На неадэкватнага пасажыра, які так спяшаўся ў Смаленск, што пабіўся з аховай метро, завялі крыміналку
Замежніку пагражае да 7 гадоў калоніі.
У Мінску затрымалі 28‑гадовага замежнага грамадзяніна, якога абвінавачваюць у нападзе на супрацоўнікаў службы аховы метро. Інцыдэнт адбыўся 26 красавіка на станцыі метро «Каменная Горка», паведамляе агенцтва «Мінск-Навіны».
Як паведамляецца, мужчына прыехаў у Мінск разам з жонкай і дзіцём. Калі ён разам з сям’ёй спрабаваў п'яны прайсці на платформу метро, супрацоўнікі бяспекі яго не пусцілі.
Пасля гэтага мужчына пачаў паводзіць сябе агрэсіўна: лаяўся, пагражаў, штурхнуў аднаго інспектара, а другога ўдарыў кулаком у твар.
Парушальніка затрымалі, супраць яго распачалі крымінальную справу.
Паводле інфармацыі пракуратуры, мужчына працуе наладчыкам станкоў у прыватнай кампаніі і раней ужо меў праблемы з законам.
Яму выставілі абвінавачанне ў гвалце і пагрозе гвалтам у дачыненні да службовых асоб, якія ахоўвалі грамадскі парадак. Артыкул прадугледжвае да сямі гадоў пазбаўлення волі.
Каментары
І так даволі часта :(