Шматпакутны парк Чавеса ў Мінску канчаткова рэканструююць. Вось як ён зменіцца
Там з'явяцца венесуэльскія матывы — як мінімум у брукаванні пляцоўкі для масавых мерапрыемстваў.
У сталічным парку Уга Чавеса ідзе рэканструкцыя — ужо трэцяя чарга. Ён зайграе новымі фарбамі. Прычым як у прамым, так і пераносным сэнсе, піша Tochka.by.
Трэцяя чарга рэканструкцыі парку па аб'ёмах самая маштабная, як расказаў прараб філіяла ПМК-1 ААТ «Будтрэст №35» Артур Ваяводскі. У парадак прыводзяць велізарную тэрыторыю ў межах вуліц Нёманская, Лідская, Калеснікава і Казіміраўская.
«Цяпер актыўна працуем над пракладкай інжынерных сетак, абуладкаваннем дарог, заездаў і гасцявых парковак, фарміраваннем адхонаў. Ужо гатовы цокаль адміністрацыйна-бытавога корпуса, дзе будзе таксама зона грамадскіх прыбіральняў, залітая бетонная аснова пад дзве гасцявыя паркоўкі з боку Лідскай і Нёманскай на 84 і 32 машынамесцы. У зоне культурна-масавых мерапрыемстваў прыступілі да брукавання тратуарных дарожак», — расказаў Ваяводскі.
Як зменіцца парк
Гэтых самых дарожак у парку стане значна больш. Пліткі расходуецца неймаверная колькасць — усяго 13 відаў! Абяцаюць разнастайныя кампазіцыйныя і каляровыя рашэнні. Характэрна, што малюнак брукавання пляцовак для масавых мерапрыемстваў будзе выкананы па матывах арнаментаў Венесуэлы.
Яшчэ некалькі важных лічбаў: у парку паставяць таксама 24 км бардзюраў, пакладуць 13 тысяч «квадратаў» спартыўнага пакрыцця.
Абяцаюць, што гэтая тэрыторыя будзе патанаць у зеляніне. На плоскіх паверхнях і адхонах пакладуць 55 тысяч квадратных метраў газона. Таксама высадзяць 736 дрэў і больш за 3 тысячы дэкаратыўных кустоў.
Ландшафтны дызайн наогул прадуманы да дробязяў. Улічылі перапады вышынь і стромкія схілы — будуць створаныя сістэмы падпорных сценак і каскады пад'ёмаў з прамежкавымі краявіднымі пляцоўкамі, якія абсталююць пергаламі і лаўкамі.
Забавы ў парку
Пасля рэканструкцыі там з'явяцца дзве горкі для катання на цюбінгах, веладарожка, сцежка здароўя, пляцоўкі для скейтбардыстаў, заняткаў спортам і паркурам. Будзе месца як для масавых мерапрыемстваў, так і для ціхага адпачынку.
Для дзяцей арганізуюць дзіцячы гульнявы гарадок «Казачнае каралеўства». Абяцаюць нават «Кола агляду», але яно, калі і з'явіцца, то крыху пазней.
Каментары