13 лістапада назіральнік Юрый Вашчанчук зняў на відэа спробу апусціць у скрыню стос бюлетэняў на ўчастку №37 Брэсцка-Усходняй акругі №3. Дзяўчыну з відэа хутка ідэнтыфікавалі: яе завуць Настасся Кулічкова, яна працуе педагогам-псіхолагам у дзіцячым садку, які знаходзіцца за 50 метраў ад выбарчага ўчастка.
Загадчыца гэтага садка Таццяна Мосіна ўзначальвае выбарчую камісію на ўчастку №37.
Увечары 13 лістапада «Наша Ніва» звязалася з Таццянай Мосінай — заспела яе на працоўным месцы ў садку.
Але жанчына адмовілася ад каментараў. «У нас бацькоўскі сход, не магу гаварыць», — паведаміла Мосіна і кінула слухаўку. Праўда, праз некалькі хвілін работнікі школы паведамілі, што дырэктарка ўжо сышла з працы.
«Наша Ніва» звязалася з Вашчанчуком, каб ён распавёў, што адбываецца на ўчастку сёння.
«Учора гэтая дзяўчына спакойна сышла. Старшыня камісіі Мосіна нічога не зрабіла, не спрабавала спыніць дзяўчыну, разабрацца ў тым, што адбываецца, ці паклікаць міліцыю. У нас была невялікая размова з ёй, Мосіна заявіла, што ніяк не датычная да таго, што адбываецца. Тады я яшчэ не ведаў, што дзяўчына — падначаленая Мосінай, — кажа Юры Вашчанчук. — Адбылося гэта ўсё апоўдні прыкладна. А ўжо пасля абеду на ўчастку вывесілі аб’яву: «Відэаздымку можна весці толькі з дазволу старшыні камісіі». Вось і ўся падзяка за тое, што я прадухіліў укід бюлетэняў.
Увогуле Мосіна паводзіць сябе дзіўна. Яна не хоча са мной размаўляць. Сама хоць і прысутнічае на ўчастку, але яе нібыта няма. То сядзіць у пакоі для адпачынку, які тут побач. То прыходзіць раніцай на гадзінку, пасля знікае. Часам з’яўляецца на 2-3 гадзіны… Нейкія працоўныя моманты з ёю абмеркаваць немагчыма.
Вось зараз падчас нашай гутаркі Мосінай на ўчастку няма.
Я сёння спрабаваў з ёй пагаварыць, распавесці пра парушэнні на ўчастку. Яна адмовілася, нават паклікала міліцыянта, каб ён мяне адагнаў, бо нібыта я перашкаджаю, не даю прайсці. Пасля Мосіна спакойна сышла».
Пасля з’яўлення відэа са спробай укіду ў сацсетках пачалі абмяркоўваць: як Вашчанчук пачаў здымку менавіта ў патрэбны момант? Юрый патлумачыў гэта.
«Я чуў, як падаюць некаторыя бюлетэні — гук быў дзіўны, і я пачаў падазраваць, што ідуць укіды. Стаў больш уважліва сачыць за ўсім. І калі дзяўчына зайшла ў кабінку для галасавання, я, канечне, не бачыў, што там адбывалася. Але вельмі добра чуў, што яна дастае штосьці з сумачкі. Таму я на ўсякі выпадак пачаў здымаць, падышоў да яе і спытаўся, што ў руках. Каб я памыліўся, то выбачыўся б і выдаліў відэа. Але ж аказалася тое, што аказалася», — кажа Вашчанчук.
Кулічкова пазней коратка пракаментавала свой учынак мясцоваму парталу «Брэст-Сіці»: маўляў, у руках яе быў не стос бюлетэняў, а толькі адзін, складзены ўтрая. Вашчанчук упэўнены — гэта хлусня.
«У яе ў руках дакладна была не адна паперка, складзеная некалькі разоў. Там было штук 20 бюлетэняў. Я ўпэўнены, што гэта былі бюлетэні, я гэта бачыў на ўласныя вочы.
І яшчэ такі нюанс — скрыня для галасавання мае такую адтуліну, што ліст А4 туды не праходзіць, бюлетэнь трэба скласці ўдвая. А дзяўчына загадзя ведала, што бюлетэні трэба скласці. Гэта дзіўна. Бо большасць тых, хто галасуе, трохі губляюцца каля скрыні, просяць дапамогу ў членаў камісіі, пытацца, як закінуць бюлетэнь. А гэта дзяўчына ўжо ведала, што рабіць, загадзя склала той стос так, каб ён пралез у скрыню», — кажа Вашчанчук.
Дарэчы, у дзень выбараў — 17 лістапада — Вашчанчук будзе святкаваць свой 36-ы дзень народзінаў. Правесці яго Юры плануе на ўчастку.
«Для мяне гэта прынцыпова. Я бачыў, якая вакханалія была падчас мінулых выбараў. Мяне гэта зусім не задавальняе. Я грамадзянін, і маю сваю пазіцыю», — кажа Вашчанчук.
Ярмошына пра ўкід бюлетэняў у Брэсце: Назіральніка трэба пазбавіць акрэдытацыі
Назіральніка, які зняў спробу ўкіду бюлетэняў, усё ж пазбавілі акрэдытацыі ў прысутнасці прадстаўнікоў АБСЕ
Кіраўніца дзяўчыны, якая спрабавала ўкінуць стос бюлетэняў: Яе ж ніхто не злавіў за руку
Праз дзевяць месяцаў пасля вызвалення памёр палітвязень Валерый Богдан7
Каментары