Швайцарац Ражэ Фэдэрэр пяты раз запар перамог на Уімблдонскім турніры. Зь беларусаў на гэтым тэнісным спаборніцтвы парадаваў толькі юніёр Уладзімер Ігнацік.
Такім чынам швайцарскі тэнісіст паўтарыў унікальнае дасягненьне Б’ёрна Борга. Атрымаўшы перамогу на Ўімблдоне, Фэдэрэр умацаваў пазыцыі ў сусьветным рэйтынгу, апошняе абнаўленьне якога адбылося сёньня.
Паводле рэйтынгу тэнісістаў-прафэсіяналаў, які ўлічвае дасягненьні апошніх 52 тыдняў, швайцарац займае першае месца, маючы 7290 балаў, у Надаля — 2-е месца і 5225 балаў. Макс Мірны зьляцеў аж на 28 пазыцый і займае 85-ы радок. Уладзімер Ваўчкоў — 820-ты з 15 баламі, ён наадварот падняўся на 135 месцаў.
А вось у чэмпіёнскай гонцы 2007 г. лідзіруе Надаль з 886 баламі, Фэдэрэр займае другі радок (801 бал). Макс Мірны знаходзіцца на 71-м месцы з 48 баламі.
У рэйтынгу найлепшых парных тэнісістаў Макс Мірны застаецца на трэцяй пазыцыі (4425 балаў) на 75 балаў апярэджваючы свайго напарніка Ёнаса Б’ёркмана. Лідзіруюць браты Браяны, што маюць па 5 925 балаў.
У рэйтынгу пар Мірны / Б’ёркман зьляцелі на сёмую пазыцыю. Прычына — параза ў першым крузе Ўімблдону.
Наогул беларусы ў Лёндане выступілі ня надта пасьпяхова. У адзіночным разрадзе Мірны выбыў у другім крузе, Вікторыя Азаранка. Парадаваў толькі юніёр Уладзімер Ігнацік, які ў фінале прайграў амэрыканцу Доналду Янгу — 5:7, 1:6. Але ў ягоным посьпеху нічога дзіўнага няма. Ігнацік быў пасеяны ў сваім разрадзе пад першым нумарам, а ў чэрвені ён перамог на «Ралян Гарос».
Прапагандысты запэўніваюць, што 196 палітвязняў ужо на свабодзе7
Каментары