭtar daśledavaŭ historyju biełaruskaj vioski naahuł — ad XIV da XX st.

«Žanočyja pjesy» Kavalova

Vydaviectva Ihara Łohvinava specyjalizujecca na publikacyi litaraturnaha avanhardu. Nia zdradziła sabie vydaviectva i hetym razam: tut rychtujucca paetyčnyja zborniki Viki Trenas «Cud kanfiskavanaha dziacinstva» i Valžyny Mort «Ja tonieńkaja, jak tvaje viejki» (z paemaj «Hopniki»). Razam z pradstaŭnikami «Bum-Bam-Litu» drukujucca ŭ Łohvinava j «neaklasyki» pakaleńnia «Tutejšych». 5 vieraśnia maje ŭbačyć śviet kniha pjes Siarhieja Kavalova «Navuka kachańnia». Za joju rychtujecca kniha «piatrohlifaŭ i filalahiemaŭ» Piatra Vasiučenki «Adlustravańni pieršatvoru». U bolš dalokich planach vydaviectva — histaryčnaja proza Ŭładzimiera Arłova, kniha limerykaŭ Andreja Chadanoviča, zbornik vieršaŭ Lery Som.

Poŭnaściu hety artykuł možna pračytać u papiarovaj i pdf-versii "Našaj Nivy"

Adam Voršyč

• 0
• 0
• 0
• 0
• 0
• 0