Паглядзіце, якая вядомая ўсім птушка выйграла праймерыз на званне «птушкі 2023 года»
Больш за тысячу галасоў набрала ў птушыных праймерыз знаёмая ўсім шэрая варона.
Варону вылучалі на птушыныя праймерыз і летась, піша «Ахова птушак Бацькаўшчыны».
Яе прыхільнікі тады стварылі суполку ў Фэйсбуку, прысвечаную сваёй кандыдатцы, і цэлы год дзяліліся адно з адным цікавосткамі пра яе. Аднак на тым анлайн-галасаванні перамагла белая сініца, якая ў выніку і была абраная на З’ездзе АПБ птушкай 2022 года.
Сёлетняе змаганне шэрай вароны таксама было нялёгкім. Супернікаў было менш: вялікі баклан, звычайная чаротаўка, вялікі савук і таўстадзюб.
Але з апошнім завязалася зацятая барацьба: ён проста наступаў на пяты. Дзякуючы зладжанай агітацыі каманды падтрымкі, шэрая варона змагла яго абысці.
Яна набрала 1009 галасоў. Усяго ў галасаванні паўдзельнічаў 2591 чалавек.
Каментары