U Vierbnuju niadzielu ŭ mienskim Teatry biełaruskaj dramaturhii adbylisia vielikodnyja tarhi aŭkcyjonnaha domu «Paragis». Siarod pakupnikoŭ byli hości ź Niamieččyny, Rasiei, Indyi i Ŭkrainy. Partneram «Paragis'u» vystupaŭ słavuty dom «Christie's». Piša Siarhiej Chareŭski.
Pieravažnaja bolšaść vystaŭlenych na prodaž rečaŭ — kamernyja, chatniaha ŭžytku. Heta danina realijam ajčynnaha rynku, dzie hałoŭnyja pakupniki jašče nie daśviedčanyja ŭ surjoznym mastactvie. Dziva što amal tracina ekspanavanych parcalanavych i masianžovych statuetak i talerak była raspradadziena. Z uvahi na mižvielikodny čas, arhanizatary vystavili bahata biełaruskich, eŭrapiejskich i rasiejskich abrazoŭ XVI—XX st. Vialikuju kaštoŭnaść ujaŭlajuć vystaŭlenyja hetym razam staraśvieckija abrazy ź Vietki.
Najdaražej pradałasia karcina «Načny krajavid» rasiejskaha mastaka R.Šaŭčuka (1849 h.) Z uvahi na čas napisańnia — biassprečny rarytet dla Biełarusi. Karcina ŭjaŭlaje saboju dziŭnavata-abstraktny zachodnieeŭrapiejski fantazijny pejzaž, jak maje być z młynom-vietrakom i muravankaj pad śpičastym dacham. Zadavoleny saboju pakupnik adrazu ž raźličyŭsia j zahadaŭ źniać karcinu z vystavy — peŭna, kab pryjści dachaty nie z pustymi rukami. Košt karciny małaznanaha Šaŭčuka skłaŭ paŭtary tysiačy dalaraŭ. Značyć, hrošy ŭ krainie jość.
Možna ciešycca z taho, što ŭ krainie jość entuzijasty z «Paragis», jakija pryvučajuć patencyjnych pakupnikoŭ da hetkich akcyj. Hladziš, u nastupnym pakaleńni biełarusaŭ źjaviacca surjoznyja kalekcyjanery j mecenaty. Mo chto ŭ vysakarodnym zapale budzie vykuplać staradaŭnija abrazy j viartać ich, naprykład, u Vietku.
Vystava, dzie možna ŭbačyć nieraspradadzienyja pakul rečy, budzie pracavać da 1 traŭnia. Tamsama dadatkova buduć ekspanavacca tvory j rarytety, jakija vystaviać na nastupnym aŭkcyjonie 29 traŭnia.
Ciapier čytajuć
«Kazaŭ, što źniščyć mianie, bo ŭ jaho suviazi i pahony». Byłaja žonka vajuje z padpałkoŭnikam. Taho panizili da ŭčastkovaha13
Kamientary