Палова беларусаў — за Эўропу
47,4% жыхароў Беларусі — за далучэньне краіны да Эўразьвязу. Гэта зьвесткі сацапытаньня Незалежнага інстытуту сацыяльна-эканамічных і палітычных дасьледаваньняў, які аднавіў сваю дзейнасьць, зарэгістраваўшыся ў Літве. Паводле яго, палітыку прэзыдэнта падтрымлівае 37,8% беларусаў. 49% беларусаў лічаць, што выбары-2006 будуць справядлівымі.
Запрудзкі — старшыня МАБ
Новым старшынём Міжнароднай асацыяцыі беларусістаў абраны філёляг Сяргей Запрудзкі. Такое рашэньне прыняў IV Кангрэс беларусістаў, што прайшоў 7—8 чэрвеня ў Менску.
Жураўкову памілавалі
Экс-загадчыца спраў прэзыдэнта Галіна Жураўкова, асуджаная на чатыры гады пазбаўленьня волі за злоўжываньне службовым становішчам, памілавана ўказам прэзыдэнта. Гэта сьцьвярджае «Белорусская деловая газета», спасылаючыся на інфармацыю з праваахоўных органаў. У прэс-службе прэзыдэнта адмаўляюцца ад камэнтароў.
«Ольса» ў Швэцыі
5 чэрвеня ў Стакгольме зь вялікім посьпехам выступіў гурт «Стары Ольса». Імпрэза праходзіла ў старым месьце ў прэстыжнай залі Каралеўскага нумізматычнага музэю. Канцэрт адбыўся ў рамках міжнароднага фэсту «Раньняя музыка». Арганізатарам паездкі ў Швэцыю зь беларускага боку было ЗБС «Бацькаўшчына», са швэдзкага — прад’юсар Пэтэр Понтўік, дзед якога калісьці эміграваў з Горадні. Большасьць гледачоў складалі швэды, што ўпершыню даведаліся пра багатую беларускую музычную традыцыю ВКЛ.
Цяжкія дні «Экамэдсэрвісу»
Міністэрства аховы здароўя анулявала ліцэнзію на мэдыцынскую дзейнасьць сумеснага беларуска-амэрыканскага прадпрыемства «Экамэдсэрвіс-Інвэст». Падстава — «грубае парушэньне ліцэнзаваных патрабаваньняў і ўмоваў ажыцьцяўленьня мэдыцынскай дзейнасьці», выяўленых праверкай дзяржкантролю. Кіраўніцтва мэдцэнтру абскардзіць рашэньне міністэрства ў судзе, мяркуючы, што ўжытыя захады вельмі суворыя.
Беларускі фэстываль у Іркуцку
У Іркуцку з 5 да 11 чэрвеня праходзяць Дні беларускай культуры, што ладзіць Таварыства беларускай культуры імя Чэрскага. У праграме — вечарыны і спэктаклі.
АГ, АК; afn.by, belapan.com, svaboda.org
Каментары